2 Reyes 15
15
Yat'el Azarías, muc' ajwalil yu'un Judá
(2 Cr 26.3-5,16-23)
1Ta sjuquebal xcha'winic (27) ja'wil yat'el ta muc' ajwalil ta Israel a te Jeroboam, och ta muc' ajwalil ta Judá te Azarías snich'an Amasías. 2Ay waclajuneb ya'wilal a te och ta muc' ajwalil. Jalaj ta muc' ajwalil ta Jerusalén lajchayeb yoxwinic (52) ja'wil. Te sme' Amasías Jecolías sbiil, ja' slumal te Jerusalén.
3Te yat'el Azarías lec ta sit te Cajwaltique, ja' nix jich te bit'il yat'el te state, ja' te Amasías. 4Pero ma ba la yich' loq'uesel te toyol ch'uunjibaletic te banti yacalic to yaq'uel milbil majt'aniletic soc yacalic to ta xchiq'uel pom te yajwal te lume. 5Te Cajwaltic la yac'bey castigo te muc' ajwalile, tsacot ta c'a'el-chamel, asta jich ay a te laje. Ja' yu'un te muc' ajwalil stuquel nain ta jun cuarto ta sna, la squejch'an yat'el ta mandalteswanej. Te Jotam, ja' te snich'ane, ja' c'ot ta swenta te at'ele, ja' la swentain te nacione.
6Te jayeb xan sc'oplal yat'el Azarías, soc spisil te bitic spasoje, ts'ibubil ta libro yu'un yat'el muc' ajwaliletic ta Judá. 7C'alal laj te Azarías,#Is 6.1. la smuquic soc te anima tatiletic yu'un ta Lum-yu'un-David. Patil ja' och jilel ta sjelol te snich'ane, ja' te Jotam.
Yat'el Zacarías, muc' ajwalil yu'un Israel
8Ta waxaclajuneb xcha'winic (38) ja'wil yochel ta muc' ajwalil ta Judá a te Azarías, te Zacarías snich'an Jeroboam och ta muc' ajwalil yu'un Israel. Jalaj waqueb u ta yat'el ta muc' ajwalil ta Samaria. 9Pero te yat'ele mero amen ta sit te Cajwaltique, ja' nix jich te bit'il yat'el te anima tatiletic yu'une, melel ma ba la yijq'uitay te muliletic la yac' yaluc israeletic a te Jeroboam te snich'an Nabat.
10Te Salum snich'an Jabes la xchap sc'op ta scontroinel te Zacarías, la stsac ta Ibleam, tey la smil a. Ja' och ta sjelol ta muc' ajwalil.
11Te jayeb xan sc'oplal yat'el te Zacarías ts'ibubil ta libro yu'un yat'el muc' ajwaliletic ta Israel. 12Jich c'ot ta pasel a te bi yaloj Cajwaltic ta stojol Jehú, ja' te la yalbey te ya me xnajc'aj ta muc'ul nactijibal ta ajwalil yu'un Israel te snich'nabe, ja' to ta xchancajal alnich'anetic yu'un.#2 R 10.30.
Yat'el Salum, muc' ajwalil yu'un Israel
13Te Salum, snich'an Jabes, och ta muc' ajwalil te c'alal ayix balunlajuneb xcha'winic (39) ja'wil yochel ta muc' ajwalil ta Judá a te Uzías. Pero mero jip nax jun u te och ta muc' ajwalil ta Samaria. 14Melel ja' te Manahem, snich'an Gadi, jajch' ta Tirsa, ba yac'bey guerra ta Samaria te Salum. C'alal la smil, ja' och ta sjelol ta muc' ajwalil.
15Te jayeb xan sc'oplal yat'el te Salum, soc tey nix ay a te bit'il la xchap sc'op ta scontroinel te Zacarías, spisil ts'ibubil ta libro yu'un yat'el muc' ajwaliletic ta Israel.
16Te Manahem la sjin te lum Tifsa. La sloq'ues spisil te bitic ayic tey a soc ta sjoyobal te slumale, jajch'em tel yu'un c'alal ta lum Tirsa, soc la sjambey xch'ujt'ic ta spisil te antsetic yic'oj yalique. Jich la spas, ja' yu'un te ma ba jambot te ti'nailetic yu'un te lume.
Yat'el Manahem, muc' ajwalil yu'un Israel
17Ta balunlajuneb xcha'winic (39) ja'wil yochel ta muc' ajwalil ta Judá a te Azarías, och ta muc' ajwalil yu'un Israel te Manahem snich'an Gadi. Lajuneb ja'wil jalaj ta muc' ajwalil ta Samaria. 18Pero te yat'ele ma lecuc ta sit te Cajwaltique, yu'un ma ba la yijq'uitay spasel te muliletic la yac' yaluc israeletic a te Jeroboam snich'an Nabat.
19Te muc' ajwalil yu'un Asiria, te Pul sbiile, la yochintay te sq'uinalique. Te Manahem la yac'bey oxlajuneb xcha'winic ta jmil (33,000) kilo plata, swenta yu'un ya scoltay ta yaq'uel xan yich' yip ta lec a te yat'el ta muc' ajwalile. 20Swenta yu'un jich ya xju' ta tojel a te jayeb ya yich' te muc' ajwalil yu'un Asiria, te Manahem la yal mandal te spisil mach'atic ay sc'ulejalic ta Israel ya me stoj spatanic, c'axem ta olil kilo plata. Te c'alal jich la spasbeyique, sujt' bael ta slumal te muc' ajwalil yu'un Asiria, ma ba jalajix xan tey ta slumal Israel.
21Te jayeb xan sc'oplal yat'el Manahem soc spisil te bitic spasoje, ts'ibubil ta libro yu'un yat'el muc' ajwaliletic ta Israel. 22C'alal laj, ja' och jilel ta sjelol te snich'ane, ja' te Pekaía.
Yat'el Pekaía, muc' ajwalil yu'un Israel
23Ta slajunebal yoxwinic (50) ja'wil yochel ta muc' ajwalil ta Judá te Azarías, och ta muc' ajwalil yu'un Israel te Pekaía snich'an Manahem. Cheb ja'wil jalaj ta muc' ajwalil ta Samaria. 24Pero te yat'ele amen ta sit te Cajwaltique, yu'un ma ba la yijq'uitay te muliletic la yac' yaluc israeletic a te Jeroboam snich'an Nabat.
25Pero jtul capitán-soldado, Peka sbiil, snich'an Remalías, la xchap sc'op ta scontroinel. Soc lajuneb yoxwinic (50) winiquetic ta Galaad, c'o staic ta anjibal ta spalacio te muc' ajwalil, tey c'o smilic a. C'alal la smil, ja' och sjelolin ta muc' ajwalil te Peka.
26Te jayeb xan sc'oplal yat'el te Pekaía, soc spisil te bitic la spase, ts'ibubil ta libro yu'un yat'el muc' ajwaliletic ta Israel.
Yat'el Peka, muc' ajwalil yu'un Israel
27Ta lajchayeb yoxwinic (52) ja'wil yochel ta muc' ajwalil ta Judá a te Azarías, och ta muc' ajwalil yu'un Israel te Peka te snich'an Remalías. Jalaj ta muc' ajwalil jtab ja'wil ta Samaria. 28Pero te yat'ele ma ba lec ta sit te Cajwaltique, yu'un ma ba la yijq'uitay te muliletic la yac' yaluc israeletic a te Jeroboam snich'an Nabat.
29Te c'alal ja' ay ta muc' ajwalil ta Israel a te Peka, c'ot te Tiglat-pileser, muc' ajwalil yu'un Asiria. La yu'unin te lumetic Ijón, Abel-bet-maaca, Janoa, Cedes, Hazor, te sq'uinal Galaad, te sq'uinal Galilea soc spisil te sq'uinal Neftalí; la yic' bael ta chuquel ta Asiria te yajwale. 30Te Oseas, snich'an Ela, la xchap sc'op ta scontroinel te Peka, snich'an Remalías. La stsac sba soc, jich la smil. Jich yu'un ja' och ta sjelol ta muc' ajwalil, jtab ja'wil yochel ta muc' ajwalil a te Jotam, snich'an Uzías.
31Te jayeb xan sc'oplal yat'el Peka soc spisil te bitic spasoje, ts'ibubil ta libro yu'un yat'el muc' ajwaliletic yu'un Israel.
Yat'el Jotam, muc' ajwalil yu'un Judá
(2 Cr 27.1-9)
32Ta xchebal ja'wil yochel ta muc' ajwalil a te Peka, snich'an Remalías, te Jotam, snich'an Uzías, och ta muc' ajwalil ta Judá. 33Ay jo'eb xcha'winic (25) ya'wilal a te och ta muc' ajwalile. Jalaj ta muc' ajwalil ta Jerusalén waclajuneb ja'wil. Te sme'e Jerusa sbiil, yantsil-nich'an Sadoc.
34Te yat'el Jotam lec ta sit te Cajwaltique, ja' nix jich te bit'il yat'el Uzías, ja' te state. 35La spas te yochibal templo te ay ta cajal. Mero ma ba la yich' loq'uesel te toyol ch'uunjibaletic, te banti yacalic to yac'bel milbil majt'aniletic soc yacalic to xchiq'uel pom te yajwal te lume.
36Te jayeb xan sc'oplal yat'el Jotam soc spisil te bitic spasoje, ts'ibubil ta libro yu'un yat'el muc' ajwaliletic ta Judá.
37Ja' yorail a, te Cajwaltic jajch' sticunbey scontro Judá te Rezín, muc' ajwalil ta Siria, soc te Peka te snich'an Remalías. 38C'alal laj te Jotam, la smuquic ta banti smuquenal anima sts'umbal ta Lum-yu'un-David. Patil ja' och ta sjelol te snich'an, ja' te Acaz.
Currently Selected:
2 Reyes 15: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.