San Lucas 21

Te smajt'an Dios la yac' te me'ba antse

(Mr 12.41-44)

1Jesús la yil ta templo te jc'ulejetic te yacalic ta yaq'uel ochel ta bay scajail te smajt'an Dios yu'unique. 2Soc la yil jtul me'ba ants te ma'yuc bila ay yu'un te la yac' ochel cheb ch'in saquil-taq'uin. 3La yal te Jesuse:

—Melel xcalbeyex: C'ax jich la yac' c'oem stuquel te bit'il la yaq'uic ta spisilic te yantique. 4Melel sobrail staq'uinic te la yaq'uic stuquelique. Yan te me'ba antse, manchuc teme ma'yuc bi ay yu'une, ja' la yac' ochel spisil stuquel te bila ja' xanix ya smac'lin sba a —xi' te Jesuse.

Jesús la yal te ya xjin te temploe

(Mt 24.1-2; Mr 13.1-2)

5Ay mach'atic yacalic ta yaanel te yutsilal te temploe, te bit'il t'ujbil tonetic yich'oje, soc te bit'il buen chajbanbil a te majt'aniletic te la yaq'uic ta stojol Dios te lume. Te Jesús jich la yal:

6—Yacalex ta yilel spisil in to. Ja'uc me to, ya me sta yorail te ma'yuc jp'ijuc ton te cajal ya xjil ta sba te yan tone —xi' te Jesuse.

Señailetic ta nopol slajibal c'aal

(Mt 24.3-28; Mr 13.3-23)

7Jich la sjojc'obeyic:

—Maestro, ¿bi ora ya xc'ot ta pasel te bila la awale? ¿Bi señail ya xchicnaj te c'alal tey ya xc'otix ta pasele? —xiic.

8La yal te Jesuse:

—Tsajtaya me abaic, ma me mach'a ya slo'layex. Ay me tsobol ya xtalic te ya slotbonic jbiile. “Jo'on Cristoon”, xiic me, soc “Yorailix”, xiic me. Ja'uc me to, ma me xats'aclinic. 9Teme ya awaiyic stojol te jajch'emix bayal c'op soc guerra, ma me xnijc' awo'tanic yu'un. Melel puersa me neel ya xc'ot ta pasel, ja'uc me to, ma to ja'uc te slajibal c'aale —xi' te Jesuse.

10Soc la yalbey yaiyic:

—Te nación soc te yan nación ya me xjajch' scontroin sbaic. Te ajwalil soc te yan ajwalile ya me scontroin sbaic. 11Ya me xchicnaj tulan nijq'uel, wi'nal ta bayuc, tulan chamel, bayal xiwel soc muc' señailetic ta yolil ch'ulchan.

12“Soc neel me ya stsaquex soc ya me snutsex. Ya me yaq'uex ta chajbanel ta sinagogaetic, soc ya me yaq'uex ta chucjibal, soc ya me yiq'uex bael ta stojol muc' ajwaliletic soc ta stojol gobernadoretic ta swenta jbiil. 13Te bit'il jich ya spasbotexe, jich me testigoex ya xc'oex cu'un ta stojolic. 14Ma me neeluc ya anopilayic te bila ya xc'o awal te ya acoltay abaic a. 15Melel te jo'one, ya me cac'beyex p'ijil c'op soc ya me cac'beyex te bila ya awalic te ma xju' yu'un sujt'esel te acontroique, soc te ma xju' ta controc'optayel yu'unique.#Lc 12.11-12. 16Ja'uc me to, ya me x'ac'otex ta c'abal yu'un te ame'-atate, soc te abanquil awijts'inabe, soc te apat-axujq'ue, soc te mach'a c'ux la awaiy aba soc ta neelale. Ay me ya smilex ta patil. 17Soc ya me yilayex ta spisilic ta swenta jbiil. 18Ja'uc me to, ma xch'ay lijc'uc te stsotsil ajolique. 19Teme cujch' awu'unique, jich me ya xcol ach'ulelic.

20“Te c'alal ya awilic te joytaybilix yu'un soldadoetic te Jerusalene, na'aic me stojol te yu'un yorailix ya yich' jinele. 21Jich yu'un te mach'atic ayic ta sq'uinal Judea, ac'a anicuc bael ta witstiquil. Te mach'atic ayic ta lum Jerusalene, ya me sc'an ya xloq'uic bael tey a. Te mach'atic ayic ta c'alc'altic, ma me sujt'ic tel ta lum. 22Yu'un ja' me yorailix te castigo ta stojolique.#Os 9.7. Jich me ya xc'ot ta pasel spisil te bila ts'ibubil jilel sc'oplal ta Sjun te Diose. 23¡Obol me sbaic te antsetic te yic'ojic alal ta xch'ujt'ique, soc te ay chu'ul-alaletic yu'unique! Yu'un ya me xtal bayal woclajel ta balumilal soc tulan castigo yu'un Dios ta stojol in lum to. 24Ay me mach'atic ya xlajic ta milel ta puñal, soc ay me chucajtic ya x'ic'otic bael ta bay spisil ta jchajp te lumetique. Te lum Jerusalén ya me xlaj ta pech'anel ta teq'uel yu'un jyanlumetic, ja' to teme ts'acaj te jich yipal c'aal te albile.

Te bit'il ya xtal te Nich'anile

(Mt 24.29-35,42-44; Mr 13.24-37)

25“Soc ya me xchicnaj señailetic ta bay te c'aale, ta bay u, soc ta bay eq'uetic.#Is 13.10; Ez 32.7; Jl 2.31; Ap 6.12-13. Soc ta sba balumilal ya me xc'opoj tulan soc sbul te mare. Jich te lumlumtique bayal me swocol ya yaiy ta yo'tanic ta scaj te xiwele. 26Te ants-winiquetic ya me xch'ayic ta q'uinal yu'un xiwel ta smaliyel spisil te bila ya xc'ot ta pasel ta balumilale, melel ya me yich' tijel te bitic ay yipic ta yolil te ch'ulchane. 27Jich me ya yilic te Nich'anile te yac ta talel ta tocal#Dn 7.13; Ap 1.7. soc yu'el soc bayal xojobil te yutsilale. 28Teme jajch' ta chicnajel te señailetique, toj me x'atejc'an abaic. Toya ajolic yu'un nopolix tel te acolelique —xi' te Jesuse.

29Soc la yalbey yaiyic xan seña-c'op:

—Ilawilic te higo-te' soc te yantic te'etique. 30C'alal ya awilic te jajch'ix ta yaxubel te yabenale, ja' me ya ana'ic stojol a te nopolix tel yorail verano. 31Soc ja' nanix jich te c'alal ya awil te ya xc'ot ta pasel spisil in to, tey me ya ana'ic stojol a te nopol ya xjajch'ix ta ajwalinel te Diose.

32“Jamal ya calbeyex, ma to xlajic a te mach'atic cuxajtic ta q'uinal ta ora to te spisil ya xc'ot ta pasel te bila la calbeyexe. 33Ya xlaj te ch'ulchane soc te balumilale. Yan te jc'ope ma xlaj sc'oplal stuquel.

34“Tsajtaya me abaic, ma me xawac' te ya xbic'taj awo'tanic yu'un te yacubele soc spisil te bitic biq'uit nax o'tanil yu'une, soc te bitic ay ta pasel jujun c'aal ta balumilal. Yu'un ma me ch'ayemuc atsaic a te ya sta yoraile. 35Ma me jichuquex te bit'il mach'a ch'ayem stsa ya xtsacot ta pejts'e, melel ch'ayem stsaic spisil ants-winiquetic ta spamal balumilal te c'alal ya sta yoraile. 36Wiq'uiluc me asitic jiche. C'oponaic Dios ta spisil ora te ayuc me awipic te jich lec ya xc'ax awu'unic spisil te bila ya xc'ot ta pasele, soc te jich me ma'yuc falta awu'unic te ya atejc'an abaic ta stojol te Nich'anile —xi' te Jesuse.

37Jujun c'aal la yaiy p'ijubteswanej ta templo#Lc 19.47. te Jesuse. Ta ajc'ubal ba wayuc ta bay Wits Olivailtic. 38Spisil te lume, ta jujun sab talic ta templo ta yaiyel stojol sc'op te Jesuse.

Currently Selected:

San Lucas 21: TZOXCH

Highlight

Copy