San Lucas 11

Jesús p'ijubteswan ta sc'oponel Dios

(Mt 6.9-15; 7.7-11)

1Ay jun buelta te c'alal laj yo'tan ta sc'oponel Dios te Jesuse, ay jtul jnopojel te jich la yal:

—Cajwal, p'ijubtesawotic ta sc'oponel Dios uuc jich bit'il te Juan la sp'ijubtes te jnopojeletic yu'une —xi'.

2Te Jesús jich la yal:

—Te c'alal ya ac'oponic te Diose jich me xawalic:

“Jtatic Dios, te ayat ta stoyolil ch'ulchane,

ac'a ich'otuc ta muc' te ach'ulbiile.

Ac'a c'otuquix yorail te ya awich' ajwalinele.

Ac'a pasuc sc'anjel awo'tan ta balumilal jich bit'il te yac ta pasel ta ch'ulchane.

3Ac'botic we'elil swenta jujun c'aal.#Pr 30.8-9.

4Pasbotic perdón yu'un jmultic, jich nix te bit'il ya jpasbeytic perdón uuc te mach'atic ay smul ta jtojoltique.

Ma me xawac' yalucotic yu'un te yiljibal co'tantique.

Coltayawotic loq'uel ta bay te bila amene,”

xaex me ta sc'oponel te Diose —xi' te Jesuse.

5Soc la yal xan te Jesuse:

—Jich bit'il in to: Teme ay jtul te mach'a jun awo'tan aba soque te ya xba ac'opon ta sna ta olil ajc'ubal: “Ac'bon jelbat oxpejch'uc awaj, 6yu'un jul tel ta jna te mach'a jun co'tan jba soque. Ma'yuc bi ya cac'bey stuuntes”, teme ya awute. 7Ta yutil sna ya sjac'bat ac'op, ya yalbat: “Ma xawulilayon, yu'un macalix te sti' jnae, soc wayalonix soc te jnich'nabe. Ma xju' cu'un ya xjajch' cac'bat te bila ya ac'ane”, ya yutat. 8Ya calbeyex, manchuc teme ma sc'an ya xjajch' yac'bate te bit'il jun awo'tan aba soque, ya me yac'bat ta puersa, swenta yu'un jich ma xawulilay xan. Jich me ya yac'bat spisil te bila ya xtuun awu'une. 9Jich yu'un ya calbeyex: C'anbeya te Diose, jich me ya yac'bat. Lea te bila ya ac'ane, jich me ya ata ta leel. C'opojan ta ti'nail, jich me ya sjambat te Diose. 10Melel te mach'a ay bila ya sc'anbey te Diose, jich ya x'ac'bot yu'un; soc te mach'a ya sle te bila ya sc'ane, jich me ya sta ta leel; soc te mach'a ya xc'opoj ta ti'naile, jich me ya xjambot.

11“¿Ay bal jich awo'tanic ja'ex te tatilexe, teme ya sc'anbat waj swe' te anich'ane, ton bal ya awac'bey swe'? ¿Soc teme chay ya sc'anbate, chan bal ya awac'bey sti'? 12¿Soc teme tomut ya sc'anbate, tsec bal ya awac'bey sti'? 13Melel te ja'exe, manchuc teme amen te awo'tanique, ya nax ana'ic yaq'uel te bila lec ta stojol te awal-anich'anique. ¿Ja'uc to bal a te Jtatic te ay ta ch'ulchane? Ya me yac'bey te Ch'ul Espíritu te mach'a ya sc'anbeye#Jn 14.13-14; 15.7,16; 16.23-24; 1 Jn 3.21-22; 5.14-15. —xi' te Jesuse.

Te Jesús yich'ojbey yu'el pucuj ta sc'opic

(Mt 12.22-30; Mr 3.20-27)

14Te Jesús la sloq'uesbey pucuj ta yo'tan jtul winic te pasbil ta uma' yu'une. Te c'alal loc' te pucuje, jam te sti'e. Jchajp nax la yilic a te ants-winiquetique. 15Soc ay la yalic:

—Ja' in winic to, ya sloq'ues pucujetic ta swenta Beelzebú, ja' te mero ajwalil yu'un te pucujetique#Mt 9.34; 10.25. —ay xiic.

16Soc ay yantic c'an yilbeyic yo'tan te Jesuse, la sc'anbeyic yil seña yu'el ta ch'ulchan.#Mt 12.38; 16.1; Mr 8.11. 17Te Jesús sna'oj stojol te bila yac ta yaanel yo'tanique, jich yu'un la yalbey:

—Te mach'atic jtul nax muc' ajwalil ay yu'unique, teme ya xjajch' scontroin sbaique, ya me sjin sbaic ta stuquelic a. Ja' nanix jich teme ya xat sbaic te mach'atic jun nax na ayique, jich me ya sjin sbaic a. 18Ja' nanix jich te Satanase teme ya xjajch' xat sbaique, ¿bit'il c'an jalajuc ta at'el soc te yu'ele? Te bit'il jich ya calbeyexe, ja' yu'un te ya awalbonic te yacon ta sloq'uesel pucuj ta swenta yu'el Beelzebú. 19Yan teme swenta Beelzebú te ya xloc' pucujetic cu'une, ¿mach'a ta swenta yu'el te ya sloq'ues pucujetic te jnopojeletic awu'unique? Jich yu'un ta swenta te jnopojeletic awu'unic tey chican a te ma jichuc te bila ya awalique. 20Ja'uc me to, ja' nax ta swenta yu'el Dios te yacon ta sloq'uesel te pucujetique. Tey chicanix ta jamal te ayix ta ajwalinel ta awolilic te Diose.

21“Teme ay c'ajc'al winic te buen chapal soc yat'ejib ta scanantayel te snae, ma xbajt' ta elc'anel te sbiluque. 22Yan teme ya xtal yan winic te c'ax jich yip te bit'il te c'ajc'al winique, jich me ya xlaj ta tsalel soc ya me xbajt' ta pojel spisil yat'ejib te scanantayej sba a, soc jich ya x'ich'bot bael te sbiluque.

23“Te mach'a ma ba ay ta jwentae, ja' jcontro abi.#Mr 9.40. Te mach'a ma ta jwentauc ya stsobawane, ja' jinwanej abi.

Te pucuje ya xcha'och xan tey a ta bay loq'uem

(Mt 12.43-45)

24“C'alal ya xloc' ta yo'tan ants-winic te pucuje, ya xbeen ta taquin q'uinaletic, yu'un ya sle te banti ya yich' lewae, ja'uc me to, ma sta. Jich ya xjajch' yal: “Ya me sujt'on bael ta jna te banti loq'uemon tele”, xi'. 25Te c'alal ya xc'ot tey a, jich ya xc'o stabey yo'tan te ants-winic te bit'il na te mesbil soc te chajbanbil ta leque. 26Jich ya xba yic' tel juqueb pucujetic te c'ax jich yixtaelic te bit'il ay stuquele. Spisilic ya x'och snainbeyic yo'tan te ants-winique. C'ax to xan jich ya xbolob a te bit'il ay ta neelale —xi' te Jesuse.

Te mach'atic bin nax yutsilique

27Te c'alal yac ta yalel aiyej a te Jesuse, ay jtul ants jajch' yawtay ta yolil te ants-winiquetique:

—Bin nax me yutsil te ants la yic'at ta xch'ujt'e soc te la anuc'bey xchu'e —xi' ta aw.

28La yal te Jesuse:

—Ja' bin nax yutsil stuquelic te mach'atic ya yaiybeyic stojol sc'op te Diose soc te ya xch'uunic spasele —xi'.

Te mach'atic amen yo'tanic ya sc'anic seña yilic

(Mt 12.38-42; Mr 8.12)

29Bayal mach'a la stsob tel sbaic ta stojol te Jesuse. Jich jajch' yalbey yaiyic:

—Te ants-winiquetic te cuxulic ta q'uinal ta ora to, amen te yo'tanique. Ya sc'an seña#Mt 16.4; Mr 8.12. yilic, ja'uc me to, ma x'ac'botic. Ja' seña ta stojolic c'oem te Jonás te namey q'uinal j'alwanej yu'un te Diose. 30Melel te Jonase, ja' seña c'ot ta stojol te niniveetique.#Jon 3.4. Ja' nanix jich te Nich'anile, ja' seña c'oem ta stojolic uuc te ants-winiquetic te cuxulic ta q'uinal ta ora to. 31Te c'alal ya sta yorail te ya x'ilbot bi yilel yat'elic te jayeb ants-winiquetic te cuxulic ta q'uinal ta ora to, tey me ay a te antsil-ajwalil te ay ta stojol sur. Ya me stejc'an sba ta yalbeyel smulic c'oem, te melel c'ubul tal yaiybey stojol sp'ijil sc'op te Salomone.#1 R 10.1-10; 2 Cr 9.1-12. Yan te mach'a li' ay to, ja' cajal yu'un te Salomone. 32Ja' nix jich uuc te niniveetique. Ya me stejc'an sbaic ta yalbeyel smulic te jayeb mach'a cuxulic ta q'uinal ta ora to, te melel te niniveetique la sujt'es yo'tanic yu'un smulic te c'alal albot yaiyic yu'un Jonás#Jon 3.5. te bila yaloj te Diose. Yan te mach'a li' ay to, ja' cajal yu'un te Jonase.

Te bila ya yil q'uinal a te abaq'uetale

(Mt 5.15; 6.22-23)

33“Ma'yuc mach'a ya stsum c'ajc' te ya snac' [soc te ya smac ta cajon.] Ya stujch'an#Mt 5.15; Mr 4.21; Lc 8.16. ta yawil swenta yu'un ya yilic q'uinal a te mach'atic ya x'ochic ta nae. 34Te asite jich c'oem te bit'il c'ajc' te ya yil q'uinal a te abaq'uetale. Teme lec ay te asite, scojt'ol abaq'uetal sacubenix q'uinal ta stojol. Yan teme amen te asite, scojt'ol abaq'uetal ayat ta ijc' q'uinal yu'un. 35Tsajtaya me abaic ta lec teme ma ijc' q'uinaluc te ayex ta swentae, te acuyojic ta saquil q'uinale. 36Teme scojt'ol abaq'uetal te ayat ta saquil q'uinal soque, teme ma'yuc xujt'uc ijc' q'uinal tey a, jich me ya awil q'uinal ta lec a jich bit'il teme tilem ta atojol te c'ajq'ue —xi' te Jesuse.

Jesús la yalbey smulic fariseoetic soc te jts'ibojometique

(Mt 23.1-36; Mr 12.38-40; Lc 20.45-47)

37C'alal laj yo'tan ta c'op te Jesuse, ay jtul fariseo la yic' bael ta we'el ta sna. Jich och tey a te Jesuse, soc la snajc'an sba ta mesa. 38Te fariseoe bayal ayan yo'tan yu'un te bit'il ma neeluc la spoc sc'ab jich te bit'il ay te costumbre yu'unique. 39Te Cajwaltic jich la yalbey:

—Te ja'ex fariseoetic, ja' nax ya asapbeyic spat te vasoe soc te platoe, ja'uc me to, nojel ta awo'tanic elec' soc mulil. 40Ma x'ana'ic q'uinal. Te mach'a la spasbey spat te vasoe, ¿ma bal ja'uc nix la spasbey uuc te yutile? 41Te ja'exe q'uebanbeya me'baetic te bila q'uejbil awu'unique. Jich me pocbil ya xc'ot ta spisil.

42“Te ja'ex fariseoetic ¡ya me awil awocolic! Melel ja' nax ya awac'beyic smajt'anin Dios jun ta slajunebal te yerbabuena soc ruda soc spisil te aboc'-itaje.#Lv 27.30. Yan te bitic toj ta pasel ta stojol yantic soc te bit'il c'ux ta co'tantic te Diose, ja' in to, ja' pasel ya sc'an awu'unic, soc uuc te yan te yacalex ta spasele.

43“Te ja'ex fariseoetic ¡ya me awil awocolic! Melel ya awantayic nactijibaletic ta swenta ich'el ta muc' ta bay sinagogaetic. Soc ja' bin nax awo'tanic yu'un te ya awich'ic ich'el ta muc' ta comonsitil ta bay ch'iwichetic.

44“Te ja'ex jts'ibojometic soc uuc te ja'ex fariseoetic ¡ya me awil awocolic te cha'lam awo'tanique! Melel jichex te bit'il muquenaletic te ma chicanuc ta ilel, te jun yo'tan ya xc'axic ta beel tey a te ants-winiquetique, yu'un ma sna'ic teme muquenale —xi' te Jesuse.

45La sjac' tel jtul jts'ibojom:

—Maestro, te bit'il jich la awale, jo'otic la aq'uexlaltesotic uuc —xi'.

46La yal te Jesuse:

—Te ja'ex jts'ibojomex ¡ya me awil awocolic! Melel ya awaq'uic ta cuchel ijc'atsil te ma xju' ta cuchel yu'un te ants-winiquetique. Yan te ja'exe ni jch'ixuc sbic'tal ac'ab ya atsaquic te ijc'atsile.

47“Te ja'exe ¡ya me awil awocolic! Melel ya apasbeyic snail smuquenal te namey q'uinal j'alwanejetic yu'un Dios te la smilic te ame'-atatique. 48Jich ya awaq'uic ta na'el te bit'il jich awo'tanic yu'un te bila la spasic te namey q'uinal ame'-atatique. Melel ja'ic la smilic. In te ja'exe, ja' ya apasbeyic snail te smuquenale.

49“Jich yu'un te Dios te ay sp'ijil stuquele, jich la yal: “Ya jticunbeyex j'alwanejetic soc jpuc-c'opetic. Ay ya amilic soc ay ya anutsic”, te xie. 50Te mach'atic cuxulic ta q'uinal ta ora to, ya me x'ac'bot stojic te la smalbeyic xch'ich'el spisil te j'alwanejetic te lajic ta milel ta xjajch'ibal to tel balumilal. 51Ja' to ta xjajch'ibal te malbot xch'ich'el te Abele#Gn 4.8. soc ja' to te c'alal malbot xch'ich'el te Zacarías#2 Cr 24.20-21. te la yich' milel ta bay olilal ay yu'un te xchic'jibal smajt'an Dios soc te temploe. Melel xcalbeyex, te jayeb mach'atic cuxulic ta q'uinal ta ora to, ya me x'ac'bot xcuchic stojel te mach'atic lajemic ta milele.

52“Te ja'ex jts'ibojometique ¡ya me awil awocolic! Melel la apojbeyic syaweal te p'ijil-o'tanile. Ma ba ya x'ochex tey a te ja'exe, soc ma x'awaq'uic ochel te mach'atic yo'tan ya sc'an x'ochique —xi' te Jesuse.

53Te bit'il jich la yal te Jesuse, te ts'ibojometic soc te fariseoetic, bayal ilinic ta jc'axel yu'un. Jich jajch' sjojc'obeyic bayal aiyej ta c'axem to xan. 54Yu'un la yilbeyic yo'tan teme ay ma lecuc te bila ya yal te Jesuse, te jich ya xju' ya stsaquic ta sc'opic a.

Currently Selected:

San Lucas 11: TZOXCH

Highlight

Copy