Deuteronomio 9
9
Cajwaltic la spas yat'el, ma ja'uc yat'el Israel
1“Aiya awaiyic, israeletic: C'otix yorail te ya xc'axex bael ta jejch' ja' Jordán, soc te ya xjajch'ex ta at'el ta spisil awipic ta stsalel ta guerra yantic nacionetic, te c'axem jich smuc'ulic soc c'axem jich yipic a te bit'il ja'exe. Ya me atsalic niwac lumetic te buen toyolic sjoyob ts'ajc'ule. 2Mero muq'uic soc mero najt'ic te yajwale, ja' pajal snajt'ilic soc te sts'umbal te c'ax najt'il winic Anac. Te ja'exe ay awaiyojiquix te ay ta alel te ma'yuc mach'a ya xju' yu'un te ya xba stsal sba soc teme ja'ic te sts'umbal Anac, te c'ax najt'il winique.
3“Ja' yu'un jich me ya ana'ic te ja' te Cajwaltic te Dios cu'untic te ya xneelaj awu'unique, te ja' pajal soc stuquel te c'ajc' ya xlajinwane. Ja' yu'un ta acomonsitic ya slajin soc ya yac'bey spejc'an sbaic te nacionetique. Ya me anutsic loq'uel soc ya me alajinic ta ora nax, jich nax me ya alajinic ta ora te bit'il ya jmuts' jsitic soc te ya jwic' jsitique, jich nix te bit'il yalojbeyex te Cajwaltique. 4Te c'alal la xch'ojbeyex loq'uel te acontroic te Cajwaltic te Dios cu'untique, ma me jichuc xawalbey abaic: “Te Cajwaltic ta scaj nix slequil cat'eltic te la yac'botic cu'unintic te lumq'uinal in to”, ma me xauquex, melel ta scaj nix amen yat'elic te ya xch'ojotic loq'uel yu'un te Cajwaltique. 5Melel ma yu'unuc slequil awat'elic, soc ni yu'unuc lequex ta winiquil ja'ex te ya awu'uninbeyic te slum-sq'uinalique. Ya xch'ojbeyex loq'uel ta asitic te Cajwaltic ta scaj te amen yat'elic, soc swenta yu'un ya xc'ot ta pasel a te bila chapal yu'un ta stojol Abraham, Isaac soc Jacob, ja' te antiguo ats'umbalique. 6Ya me sc'an ya ana'ic te ma ta swentauc slequil awat'elic ja'ex te ya yac'beyex awu'uninic te buen lequil lumq'uinal te Cajwaltic te Dios cu'untique, melel te ja'exe lom tulan awo'tanic, ma'yuc bila ya xc'ot ta awo'tanic.
Israel la stoy sba ta stojol Dios ta wits Horeb
(Ex 31.18—32.35)
7“Ya me sc'an te ma xch'ay ta awo'tanic te la awac' ilinuc yo'tan ta jochol taquin q'uinal te Cajwaltic te Dios cu'untique. Te c'alal loq'uex tel ta Egipto, ja' to te julex tel li'to, spisil ora ya atoy abaic ta stojol. 8Ta wits Horeb la awaq'uic ilinuc te Cajwaltic, mero bayal ilin ta atojolic. Ja' yu'un c'an slajinex ta jc'axel. 9Te jo'one moon bael ta wits, ja' ba quich' tel te cha'pejch' tonetic, ja' te pejch'el tonetic yu'un te trato la spas ta atojolic te Cajwaltique. Tey jalajon cha'winic (40) c'aal soc cha'winic (40) ajc'ubal a,#Ex 24.18. xujt' ma ba we'on. 10Te Cajwaltic la yac'bon te cha'pejch' tonetic, te ja' nix sts'ibuyeje. Ts'ibubil spisil tey a te c'opetic la yalbeyex ta wits te c'opoj ta yolil c'ajq'ue, ja' te c'alal la jtsob jbajtic jpisiltique. 11Ta slajibal te cha'winic (40) c'aal soc cha'winic (40) ajc'ubale, te Cajwaltic la yac'bon te cha'pejch' tonetic, ja' te tonetic te banti ts'ibubil te tratoe. 12Jich la yalbon: “Baan, coan bael ta ora, melel te lum la awic' loq'uel tel ta Egipto, yanajix yo'tanic. Mero ora nax la yijq'uitayic spasel te bi la calbey spasique. La spas sdiosinic loc'omba ta ultesbil taq'uin”, xi'.
13“Soc jich la yalbon xan te Cajwaltique: “La quilix te lume, te bit'il mero tulan yo'tanic, te ma'yuc bila ya xc'ot ta yo'tanique. 14Q'ueja aba ta bay be cu'une, yu'un ya me jlajin soc ya jch'aybey sts'umbalic, jich ya xch'ayic ta balumilal. Pero te ja'ate ya me cac' chicnajuc jun nación ta awenta te mero bayal yip soc te mero stsobole, te c'axem jich a te bit'il te lum in to”, xi'.
15“Te c'alal coon tel ta wits te yac ta tilel ae, quich'oj tel ta jc'ab te cha'pejch' tonetic te banti ts'ibubil te tratoe. 16La quil te la ataix amulic ta stojol te Cajwaltique, te apasojiquix sloc'omba ch'in toro te ultesbil ta c'ajc' te taq'uine, te jich la awijq'uitayic jilel te be la yac'beyex at'unic te Cajwaltique. 17Ja' yu'un la jch'oj coel ta lum te cha'pejch' tonetic quich'oj ta jc'abe, jich la jwuybeyex ta comonsitil. 18Patil la jtinan jba coel c'alal ta lum ta stojol te Cajwaltique, jich nix te bit'il la jpas ta neelal toe. Cha'winic (40) c'aal soc cha'winic (40) ajc'ubal ma'yuc bi la jwe'elin. Jich la jpas ta scaj te mulil la apasique. Jich la awuts'inbeyic yo'tan te Cajwaltique, soc la awac' ilinuc ta atojolic. 19Mero la jxi'bey#Heb 12.21. te yilimba soc sc'ajc'al yo'tan te Cajwaltic te chicnaj ta atojolique, te mero c'an slajinex ta jc'axele. Te Cajwaltic la yaiybon xan te jc'ope. 20Soc mero ilin ta stojol te Aarón, c'an slajin ta jyalel, pero ta scaj te la jna'bey yo'bolil sba, c'opojon yu'un. 21La jtsac te sloc'omba ch'in toro te la apasique, te ja' la ata amulic ta stojol Cajwaltic yu'une, la cac' ochel ta c'ajc'. La juch' ta lec, mero ts'ubiltic bajt', patil la jch'oj coel ta ja' te ya xco tel ta witse.
22“Soc nix ta Tabera,#Nm 11.3. ta Masah#Ex 17.7. soc ta Kibrot-hataava#Nm 11.34. la ajajch'esbey yilimba te Cajwaltique. 23C'alal la yal mandal te Cajwaltic te ya xloq'uex ta Cades-barnea#Nm 13.25—14.38. swenta yu'un ya xba awich' ta awentaic te lumq'uinal ya yac'beyexe,#Dt 1.21. ja' nix jich ma ba la ac'an ach'uunbeyic te smandale.#Nm 13.31; Dt 1.26; Heb 3.16. Ma ba la awac' xch'uunjel awo'tanic ta stojol, la ac'axintaybeyic te sc'ope. 24¡Ja' to te c'alal la jna'beyex abaique, spisil ora tulan awac'oj abaic ta stojol te Cajwaltique! 25Te bi ora la yal te Cajwaltic te jc'axel ya slajinexe, la jtinan jba coel c'alal ta lum ta stojol Cajwaltic cha'winic (40) c'aal soc cha'winic (40) ajc'ubal. 26Jich la calbey bayal wocol: “Cajwal, ma xalajin te lume, melel ja'at awu'un atuquel. Ja'at la acoltay loq'uel ta Egipto, la aloq'ues tel ta swenta smuc'ul yip awu'el. 27Na'a me te Abraham, Isaac soc Jacob, te abatetic awu'une. Ma me x'awich'bey ta wenta te stulanil yo'tanic ta atojol te lume, soc nix te sbolilic soc te smulique, 28swenta yu'un ma me jichuc ya yalic ta sq'uinal Egipto banti la aloq'uesotic tele: ‘Te Yajwalique ma ba ju' yu'un te la yac' ochel ta lumq'uinal ta banti la yalbey te ya yac'beye. Melel yu'unix ya yilay a, ja' yu'un la sloq'ues bael li'to, swenta yu'un ya yac' lajuquic ta muc'ul jochol taquin q'uinal’, ma me xiuquic yu'un. 29Yan te ja'ate lum awu'un, ja'at awu'un ta spisilic. Ja'at la aloq'ues tel ta Egipto ta smuc'ul yip awu'el, soc ta swenta bit'il la atoy ac'ab”, xoon ta stojol Cajwaltic ta awentaic.
Currently Selected:
Deuteronomio 9: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
