San Lucas 20

Yich'oj tulan yat'el te Jesuse

(Mt 21.23-27; Mr 11.27-33)

1Ay jun c'aal te Jesús yac ta sp'ijubtesel ta templo te ants-winiquetic soc yac ta yalel te lec yach'il c'ope, talic ta stojol te jwolwanej-sacerdoteetic soc te jts'ibojometique soc uuc te principaletic yu'un te lume. 2Jich la yalbeyic:

—¿Banti la awich' awat'el ta spasel spisil in to? ¿Mach'a la yac'bat awat'el? —xiic.

3La yal te Jesuse:

—Jichon uuc, ay bila ya jojc'obeyex. Ya me awalbonic: 4¿Mach'a la yac'bey yat'el ta yaq'uel ich'ja' te Juane? ¿Ja' bal te Diose, o ja' bal te winiquetique? —xi'.

5Jajch' yaanic stuquelic:

—Teme ya caltic te ja' ac'bot yat'el yu'un te Diose, ya me yalbotic: “¿Bistuc ma la ach'uunic te bila la yale?”, ya me yutotic. 6Soc teme ya calbeytic te ja' ac'bot yat'el yu'un winiquetic, spisil lum ya me smilotic ta ch'ojel ta ton, melel xch'uunej yo'tanic te bit'il ja' j'alwanej yu'un Dios te Juane —xiic ta yaanel.

7Jich yu'un la yalbeyic te Jesuse te ma sna'ic te mach'a la yac'bey yat'el te Juane. 8La yal te Jesuse:

—Jichon uuc. Ma xcalbeyex te mach'a la yac'bon cat'el ta spasel spisil in to —xi'.

Seña-c'op te j'at'eletic te amen yo'tanique

(Mt 21.33-44; Mr 12.1-11)

9Te Jesús jajch' sc'opon te lume. La yalbey yaiyic in seña-c'op to:

—Ay jtul winic te la sts'un ts'usubiltic,#Is 5.1. soc la yac' jilel ta wentainel yu'un j'at'eletic. Bajt' ta c'ubul q'uinal. Bayal u jalaj tey a. 10C'alal la sta yorail ta tulel sit te sts'usube, la sticun bael jtul abat, yu'un ya xba sc'anbey te j'at'eletic te jayeb ya xc'ot ta swenta te sts'usube. Te j'at'eletic la smajic te abate. Ma'yuc bi la yac'beyic bael xujt'uc. 11Te yajwal ts'usubiltique la sticun yan abat. Ja' nanix jich ma la yich'ic ta muc'. La smajic, soc ma'yuc bi la yac'beyic bael. 12Yan buelta te yajwal ts'usubiltique la sticun te yoxebal abate, ja'uc me to, te j'at'eletique la yejch'entesic, soc la xch'ojic loq'uel.

13“Te yajwal ts'usubiltique la yal ta yo'tan: “¿Bila lec ya jpas? Ja' lec ya jticun bael te jnich'an te bayal c'ux ta co'tane. Repente ya yich'bon ta muc' teme la yilique”, xi' ta snopel. 14Te c'alal la yilic te j'at'eletique, jich la yalbey sbaic: “Ja' in to, ja' te mach'a ya xjil ta swenta te q'uinale. Ja' lec jmiltic, yu'un jo'otic me ya xjil ta jwentatic te q'uinale”, xiic. 15Jich la sloq'uesic bael ta ts'usubiltic, soc la smilic.

“¿Bi me ya spas awaiy te yajwal ts'usubiltique? 16Ya calbeyex te ya me xtal smil jilel te j'at'eletique, soc yantic me ya yac'bey swentain te ts'usubiltic yu'une —xi' te Jesuse.

Te mach'atic la yaiyic stojole la yalic:

—¡Ma jichuc ya sc'an te Diose! —xiic.

17Ja'uc me to, te Jesús la yilbey sitic. Jich la yal:

—¿Bi xi' jiche te bila ts'ibubil jilel ta Sjun te Diose:

“Te ton te ma xtuun la yilic te jpas-naetique,

ja' yiptajib chiquin-na c'otix stuquel”,#Sal 118.22. te xie?

18Spisil mach'a ya xt'uxaj ta sba te tone, ya me xlilaj tey a. Soc spisil mach'a ya xnet'ot yu'un te tone, jc'axel me tan ya xjil yu'un —xi' te Jesuse.

Bit'il ay sc'oplal te patanile

(Mt 22.15-22; Mr 12.13-17)

19Te jwolwanej-sacerdoteetic soc te jts'ibojometique, ora nax c'an stsaquic te Jesuse. Yu'un la sna'ic stojol te ja' sc'oplalic te seña-c'op la yal te Jesuse, ja'uc me to, la xi'ic te ants-winiquetique. 20Jich yu'un la sticunic jtsajtaywanejetic te scuyoj sbaic ta lec yo'tanic ta ilel ta stojol te Jesuse, swenta yu'un jich me ya yac'beyic yal te bila amene. Yu'un jich me ya yaq'uic ta sc'ab a te ajwalile. 21Jich la sjojc'obeyic te Jesuse:

—Maestro, jna'ojtic te toj te bila ya awale soc te bila ya awac' ta nopele. Ma tsabiluc nax awu'un te mach'a ya awich' ta muq'ue. Melel jamal ya awac' ta nopel te be yu'un te Diose. 22¿Lec bal te ya jtoj jpatantic ta stojol te Cesare, o ma stac'? —xiic.

23Te Jesús la sna' stojol te bit'il amen te yo'tanique. La yalbey yaiyic:

—¿Bi yu'un ya awilbonic co'tan? 24Ac'bon quil jsejbuc te taq'uine. ¿Mach'a yelaw te ya awilique soc mach'a sbiil te nacale? —xi'.

La yalic:

—Ja' te Cesare —xiic.

25Jesús la yalbey yaiyic:

—Te bila ja' yu'un te Cesare, ac'beya te Cesar, soc te bila ja' yu'un te Diose, ac'beya te Diose —xi' te Jesuse.

26Jich ma ju' yu'unic te la yac'beyic yal ta stojol lum te bila amene. Jchajp la yaiybeyic a te bit'il sujt'esbot sc'opic yu'un te Jesuse. Tey ma'yuc bila la yaliquix a.

Jesús jojc'obot bit'il ay te cha'cuxele

(Mt 22.23-33; Mr 12.18-27)

27Ay c'o sc'oponic Jesús cha'oxtul te saduceoetique. Te saduceoetique ma'yuc cha'cuxel ta sc'opic.#Hch 23.8. Jich la sjojc'obeyic te Jesuse:

28—Maestro, te Moisés la sts'ibubotic jilel: “Teme ay laj jtul winic te cuxul jilel te yiname, teme ma'yuc jilel snich'ane, ja' ac'a yic' yinamin te yijts'ine. Jich me ay sts'umbal ya xc'ot a te sbanquile”,#Dt 25.5. te xie. 29Ja'uc me to, ay juctul winiquetic te sjoy sbaic ta alatayele. Te banquilale la yic' yinamin jtul ants, ja'uc me to, laj. Ma'yuc jtuluc jilel te snich'ane. 30Jich te xchebale la yic' yinamin te me'ba antse. Ja'uc me to, laj uuc, ma'yuc jtuluc jil uuc te snich'ane. 31Soc jich nix uuc te yoxebale. Ta sjuctululic ma'yuc jilel jtuluc snich'anic. 32Patil laj uuc te antse. 33¿Mach'a me yinam ya xc'ot te c'alal ya sta yorail te cha'cuxele? Melel ta sjuctululic la yinaminic ta spisilic —xiic.

34Te Jesús la yalbey yaiyic:

—Spisil te mach'atic ayic to ta balumilale, ya xnujbinic soc ya xbajt'ic ta ich'el. 35Yan te mach'a jayeb lec ya x'ilotic yu'un Dios te jich ya xju' ya x'ainic tey a ta bay te utsil-q'uinal te ya xchicnaj ta patile soc te ya xcha'cuxic tel ta bay te animaetique, ma'yuquix nujbinel tey a. 36Soc ma xju' ya xlajiquix. Pajal c'oemiquix soc te ch'ul abatetique. Yal-snich'an Dios c'oemic te bit'il cha'cuxemiquixe.

37“Te mach'atic lajemique, ya me xcha'cuxic. Jich la yal uuc te Moisés te c'alal la xcholbey sc'oplal te pejt' ch'ix te yac ta tilele. Tey la yal a te Diose, te ja' Dios yu'un te Abraham, te Isaac soc te Jacobe.#Ex 3.6. 38Te Diose ma ja'uc Dios yu'un te mach'atic lajemique. Ja' Dios yu'un te mach'atic cuxulique, melel spisil cuxul ta sit ya yil stuquel te Diose —xi' te Jesuse.

39Ay cha'oxtul te jts'ibojometic te jich la yalique:

—Maestro, buen lec te bila la awale —xiic.

40Jich te saduceoetique la xi'ic sjojc'oyel yan aiyejetic.

¿Mach'a sts'umbal te Cristoe?

(Mt 22.41-46; Mr 12.35-37)

41Te Jesús la sjojc'obey yaiy:

—¿Bit'il ay te ya yalic te ja' sts'umbal David te Cristoe? 42Melel ja' nix te David te jich la sts'ibuy jilel ta bay Salmoetic:

“Te Cajwaltic Dios jich la yalbey te Cajwale:

‘Naclan ta swa'el jc'ab,

43ja' to teme la cac'bat apech' ta teq'uel te acontrotaque’,#Sal 110.1. xi' te Diose”, te xie.

44¿Bit'il ay jiche te ja' sts'umbal David te Cristoe? Melel “Cajwal”, xi' te Davide —xi' te Jesuse.

Jesús la yalbey smul te jts'ibojometique

(Mt 23.1-36; Mr 12.38-40; Lc 11.37-54)

45Spisil te lume, la yaiyic stojol te bila jajch' yalbey te jnopojeletic yu'un te Jesuse:

46—Tsajtaya abaic yu'un te bila ya spasic te jts'ibojometique. Melel toyol yo'tanic yu'un te ya slapic ta beel te snajt'il c'u'ique, soc toyol yo'tanic yu'un te ya xpatbot yo'tanic ta comonsitil ta bay yolil ch'iwich. Soc toyol yo'tanic yu'un te ya snajc'an sbaic tey a ta bay nactijibaletic swenta ich'el ta muc' ta bay te sinagogaetique. Soc ya smaquic ta ora te sbabial nactijibaletic ta bay ya stsob sbaic ta we'ele. 47Soc ya spojbey sna sbiluc te me'ba antsetique. Ja'uc me to, jal ya sc'oponic Dios ta comonsitil, yu'un jich me ya xcuyotic ta lec. Ja'ic te c'axem to xan castigo ya x'ac'botique —xi' te Jesuse.

Currently Selected:

San Lucas 20: TZOXCH

Highlight

Copy