Zawxkauq 12

Yaqgowh Zoah Kaj, Bihdowh Zoah Aeu Mwz Kaeng Lauz

1Zwz Baznahbaz daj Sauxloah yuq ndaw Anztih'az zau daenh naeh, Cizlih goanz hoak hongz naeh goangz dij goanz zauqhoiq jij goanz ux, vazkuz paenqdix, 2dix naengz aeu remz kaj Yaqgowh goanz goz Yezhanq naeh loaj. 3Dix taen hoakzaqnaeh hoak puj Yaeuhtaiq zaemz, zoq bae goangz Bihdowh. Zwz naeh zawh Jeng Mboq Miz Fahfaenx.#12:3 Jeng Mboq Miz Fahfaenxnaeh zawh dij goanz Yaeuhtaiq bi ux gvaq gonghhw ux nyen ndaej zwzpujjeq dij Sen zowz paenqdix ni ndaw Aizjih. Zwz paenqdix daeq Aizjih og daeuj naeh, paenqdix zoah dij goanz Aizjih choi ni, baenzzaqnaeh paenqdix hoak binx paenqdix baeuh mboq goq aeu fahfaenx dwk. 4Dix aeu Bihdowh kaeng mwz ndaw lauz, hawj siq boangx bin dungzlwh dawz, boangx ux miz siq goanz. Cizlih daz gvaq Jeng Gvaq yaq yuq doqnaj daengzle saenxpanq dix.#12:4 Jeng Gvaq zawh dij goanz Yaeuhtaiq bi ux jin gonghhw ux, nyen dij Sen lingz puj jeq rownz paenqdix ni ndaw Aizjih. Zwz naeh laux hongz Aizjih mboq hawj puj jeq rownz paenqdix ni Aizjih, dij Sen nemz bin dix goanz ux daeuj kaj lug zaiz to sowh dij goanz yuq ndaw Aizjih naeh. Gaj jixzawh baeg du rownz gawz miz lowd dij mbej ix, bin'dijsen zoq gvaq bae, mboq mwz ndaw rownz, kaj lug zaiz to paenqdix. Hoakzaqnaeh zoq rongx hoak "Jeng Gvaq." 5Bihdowh zoq hoakzaqnaeh yuq ndaw lauz kaeng, dij goanz zauqhoiq caqsiq vanz dij Sen jeuq dix.

6Sowh vaenz laux hongz Cizlih daz yuq doqnaj daengzle saenxpanq dix naeh, zang'hwnz dix, Bihdowh zoah aeu song saenj tiksaed puk, noanz jinghzang song goanz bin, baegdu naengz miz bin dawz. 7Hubhaeb, miz goanz bin dij Sen ux daeuj haenz Bihdowh in, daengz ndaw lauz rungh nauq. Bin dij Sen aeu mungz daep baihlaeng Bihdowh, hawj dix ruxndownq. Bin dij Sen daj dix hax: "Dwnq naeuz kvaiq ux!" Tiksaed ndaw mungz dix ludlaed nauq. 8Bin dij Sen daj dix hax: "Raengx saikvaq, nungh haiz ndae'ndowq." Dix zoq hoakzaqnaeh hoak. Bin dij Sen daeuq hax: "Nungh sowjriz, nowngz gux daeuj!" 9Bihdowh zoq nowngz dix daeuj, gaj mboq ruxndeq gaenq bin dij Sen hoak naeh zawh zaeh, naengz faeklaih zawh taen sowh gaenq daj paen'hwnz dungzlumj taen naeh. 10Paenqdix gvaq baegdu daih aet miz bin dawz naeh daj baegdu daih ngih miz bin dawz naeh, maz taeng baegdu liak yuq haenz hw naeh, baegdu liak naeh haeggaj aj. Paenqdix og daeuj, daeq hangz loh ix ux yaq, bin dij Sen hubhaeb mboq taen. 11Bihdowh zux jinh maz, hax: "Gannaeh gux zux ruxndeq gaenqnaeh zawh zaeh, zawh Zaeuj nemz bin dix daeuj jeuq gux ni dawj mungz Cizlih daj sowh saeh puj Yaeuhtaiq ngwz gux miz naeh."

12Dix ruxndeq yaq, dix mwz rownz Maxliqyaq, yah Maxliqyaq naeh zawh meh Yezhanq, maeng goj rongx hoak Maxkowh naeh. Rownz Maxliqyaq miz goanz lai taeuq zaemh yuq daj dij Sen hax kauq. 13Bihdowh yuq baegdu baihnog naeh rongx aj du, miz goanz puj koij nyingz ux minxzwh rongx hoak Loahdaq, bae lez. 14Dix ruxnyinz zawh hiang Bihdowh, faengz daengz lumz aj du saw, lenh mwz haxdoq daengzle, hax Bihdowh in yuq baihnog. 15Daengzle hax: "Mawz baenzbaeg yah!" Dix daj paenqdix goq hax hax zawh Bihdowh singjringh, gaj paenqdix naengz gaj hax: "Mboq rux zawh Bihdowh gah, zawh bin dij Sen goanz yaz Bihdowh naeh rajnaeuh!" 16Bihdowh goq rongx rongx ajdu. Paenqdix aj du, leztaen zawh dix, menq zaemz menq sawz. 17Bihdowh aeu mungz yazyangh, haxdoq laek goak kauq, yaq haxdoq paenqdix Zaeuj hoakzaqrawz lingz dix daeq ndaw lauz og daeuj. Daeuq hax: "Gaenqsu aeu mbaed saeh naeh bae haxdoq Yaqgowh daj daengzle bihnongx ndaw zauqhoiq." Hax gah, dix zoq ni dih naeh bae dihndai.

18Gau fax zaekgaj rungh naeh, sowh bin dawz ndaw lauz naeh mboq ruxndeq Bihdowh bae rawz, paenqdix mboq ruxndeq hoakzaqrawz hoak, huangz daengz mboq zawh haxnyaeux. 19Cizlih goanz hoak hongz naeh cha Bihdowh, gaj cha mboq taen, zoq jinj sowh bin dawz ndaw lauz naeh, nemz daenh kaj sowh bin dawz ndaw lauz naeh. Doaklaeng, Cizlih ni mbanj Yaeuhdaq, bae Kaixsaxliqyaq chaenh yuq dihnaeh ndowj.

Laux hongz Cizlih Goanz Naeh Zoah Dij Sen Kaj

20 Cizlih rikdwk dij goanz ndaw Taiq'ex chaenh daj dij goanz ndaw Cizdunq chaenh. Gaj song chaenh naeh baenz maz daj sowh dih Cizlih gvanx naeh swx kaeuj, song dih naeh zoq zaemh maz dih Cizlih naeh. Paenqdix zoq mwz vanz Boahlazswzduz laux saeq yuq baihdawj Cizlih naeh saeh, vanz laux saeq naeh vanz Cizlih daj paenqdix dungzndae. 21Vaenz Cizlih daj paenqdix dungztaen naeh, Cizlih nungh tauq sowj hongz dix, naengh aen daengq hongz dix, daj daengzle hax kauq. 22Dij goanz dihnaeh biangz Cizlih, caqsiq hoakzaqnaeh rongx: "Hiang naeh zawh hiang dij Sen, mboq zawh hiang dij goanz!" 23Gaj Cizlih mboq lanx gaemz rawz, longx najta dij Sen, bin dij Sen zoq cenq hawj dij noan yuq ndaw dongx dix jin nowx dix, hawj dix tai.

24Kauqfaengz dij Sen gaj vaenz laeng gaj miz goanz lai ruxnyinz, gaj laeng gaj leuz bae gvae. 25Baznahbaz daj Sauxloah aeu sowh ngaenzjenz aeu hawj dih baenzyaeg naeh hawj yaq, zoq zowz Yezhanq goanz rongx hoak Maxkowh naeh daeq Yezluqsaxlaengx dauh bae Anztih'az chaenh.

Currently Selected:

Zawxkauq 12: ZHN

Highlight

Copy