Zawxkauq 19

Yuq Ndaw Yixfuhsoax Chaenh

1Zwz Yaqbozloah yuq ndaw Goazlinhdoz chaenh naeh, Bauxloah vaenx bae le longq baih mboq yuq haenz haij naeh, yaq dauh maz Yixfuhsoax chaenh. Yuq ndaw Yixfuhsoax, dix mex jij goanz cohsaenz Yezsuz ux, 2dix cham paenqdix: "Zwz su sinq Zaeuj naeh, su ndaej Minghkoan dij Sen mbyah?" Paenqdix hax: "Mboq ndaej, gaenqpiu daengz gaeng hoak Minghkoan dij Sen naengz mboq sanz ruxnyinz." 3Bauxloah hax: "Haenx, gaenqsu hoak sowh diauq zauh soiq rawz mawj?" Paenqdix hax: "Hoak diauq zauh soiq Yezhanq yaix hoak naeh." 4Bauxloah hax: "Yezhanq saeh daenh hoak diauq zauh soiq naeh, dix yaix goanzlai hoak loang yauq rux gaix. Yezhanq goj haxdoq goanzlai hoj sinq goanz daeuj doaklaeng dix naeh. Goanz daeuj doaklaeng dix naeh zoq zawh Yezsuz." 5Paenqdix ruxnyinz yaq, zoq aeu zwh Yezsuz hoak diauq zauh soiq naeh. 6Bauxloah aeu mungz baed bae now paenqdix, Minghkoan dij Sen zoq daeuj ndang paenqdix, sowh gaunaeh paenqdix zoq aj baeg hax kauq yowngh ndai, zawxkauq dij Sen. 7Daengzle miz teq sipngih goanz ux naeh. 8Sam ndown dungzdam, Bauxloah yuq rownzndawcowq koanx kauqfaengz dij Sen, ngoah taeuq, daj daengzle laemh sowh saeh goh dij Sen naeh, chownq daenh sinq Zaeuj. 9Gaj mbangj goanz haxnyaeb, mboq venq sinq Zaeuj, yuq doqnaj goanzlai moakndai ka loh Zaeuj. Bauxloah yaix cohsaenz Yezsuz laek daj paenqdix zaemh yuq. Dix vaenz vaenz yuq ndaw aen hoiq rongx hoak Toizhaznuh naeh daj daenh laemh kauq dij Sen. 10Hoakzaqnaeh ndaej song bi yaq, dij goanz ndaw Yaqciqyaq daengzle nauq, puj Yaeuhtaiq gojndae, puj Cizlah gojndae, gaj goanz gaj ndaej ruxnyinz kauq Zaeuj.

Jiat Goanz Lug zaiz Seqjizvax

11Dij Sen hawj Bauxloah rux hoak sowh saeh saenh yaengh saenh dwx taeuq naeh. 12Daengz aeu jiatnaj Bauxloah rux aeu mbenghyauz Bauxloah nyaengx ndang puj chaej, puj chaej naengz rux ndae, dij pi goj daeq ndaw ndang daeuj. 13Puj Yaeuhtaiq, miz paenq ux, bae dih bae dih, ndaem dij pi. Zwz naeh paenqdix miz jij goanz ux haeggaj aeu zwh Zaeuj Yezsuz daj sowh dij goanz zoah dij pi mwz ndang naeh hax: "Gux aeu zwh Yezsuz goanz Bauxloah laemh naeh yaix mawz og daeuj!" 14Hoak mbaed saeh naeh, miz daengz jiat goanz lug zaiz Seqjizvax ndoij. Seqjizvax zawh goanz gvanx puj mbud dij Sen puj Yaeuhtaiq naeh. 15Gaj dij pi yaeng paenqdix: "Gux ruxnaj Yezsuz, goj ruxndeq Bauxloah zawh gawz, gaj gux mboq ruxndeq su zawh gawz!" 16Goanz zoah dij pi mwz ndang naeh zoq yoangh bae doq paenqdix, saeuh bex paenqdix. Paenqdix ndaej chaej, ndangndiang lenh daeq rownz gaengnaeh og daeuj. 17Nanghgaj sowh dij goanz yuq ndaw Yixfuhsoax chaenh ndowj naeh, puj Yaeuhtaiq gojndae, puj Cizlah gojndae, daengzle ruxndeq mbaed saeh naeh, gaj goanz gaj mbu taeuq. Daeq mbaed naeh mwz, daenh zoq aeu zwh zaeuj Yezsuz hoak dwx. 18Sowh dij goanz haeuz sinq Yezsuz naeh miz goanz lai taeuq maz yuq doqnaj daengzle yinq gaenq hoakloang hoakri. 19Sowh puj mbaednduq hoakbang naeh goj miz goanz lai taeuq tw sw maz, yuq doqnaj daengzle pyaeu. Paenqdix suanq zaqjenz sowh sw aeu pyaeu naeh, ruxndeq daengzle jih haj fanh ndeaj ngaenz. 20Hoakzaqnaeh, kauqfaengz Zaeuj gaj laeng gaj miz goanz lai ruxnyinz, puj sinq gaj laeng gaj raengh.

Yixfuhsoax Luanq Mbukmbuk

21Gvaq suq naeh yaq, Bauxloah daz dauh mwz Yezluqsaxlaengx, gaj dix daz daeuq bae mbanj Maxqihdunq, mbanj Yaqgaizyaq yaq zux dauh mwz Yezluqsaxlaengx.#19:21 "Mbanj Yaqgaizyaq" zoq zawh hax mbanj Cizlah. Dix hax: "Gux mwz taeng Yezluqsaxlaengx yaq, baenz bae Loahmax lez mbaed'ux." 22Dix zoq nemz Tihmoaxtaiq daj Yixlazduz bae mbanj Maxqihdunq daekgoanq. Song goanz naeh daj dix zaemh hoak najgaengx Zaeuj. Hoakri dix naengz gaj yuq ndaw mbanj Yaqciqyaq.

23Yaq doaklaeng, dij goanz dihnaeh cholaeng ka loh Zaeuj luanq mbukmbuk. 24Laemh maz zawh baenzzaqnaeh, dih naeh miz goanz zanghngaenz ux, minxzwh rongx hoak Dixmixdeuz, dix aeu ngaenz chauq yowngh ux. Yowngh dix chauq naeh rangh dix daj aen meuh yah Yaqdixmix dij sen paenqdix naeh dungzlumj. Sowh puj chauq gaenq naeh gaj goanz gaj ndaej lih lai taeuq. 25Dix rongx sowh puj hoak zaemh yowngh naeh daj lugriangz sowh puj hoak zaemh yowngh naeh maz, daj paenqdix hax: "Gaenqraeuz daengzle ruxndeq, gaenqraeuz hoak gaenq naeh ndaej lih lai. 26Gaj gannaeh su ruxndeq, mboq zawh gaj dij goanz Yixfuhsoax chaenh, daengz daengz mbanj Yaqciqyaq naeh goj miz goanz lai taeuq sinq sowh gaenq Bauxloah koanx naeh. Su ruxndeq Bauxloah hoakzaqnaeh zau daenh: ‘Sowh gaenq aeu mungz dij goanz chauq naeh, mboq zawh dij Sen zaeh.’ 27Hoakzaqnaeh mboq zawh hawj gaj sowh najgaengx raeuz hoak naeh zoah daenh lezmboqqix, daengz aen meuh yah sen Yaqdixmix naeh goj zoah daenh lezmboqqix. Yah sen Yaqdixmix, dij goanz Yaqciqyaq daengzle nauq zwzzwz biangz dix, dij goanz ijrawz goj zwzzwz biangz dix, gaj jixzawh hoakzaqnaeh mwznaj dix naengz miz gaeng najta mah?"

28Daengzle ruxnyinz yaq, jih daengz mboq zawh haxnyaeux, rongx: "Yaqdixmix, yah sen puj Yixfuhsoax naeh miz daengznauq!" 29Daengz chaenh dij goanz luanq mbukmbuk. Paenqdix jenj song goanz dungzbownh Bauxloah, Gaizyaeuh daj Yaqlixdahgux. Song goanz naeh zawh dij goanz mbanj Maxqihdunq. Paenqdix laeg doiqnaeh mwz gumh ux gvangj taeuq. 30Bauxloah daz bae jeh goanzlai, gaj cohsaenz Yezsuz mboq hawj dix bae. 31Naengz miz jij goanz puj saeq mbanj Yaqciqyaq ux, zawh dungzbownh Bauxloah, nemz dij goanz maz chownq dix, haxdoq dix laek mwz gumh gaengnaeh naeh, nyinzndang gvaq. 32Sowh puj yuq gumh gaengnaeh daengzle luanq mbukmbuk, goanz ux lej rongx gaenq ux, gaj mbengj lai dij goanz mboq ruxndeq tomj gaeng. 33Miz puj Yaeuhtaiq ngex Yaqlihsanzdaq mwz doqnaj goanzlai, hawj dix daj goanzlai hax kauq. Yaqlihsanzdaq yaeuj mungz dix, hawj daengzle biak dix hax. 34Daengzle leztaen dix zawh puj Yaeuhtaiq, zoq caqsiq zaemh rongx: "Yaqdixmix, yah sen puj Yixfuhsoax miz daengznauq!" Paenqdix hoakzaqnaeh rongx teq song aen zungztaeuh ux naeh. 35Laux saeq dwx chaenh naeh daeuj yaix daengzle byaek, dix hax: "Dij goanz Yixfuhsoax aj, gawz mboq ruxndeq Yixfuhsoax chaenh dawz yah sen Yaqdixmix daj kvaix tin daeq dih Zaeuqsez doak daeuj naeh mux? 36Daengzle gawz goj hax gaenqnaeh zawh zaeh naeujmax, gaenqsu zoq hoj byaek, mboq jinx luanq mbaedmawq! 37Sowh dij goanz su jenj naeh, paenqdix mboq laek za'hoq ndaw meuh, goj mboq haxmbowq yah sen raeuz. 38Jixzawh Dixmixdeuz daj sowh puj daj dix hoak zaemh yowngh naeh daz gauq gawz, zoq mwz ndaw fahtinh dih puj saeq naeh gauq. 39Jixzawh gaenqsu naengz miz saeh yowngh ndai, goj yuq zwz hohciq hawj fahtinh saeh paeg.#19:39 Nganq fahlih Yixfuhsoax maz hax, ndown ux miz sam mbaed hawj dij goanz gawz miz gaeng saeh maz dih puj saeq naeh hawj puj saeq saeh paeg. 40Vaenznaeh, gaenqsu hoakzaqnaeh luanq mbukmbuk, mboq miz dauqlix saek'i. Jixzawh gaenqpiu zoah puj saeq Loahmax jinj, gaenqpiu goj gaemz yaeng mboq miz." 41Hax nauq yaq, zoq yaix goanzlai dungzbyaeg.

Currently Selected:

Zawxkauq 19: ZHN

Highlight

Copy