Tatanigaina 13

Ebaramu Ghe Loti Dike Fota

1Ebaramu neke lao ghu pelovona mo sipana Izipi neke lao ghu ka ia kobosona kava Negevi, nia Loti ia tuunamane ia tahinamane geke leghu taremehana ghu neke ghua. 2Ebaramu neke toraina meha taghotagho fuludu ka sipisipi, gouti, bulumakau nia ka siliva nia golu, e ghua.

3Ianimu tuna ghe neke sipa nga aianimu manei, neke rizu pelovona ghu ghahe leleghu malau vai laona Betolo, neke la va tetu vonari ghu ira nona suga tapole varihoataidi Betolo ghe Ai ka neke la auno la sepao, 4neke la va tetuio ghu kaike sopebeana. Aianimu neke la va totoana ghininani manei Iahova.

5Loti neke ghahe taremehanao Ebaramu, neke taghori molamo tehi sipisipi, gouti nia bulumakau nia ira suga tapole, e ghua. 6Ghe ira ghano ka ia kava to deo geke fata ghu ka ia au varighara maneri, vununa ira tagukava dike taghoriro maneri palu dike tehi fuludu. 7Leleghonana mu ira mane ta kopui hoghara tagukava popohi ka Ebaramu nia ira mane ta kopui hoghara tagukava popohi ka Loti dike age vari hahala. Ka fafata ianimu ira noni Perizi nia ira noni Kenani, dike au nga ka kava ianimu.

8Ebaramu neke kahe ghua ghu iahi ka Loti, “Ghita mu kaike noni mo. Ghita palu, ba mane nira ka agho nia mane idi ka ara e ghua, geala daka vari magara ghu. 9Ghita da fota ghu. Faeti agho hae mo kobosona kava no kabai ghinina agho. Noto kabai ghini la agho mairi mo, ara a lao mautu mo, noto kabai ghini la agho mautu mo, ara a lao mairi mo, e ghua.”

10Loti neke mato liloho neke finini ghu ia kamotona sarena Zodani ta dufu lao ghu Zoa neke torai kuru ketuhuna taghe ia nunuma ka Iahova, ba taghe ia kavana Izipi ta ghuana. (Ka fafata iahi mu neke deo nga Iahova geke va mukoi ghu Sodomu nia Gomora.) 11Loti neke faete vanani ghu taghonai ia kamotona sarena Zodani, nia ghahe vai lao tuna fateo mo, neke ghua. Dike ghua iahi mu fotana ka maneri palu. 12Ebaramu neke au ka ia kava Kenani nia Loti geke au ghu ka varihoataidi ira malau leghaha ka ia sare, la va tetu vonarira ira nona suga tapole gheremena Sodomu, neke ghua. 13Ghe ira nonidi Sodomu dike muko fuludu dike riva ghidi ghu ira sasake taka veha vanani ghu Iahova.

14Leghuna ia ghahena Loti, Iahova neke kahe ghua iahi ka Ebaramu, “O mato liloho ka ta au nia agho ka leghu pelodi nga—pelovona mo nia pelopeka mo, fateo mo nia pakao mo, e ghua. 15Kamotona kava ta fini iamu agho, ara a mala vananigho agho nia ira pagusu ka agho e ghua, e age nomu fuludai ghu. 16Ara a age va tehiri taghe furongona kava ka malau iahi peka a ghua ghidi ira pagusu ka agho deona ge boka tahori ghu. 17Lao o la mato kamoti ghu kava ani, vununa ara a age vananigho kamoto agho.”

18Ebaramu neke ghahe kaini ghu malau ianimu neke la au hinae ghu ka gheremedi ira heke fifiluanadi Mamare ani Heboroni ka neke la riva ghinio kaike sopebeana manei mala va totoana ghinina Iahova.

Currently Selected:

Tatanigaina 13: kji

Highlight

Copy