Oseas 13
13
Jc'axel ya yich' jinel Israel
1C'alal c'opojic te yajwal Efraín,
te yantic ta chajbalchajp te israeletic la yich'ic ta muc'.
Ja'uc me to, laj te Efraín te c'alal la sta smul ta xch'uunel Baal.
2Ja' nix jich yacalic ta spasel mulil.
Ya yultesic ta c'ajc' te splataique,
ya spas yajcananic a,
chican bi yilel ya smulan spasel te mach'a ya sna'ic spasele.
Ora ya yalic:
—Ac'beyaic milbil smajt'an —xiic.
Te ants-winiquetic ya sbujts'iyic te yajcananique,
ja' te sloc'omba alal toro.
3Ja' yu'un, jichic me te bit'il sjab lum ta sacubel q'uinale;
jichic me te bit'il ts'ujul ta ijc' to q'uinale.
Ta sab ya xch'ay jc'axel,
jich bit'il taquin ac ya slic bael te iq'ue,#Sal 1.4; Jer 13.24; Sof 2.2.
jich bit'il ya xloc' ta sbe te ch'aile.
4Ya yal te Cajwaltique:
—Jo'on Ajwalilon, Dioson awu'un c'alal ayat to ta Egipto.
Ma me ayuc yan mach'a ya acuy ta Dios,
jo'on nax me jtuquel;
melel jo'on nax me jcoltaywanejon awu'un.#Ex 20.2; Is 43.11; 45.21.
5Jo'on la jcanantayat ta lumq'uinal te
xlemlon sc'aal
ta jochol taquin q'uinale.
6“C'alal la spas sobrail awe'elic te ja'exe,
noj toybail ta awo'tanic yu'un,
soc la ach'ayon ta awo'tanic.#Dt 8.11-17.
7Ja' yu'un, jich me ya jpasbey ta stojolic
te bit'il ya spas te león-choje,
jich bit'il leopardo-choj te ya xmujc'taywan ta be.
8Ya xloc'on tel ta stael jich bit'il me' oso te pojbil yalataque,
ya me jlombey te xch'ujt'e.
Jichon me te bit'il león-choj, te tey nax ya sti' a;
jich bit'il jti'awal ja'mal chambalam te ya stsac ta ti'ele.
9Ya me jinat ta jc'axel, Israel,
soc ma'yuc mach'a ya xju' ya scomon yu'un.
10Melel ¿banti ay yo'tic te muc' ajwalil awu'une,
te ya scoltaybat spisil te lumetic awu'une?
¿Banti ay te jtsobwanejetic awu'une,
te la ac'anic te ay muc' ajwalil soc ch'in ajwaliletic awu'unique?#1 S 8.5-6.
11Soc quilimba la cac'bat te muc' ajwaliletique,#1 S 10.17-24.
soc nix quilimba la jpojbeyex.#1 S 15.26.
12“Te bila amen spasoj te Efraín ts'ibubil ta jun;
te smule ay ta na'el spisil ora.
13Te Israel c'otix yorail te ya x'ayin c'oeme.
Ja'uc me to, ja' te nich'anil te ma'yuc sp'ijile,
te ma sna' bit'il ya yac' sba te bit'il ya x'ayine.
14¿Ya bal cac' ta libre yu'un yu'el te muquenale?
¿Ya bal jcoltay loq'uel yu'un a te lajele?
¿Banti ay awu'el, ja'at lajel, te jinwanejate?
¿Banti ayic, muquenal, te bila amen awu'une?#1 Co 15.55.
Ma ba ya jna'beyix yo'bolil sba te ants-winiquetique —xi' te Cajwaltique.
15Manchuc me ya x'esmaj jichuc ac te Israele,
ya me xtal ic' ta sloq'uib c'aal;
te tulanil ic' ya xtal ta jochol taquin q'uinal,
ya me staquintes soc ya me stub ja'etic soc te sloq'uibja'etique.
Te acontro ya me spojbat bael spisil te bitic ay
ta yawil ac'ulejal te t'ujbilique.
16Te lum Samaria ya me xc'ot ta swenta castigo#Os 10.2,7,14.
ta scaj te la stoy sba ta stojol te Dios yu'une.
Ya me xlajic ta puñal.
Te alaletic yu'un ya me xt'om sbiquilic ta majel ta lum;
soc te antsetic te yic'ojic alal ta xch'ujt', muc' me ya xjambot xch'ujt'ic ta puñal.
Currently Selected:
Oseas 13: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
