Oseas 11
11
C'ux ta yo'tan Dios te toyba lume
1“C'alal jich to nax bit'il alal a te lum Israel, jo'on la jc'uxtay;
ja' stuquel te mero jnich'an la caiye,
la quic' loq'uel tel ta Egipto.#Ex 4.22; Mt 2.15.
2Te bit'il c'ax to xan ay yutsil co'tan la quic' tele,
c'ax to xan la sq'uej sba bael ta jtojol.
Te lum cu'une la yac'bey milbil majt'anil te lotil diosetic
soc la xchic'beyic pom te yajcananique.
3Ja'uc me to, jo'on la quic' ta beel te lum Efraín
soc la jp'ijubtes ta beel;
pero ma c'ot ta yo'tanic te jo'on la jcanantaye.
4La jnit ta swenta te t'ujbil yutsil co'tan,
la jtsac ta swenta xc'uxul co'tan,
jich la quic' ta jtojol.
La jpet jichuc chu'ul alaletic;
jich jajch'on ta yac'beyel swe'elic.
5Ja'uc me to, ma la sc'an sujt'es yo'tanic ta jtojol.
Jich yu'un ya me sujt'ic bael ta Egipto;
te Asiria ja' me ya xmandaltesotic yu'un.
6Te puñal ya me xmilawan ta yolil te lumetic yu'unique,
soc ya me yich' jinel ta jc'axel te tulanil ts'ajq'uetic yu'unique,
ya me yich' jinel te bitic xchapojic spasele.
7Te lum cu'un c'ubul ayic ta jtojol,
tulan yo'tanic.
Ya yawtayic te mach'a ay ta ch'ulchan ta sc'opique;
ja'uc me to, ma'yuc mach'a ya xcoltayot yu'un.
8“¿Bit'il c'an quijq'uitayat ta co'tan, Efraín?
¿Bit'il c'an ch'ayucat ta co'tan, Israel?
¿Jich bal c'an jinat te bit'il la jin te lum Adma,
jich bal ya jpasbat ta atojol te bit'il la jpasbey te lum Zeboim?#Dt 29.23.
Bayal ya xc'opoj co'tan awu'un;
ta spisil co'tan ya jna'belat yo'bolil aba.
9Ma jichuc ya x'at'ejon te bit'il ay sc'ajc'al te quilimbae;
ma ba ya jcha'jin xan te Efraín.
Melel jo'on Dioson, ma winicucon.
Jo'on Ch'ul Dioson te ayon ta awolile,
soc ma'yuc talem jinbelat
—xi' te Cajwaltique.#Dt 13.17; Jer 26.3.
10Ja'ic me ya st'unic te Cajwaltic,
te ya x'awun jichuc león-choj.
Tulan me ya x'awun,
jich te mach'atic ay yu'une yac me ta nijq'uel
ya xtalic ta stojol smalib c'aal.
11Soc la yal xan te Cajwaltique:
—Jich bit'il ja'mal mutetic, yac ta nijq'uel ya xloq'uic tel ta Egipto;
ya me xtalic ta Asiria jich bit'il stsumutetic.
Ya me cac' te ya snainic xan te snaique.
Jo'on Ajwalilon, tulan ya cal —xi'.
Amen lum yu'un Dios
12La yal xan te Cajwaltique:
—Te Efraín la sbusanbon ta jtojol te lotetic yu'une;
la spotson ta lot te lum Israele.
Judá la sloq'ues sba ta jtojol jo'on te Diosone;
ja' jun yo'tan ta stojol te yajcanane.
Currently Selected:
Oseas 11: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
