Yezhanq 2

Yezsuz Hawj Naemx Byenqbaenz Laeuj

1Vaenz daih sam, mbanj Zazliqliq longq Zaznah naeh miz goanz hoak qiag raep loz, meh Yezsuz yuq dih naeh. 2Daenh goj qingj Yezsuz daj cohsaenz dix, paenqdix goj bae hoak qiag. 3Laeuj ndut nauq, meh Yezsuz daj dix hax: "Paenqdix mboq miz laeuj yah." 4Yezsuz hax: "Meh, gaenq naeh daj raeuz miz gaeng mux?#2:4 Meh, gaenq naeh daj raeuz miz gaeng mux?Gaemz naeh, bwnz aeu kauq Cizlah laiz naeh hoakzaqnaeh hax: Yah nyingz aj, mawz daj gux miz gaeng mux? Yezsuz hoakzaqnaeh rongx meh dix hoak yah nyingz mboq zawh hax dix mboq aeu meh dix hoak meh dix, zawh hax dix baenz biak kauq Dez ndaw Fax. Yezsuz goj zawh lug zaiz Maxliqyaq, gaj dix goj zawh lug zaiz dij Sen. Zwz gux naengz mboq taeng." 5Meh dix daj puj koij hax: "Dix nemz su hoak gaeng, su zoq hoak gaeng." 6Dih naeh miz choak aen rangz tin, aen ux laep teq song sam doangj naemx ux naeh, zawh hawj puj Yaeuhtaiq hoak sowh gaenq zauh hawj hoakri saw naeh. 7Yezsuz daj puj koij hax: "Aeu naemx zoaj bae ndaw rangz daem nauq." Paenqdix zoq aeu naemx zoaj bae ndaw rangz daem nauq, taengdeg baeg rangz. 8Yezsuz daeuq hax: "Gannaeh daek maz, aeu mwz hawj goanz gaem kaeujpyaek naeh." Paenqdix zoq aeu mwz. 9Goanz gaem kaeujpyaek naeh jimz sowh laeuj naemx byenqbaenz naeh, mboq ruxndeq aeu rawz maz, mizgaj sowh puj koij daek naemx naeh ruxndeq. Goanz gaem kaeujpyaek naeh zoq rongx goanz aeu mez naeh maz, 10daj dix hax: "Gawz goj zawh aeu laeuj ndae baiz daekgoanq, taj puj qiag ndut imq yaq, zux baiz sowh laeuj tuk nyeuz naeh, gaj mawz aeu laeuj ndae nyaengx taeng gannaeh." 11Baez naeh zawh baez nduq Yezsuz hoak sowh saeh ndaw fax naeh, zawh yuq ndaw mbanj Zazliqliq longq Zaznah naeh hoak, Yezsuz hoak gaenq naeh hawj daenh ruxndeq dix miz najta, cohsaenz dix zoq sinq dix. 12Gvaq mbaed naeh yaq, Yezsuz daj meh dix, nongx dix, cohsaenz dix, bae longq Zazbowhnungh, yuq dih naeh ndowj ndaej jij vaenz ux.

Yezsuz Hawj Aen Rownz Dij Sen Saw

13Zaekgaj taeng jeng puj Yaeuhtaiq jeng rongx hoak Jeng Gvaq naeh,#2:13 Jeng Gvaqzawh puj Yaeuhtaiq bi ux jin gonghhw ux hoak gaenq nyen zwzpujjeq dij Sen zowz paenqdix ni ndaw Aizjih. Gaj laux hongz Aizjih mboq hawj paenqdix ni, dij Sen nemz bin dix goanz ux daeuj kaj lug zaiz to sowh dij goanz yuq ndaw Aizjih naeh. Gaj jixzawh baegdu rownz gawz miz lowd dij mbej ix, bin dij Sen zoq gvaq bae, mboq mwz ndaw rownz, kaj lug zaiz to. Hoakzaqnaeh zoq rongx hoak Jeng Gvaq. Yezsuz zoq mwz Yezluqsaxlaengx chaenh. 14Dix leztaen gumhhongh rownz dij Sen miz puj kai dij moaz, dij mbej, noagbiadhaeb, goj miz sowh puj lwh ngaenzjenz naeh yuq dih naeh naengh.#2:14 Zwz naeh aen rownz dij Sen yuq Yezluqsaxlaengx chaenh, zawh hawj dij goanz dihndin biangz dij Sen, daj dij Sen hax kauq. 15Dix zoq aeu zowg hoak laenj maexfaet ux, daem paenqdix daj dij moaz, dij mbej paenqdix ni ndaw gumhhongh. Dix zoaj ngaenzjenz sowh puj lwh ngaenzjenz naeh, ngex aen zongz paenqdix laemx. 16Dix daeuq daj sowh puj kai noagbiadhaeb naeh hax: "Ban le gaenqnaeh ni, laek aeu rownz Dez gux hoak hangzhw." 17Cohsaenz dix zoq nyen ndaej ndaw Sw Dij Sen hoakzaqnaeh laiz: "Rownz dij Sen yuq ndaw zaw gux zungqyauq taeuq, daenh lezmboqsanq dix, gux yinx mboq ndaej zaeh zaeh ah."#2:17 Gaemz kauq naeh yuq Sw Lownx 69:9.

18Puj Yaeuhtaiq cham dix: "Mawz hoak sowh saeh ndaw fax naeh sowh rawz hawj piu lez, hawj piu ruxndeq mawz miz qenhliq hoak sowh saeh naeh mux?" 19Yezsuz yaeng: "Gaenqsu lid aen rownz dij Sen naeh, sam vaenz gux daeuq daengj dix ndae." 20Puj Yaeuhtaiq hax: "Aen rownz dij Sen naeh daengj siqsip-choak bi zux daengj ndae, mawz sam vaenz daeuq daengj dix ndae ndaej ix?" 21Gaj aen rownz Yezsuz hax naeh mboq zawh hax aen rownz dij Sen yuq doqnaj paenqdix naeh, zawh hax ndang dix. 22Baenzzaqnaeh, Yezsuz tai yaq vaenz daih sam daeuq zaeu yaq, cohsaenz dix nwh ndaej dix ndaej hax gaemz kauq naeh, zoq sinq Sw Dij Sen daj sowh kauq Yezsuz hax naeh.

Yezsuz Ruxndeq Ndaw Zaw Dij Goanz Nwh Gaeng

23Zwz Yezsuz yuq ndaw Yezluqsaxlaengx jin Jeng Gvaq naeh, miz goanz lai taeuq leztaen sowh saenh yaengh saenh dix hoak naeh, zoq sinq dix zawh Jizduz. 24Dix ruxndeq dij goanz daengzle nauq, baenzzaqnaeh dix mboq hawj hoakri maengx paenqdix. 25Dix ruxndeq ndaw zaw dij goanz nwh gaeng, baenzzaqnaeh dix yungq mboq zoah dij goanz haxdoq dix dij goanz baenzzaqrawz.

Currently Selected:

Yezhanq 2: ZHN

Highlight

Copy