Génesis 22

Prueba ta stojol Abraham

1Ta patil Dios la spas ta prueba Abraham teme jun yo'tan ta stojole. La yalbey:

—Abraham —xi'.

La sjac' te Abraham:

—Li' ayon to, Cajwal —xi'.

2Albot yu'un te Diose:

—Ic'a bael te jip jtul anich'an Isaac te bayal c'ux ta awo'tane, baan soc ta sq'uinal Moriah. Tey ta bay wits te ya calbate, ya me xc'o amilbon jmajt'anin te anich'an, scojt'ol me ya yich' chiq'uel ta jtojol —xi' sc'oplal yu'un te Diose.

3Jich yu'un te Abraham buen sab a jajch' ta yan c'aal, la xchajban sburro. La yic' bael te snich'ane, ja' te Isaac, soc la sjoin bael cheb abatetic yu'un. La xch'uybey bael si'il te milbil smajt'an te Diose. Jajch'ic ta beel, bajt' ta banti albot yu'un te Diose. 4Ta yoxebal c'aal sbeenel a, la stoy sit te Abraham, chicanix la yil te banti albot yu'un te Diose. 5Jich yu'un la yalbey te abatetic yu'une:

—Jilanic li'to soc te burroe. Ya xboon lum to soc te quereme, ya xba jc'opon Dios soc, ta patil ya sujt'on tel soc —xi'.

6Te Abraham och ta sts'alel te si'il te milbil smajt'an Dios te scojt'ol ya yich' chiq'uele, la yac'bey xcuch bael te snich'an Isaaque. La stuch bael xutunte' soc scuchillo. Jich a bajt' xchebalic. 7Te Isaac la yalbey te state, ja' te Abrahame:

—Jtat —xi'.

—¿Bila, jnich'an? —la yut.

La yal te Isaac:

—Ay c'ajc' soc ay cuchillo, pero ¿banti ay te chij te ya xtuun yu'un milbil smajt'an Dios te ya jchic'beytique? —xi'.

8La sjac' te Abraham:

—Jnich'an, Dios ya slebotic te chij ya xtuun cu'untic ta spasel te smajt'ane —la yut.

Pajal yacalic ta beel bael xchebalic. 9C'alal c'otic ta bay q'uinal albot yu'un te Diose, jich yu'un te Abraham la spasbey scajtijib ta chiq'uel smajt'an Dios. La xchajbanbey si'il te c'ajq'ue, la sc'ol ta chuquel te Isaac, la sjawan ta sba si' ta scajtijib te smajt'an Dios te la spase.#Stg 2.21. 10La stsac ta sc'ab te scuchillo, c'an slow a te snich'ane. 11Ja'uc me to, c'opoj te ch'ul abat yu'un te Cajwaltic ta ch'ulchan:

—¡Abraham! ¡Abraham! —xi' sc'oplal.

La sjac' te Abraham:

—Li' ayon to, Cajwal —xi'.

12Albot yu'un:

—Ma me xyal ac'ab, ma me xamil te quereme. La jna'ix stojol te bit'il awich'oj ta muc' ta melel te Diose, yu'un ma ja'uc la ana'bey yo'bolil sba te jip jtul anich'ane, jun awo'tan ya ac'an amilbon jmajt'anin —xi'.

13Jich te Abraham la stoy sit, la sujt'es sba. La yil ay tat chij te quijc'ajem xulub ta pimil ch'ixtiquil. Ba stsac te tat chije, ja' la smilbey smajt'anin te Diose, ja' sjelol te snich'ane.#Heb 11.17-19. 14Te Abraham la slebey sbiil te ch'in q'uinale: “Ya slebotic spisil te bila ya xtuun cu'untic te Cajwaltique”, xi' sbiil c'ot yu'un. Jich yu'un ta ora to jich ay ta alel: “Ta wits ya yac' Cajwaltic te bila ya xtuune”, xi' sc'oplal.

15Te Abraham cha'c'oponot xan yu'un te ch'ul abat yu'un te Cajwaltic c'alal ta ch'ulchan. 16Jich la yal:

—Yaloj te Diose: “Te bit'il jich la apas, te ma ba wocol la awac'bon te jip jtul anich'ane, jun awo'tan la awac'bon, 17jich yu'un jelawen to xan ya cac'bat esmajuc bendición ta atojol. Jelawen to xan ya cac' esmajuc ats'umbal, jich yipal ya xc'otic te bit'il sji'al mar, soc te ats'umbale ya me stsal spisil yajcontro.#Heb 6.13-14; 11.12. 18Ta swenta ats'umbal ya x'ac'bot bendición bayal ta jtul ta spamal balumilal,#Hch 3.25; Gá 3.8. yu'un la ach'uunbon jmandal”, te xie —xi' sc'oplal yu'un.

19Jich yu'un te Abraham sujt' bael ta bay jilem te abatetic yu'une. Jajch'ic ta beel, jich la sjoin sbaic bael, bajt'ic ta Beerseba, tey nain a te Abrahame.

Snich'nab Nacor

20Patil tal albotuc yaiy te Abraham:

—Te awijts'in Nacor, tsobolix yal-snich'an soc te Milca: 21Uz sbiil te banquilale, Buz sbiil te ijts'inale, Kemuel sbiil te xchebal ijts'inale, ja' te stat Aram. 22Soc ay to yantic snich'nab, ja' te Quesed, Hazo, Pildas, Jidlaf soc te Betuel —utot. 23Te Betuel ja' stat te Rebeca. Jich sbiilic te waxactul snich'nab Nacor te yijts'in te Abrahame. Te sme'ique ja' te Milca.

24Soc ay yan ants la yinamin te Nacor, Rema sbiil. Ay snich'nab soc, ja' te Teba, Gaham, Tahas soc te Maacá.

Currently Selected:

Génesis 22: TZOXCH

Highlight

Copy