Markus 10
10
Ponudukan pasal do Au Buli Miada
(Mat. 5:31-32; 19:1-12; Luk. 16:18)
1Om pampanauno dii i Yisus mantad siri Bandar Kaparnaum do minongoi soi pantok do Yudia. Om korikotpo dii oi Yisus, om sondipauno dii di Bavang do Yurdon. Om oguu dii i tongotulun do minuntun vagu siri Disido, om ponudukno dii Isido irad di koubasanJo.
2Om korikot nopo dii i kumpulan Porisi do monsuba daa di Yisus, om pongoduatno iolo Disido do ka, “Maja di Undang-undang Ugama tokou obuli naku i kusai mangada di savojo?” ka.
3Om jawapno dii i Yisus diolo do, “Onu nisuu di Musa dikovu bato?” ka.
4“I Musa nopo gia nga minongolila maganu do surat talak. Irino sabap i tulun obuli miada,” kadiolo.
5Om jawapno dii i Yisus kavagu diolo do, “Irino undang-undang nitulis di Musa dikovu sabap nga okodou ino ginavo muju. 6Nga mantadpo diri voruno iti vonuvo om vinaalno do Kinoringan i kusai om tongondu.#Antangai Kinovorunan 1:27. 7Om irino sabap do rumijang i kusai diamojo#10:7 diamo: diapa om iinojo, do misompuu di savojo, 8om irad dino okonnoko duvopo kojuvan diolo, nga irino miiso iri raa om tonsi diolo.#Antangai Kinovorunan 2:24. 9Jadi irad dino, okonnoko duvopo kojuvan diolo, nga atatap do miiso iolo om nong irad dino, isaai nopo iri piniiso do Kinoringan nga au obuli do kokondirianan di tulun do popiada,” kadi Yisus.
10Om korikotpo dii i Yisus siri valai, om duato nogi dii di tongotulunJo nong onu komoion di nituduk Disido. 11Om kadi Yisus kavagu diolo do, “Isaai nopo mangada di savojo, om manansavo kavagu do tongondu sondiang, om isidono kalapau di savojo mantad. 12Nga nong kondiri do tondu kumiada di kusai, om mokisavo kavagu isido do kusai sondiang, iri nga kalapau nogi,” kadi Yisus.
Minamarakat i Yisus di Tongotangaanak
(Mat. 19:13-15; Luk. 18:15-17)
13Kivaro insan tadau do rinumikot i tongotulun do minongovit di tongotangaanak mongoi siri di Yisus do mokikama supaya barakatan. Nga toguro nogi dii di tongotulun di Yisus do, “Ada kou marong mongovit di tongotangaanak si di Yisus,” ka.
14Nga kaantangai nopo di Yisus, naraatan dii Isido di tongotulunJo, om kaDisido diolo, “Poboyoo muju bo ino tongotangaanak rumikot siti Dogo. Ada muju ovudai iolo, do tulun nopo do irad diti tongotangaanak nga irino porintawon do Kinoringan. 15PatangaronKu marong dikovu iti, do isaai nopo iri au minsuribak monorima do Kinoringan momorinta disido irad di gaagaya di tanak topoyok diti, isidono iri au kaasu si Kopomorintaan di Kinoringan,” kadi Yisus. 16Om kibitono dii di Yisus i tongotangaanak, om kamawo nogi dii Disido do mamarakat.
Iso Tulun Takaya
(Mat. 10:25-28; 19:16-30; Mar. 9:35; Luk. 18:18-30)
17Om lombusno dii i Yisus mampanau mantad siri, om kivaro dii iso kusai moginangkus#10:17 moginangkus: mogundak do minongoi sumamung Disido, om sinumingkotud si Disido, om minongoduat di Yisus, “Guru do aandai, potingkuro naku i gaagayaku om kaanu oku do kovijaan di auso koovion?” kadisido.
18Om kadii di Yisus, “Isai Oku batoi do roitan Oku dika do tulun do aandai do ausoi tulun do aandai, do isono i Kinoringan do aandai? 19Nokoiloko kama do undang-undang nisuu di Kinoringan do inong diti, ‘Adako mamamatai do tulun, adako lumapau, adako manakau, adako momudut sumaksi do tulun, adako monoro om urumatono iamonu#10:19 amo: apa om iinonu,’ kado Kinoringan,” kadi Yisus.#Antangai Kinolobusan 20:12-16; Gulion 5:16-20.
20Nga kadi kusai di Yisus, “Guru, navajakuno kasangkat ino ponudukan dino mantadpo di minsusukod okupo,” ka.
21Nga otoolong#10:21 otoolong: otontong dii marong i Yisus disido do au kojuuan Disido i kusai, om kadi Yisus, “Kivaropo iiso au nosuutnu, irino pouliaino om pojualono i nunuu nopo i siri dika om popintaakono di tongotulun miskin iri torogo, om irino irad do aratanu potoouon silo suruga, om gumuliko nogi dii kavagu siti do maja Dogo,” kadi Yisus. 22Nga oludusno#10:22 oludus: olunggui ko osusa marong ginavo dii i kusai mampanau do osusa iri ginavojo do natangaran di Yisus inong diri, do oguu marong iri aratajo.
23Om antangaino dii di Yisus siri misoliputJo, om kaDisido di tongotulunJo do, “Apagonno marong i tulun takaya do masu si Kopomorintaan di Kinoringan,” ka.
24Om nokotigog dii marong i tongotulunJo di Yisus di tinangaranJo do irad dino. Nga kadi Yisus kavagu diolo, “Mitangar Oku dikovu i irad di tangaanakKu, do apagonno marong i tulun masu si Kopomorintaan di Kinoringan. 25Kouma nogi ilo songinan unta masu siri luvang do lavus mantad diri tulun takaya posuribak do ginavo om masu si Kopomorintaan di Kinoringan,” kadi Yisus.
26Nga oiranan nogi dii maamarong iolo, om moiduduat dii iolo do, “Nong irad nopo dino om isaipo dii bala kaanu kovijaan do auso koovion?” ka.
27Om pongontongno dii i Yisus diolo, om kaDisido, “Nong mantad di tulun au kaanu, nga nong mantad do Kinoringan manaak ampa nogi kaanu i tulun do kovijaan di auso koovion, sabap nong mantad di Kinoringan onuu nopo nga osiliu,” kadi Yisus.
28Nga pitangarno dii i Pitrus do, “Kasaangkat do onuu nopo nga noiduanjano do maja ikoi Dikau,” kadisido.
29Nga kadi Yisus, “PatangaronKu marong dikovu iti, do isai-isai nopo tulun do iniduan iri valaijo, ko sulodjo kusai ko tongondu, ko iamojo, ko iinojo, ko tongotangaanakjo, ko tanajo do noiduan disido sabap do maja Dogo, om sabap popitongkop diti Abar do Aandai, 30nga maso maino kaanu isido do aatus kinoguuo do valai, om sulod, om tidi, om tanak, om tana nga pokorualan nogi isido do tulun. Nga kaanupo vagu isido do kovijaan diri auso koovion insan tadau. 31Nga oguu tulun diri kopogulu do maso maino nga kotouri do insan tadau, om iri nogi tulun kotouri maino nga kopogulu do insan tadau,” kadi Yisus.
Kumointolu di Yisus Popoilo do KapatajanJo
(Mat. 20:17-19; Luk. 18:31-34)
32Om lombus nogi dii oi Yisus mongoi siri Bandar Yorusalim. Om i Yisus nopo nga minogulu mantad diolo. Om oiranan dii marong i tongotulunJo do abarani marong i Yisus do mongoi si pantok di tulun sipamatai Disido. Om iri tongotulun vokon minaja diolo nga rumosi. Om untuno dii di Yisus kavagu iri opulu om duvo tongotulunJo, om timpuun nogi dii Isido mangaabar diolo nong kukuroyon Isido do tulun, 33“Maino tumakad tokou mongoi soi Bandar Yorusalim. Om Ioku nopo diti nga i Sinumiliu do Tulun, om pojualon Okuno do tulun si di tongokotua do tulun Joudi, irino i tongokotua di imam, om i tongotulun monunuduk do Undang-undang Ugama, om oukuman Oku nogi dino diolo do patajon. Om pataakon Oku diolo si di tulun do okonko bansa do Joudi, 34insasanawon Oku diolo, pindulaan Oku diolo, pinlapasan Oku diolo, om patajon Oku nogi dino diolo. Nga apatai Oku nopo, om kotolu tadau om ovijau Oku kavagu,” kadi Yisus.
Pokionuon di Yakub om i Yaya
(Mat. 20:20-28; Luk. 22:24-26)
35Om ongoino dii adung i Yakub om i Yaya tanak di Jobidi si di Yisus, om kadiolo, “Guru, uvang ikoi daa do onuan ikoi Dika diti pokionuonja,” ka.
36Om duatono dii di Yisus nong onu pokionuon diolo.
37Om kadiolo, “Uvang ikoi daa mogom siri KopomorintaanNu do kikagajaan do iso ponong si gibangNu, om iso ponong si vananNu,” ka.
38Nga kadii di Yisus, “Au oilaan muju ino pokionuon muju dino. Kasanggup kovi naku diri kasansaraan#10:38 kasansaraan: Sinopo tangar Yunani iti nopo “kasansaraan” narait ayat diti nga “sangkir”. Antangai “sangkir” si Kamus Kitab. Komoion nopo do “obotisan” diti nga osuat Isido do kasansaraan do insan tadau. i opurimananKu do insan tadau? Om kasanggup kovi do obotisan#10:38 obotisan: oboptoisan irad diri nipamatis Dogo?” kadi Yisus.
39Om jawapno iolo, “Kasanggup ikoji,” ka.
Nga kadii di Yisus diolo kavagu, “Kasanggup kou nogi diri kasansaraan i opurimananKu, om obotisan kou irad diti nipamatis Dogo, 40nga okoniko Dogo do kuasa do momili nong isai poogomon siri gibang vananKu. Nga itino pinosodia diAmoKu#10:40 diAmo: diApa laaid do itaak Disido di tulun,” kadi Yisus.
41Nga korongou nopo dii iri opulu tulun di Yisus vokon, nga rinumaatan dii iolo di Yakub om i Yaya. 42Om loovono dii di Yisus kasangkat iolo do kaDisido, “Noilaan mujuno do iri nopo tulun kipangkat do momorinta do tulun di okonko bansa Joudi nga mongungulok di tulunjo kondiri. Om iri tongokotua do porinta diolo nogi nga ongogagarang momorinta di tulun porintawonjo. 43Nga ikovu nopo om okonko irad dino, do isaai nopo dikovu mokipangkat om misti sumiliu isido do susuuon muju. 44Om isaai nopo i uvang kopogulu om misti do sumiliu isido do susuuon kasangkat do tulun. 45Om Ioku nopo nga i sinumiliu do tulun, om korikatanKu nopo siti nga okonko maganu Oku do susuuon, nga irino sumiliu Oku do susuuon do tulun, om itaakKu iti kojuvanKu do apatai do pongolukat di tulun toguu,” kadi Yisus.
Minongolingos i Yisus di Botomius i Nobolou
(Mat. 20:29-34; Luk. 18:35-43)
46Om korikot dii i Yisus om i tongotulunJo siri Bandar Yoriku, om manau-panau iolo tumalib siri. Om ontok di lombus iolo mantad siri, oguu dii i tongotulun vokon do sinumambat do maja diolo. Om kivaro dii iso tulun nobolou mogom-ogom si disan do ralan do mokisadaka, i ponguranan do tulun do i Botomius do ngaran diamojo#10:46 diamo: diapa i Tomius. 47Om karangaai nopo dii disido do tumalib i Yisus, i tulun mantad si Bandar Nasarit, om timpuunno isido lumuvap di Yisus do irad diti, “Uu Yisus, Ikano i koturunan di Daud, kosianaino dogo!” ka.
48Nga oguu dii tulun monogur di tulun nobolou do ka, “Onu iti nakalavanu! Otosno,” ka.
Nga makin nogi dii do lumuvap isido di Yisus do, “Ikano i koturunan di Daud, kosianaino dogo!” ka.
49Karangaai nopo dii di Yisus i tulun nobolou, om indadano dii Isido, om suuono dii Disido i tulun do mongoloou di tulun nobolou do, “Loovo pogi isido,” ka.
Om loovono dii diolo i tulun nobolou, “Ada kosusa, ingkakatno do loovonko di Yisus,” ka.
50Korongou nopo dii i nobolou, om taamai dii disido iri sabungjo koduvo om nokosimpodi dii isido om pakaayai si di Yisus.
51Om duatono dii di Yisus i tulun bolou, “Onu pokitulungonnu Dogo?” ka.
“Guru, mokitulung oku supaya koontong iti matoku,” ka.
52Om pitangarno dii i Yisus do ka, “Pampanauno do nolingasankono di toruolnu do aparsayako Dogo,” ka.
Nga turus koontong i tulun nobolou, om vajano dii di Yisus mampanau.
Currently Selected:
Markus 10: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
