Matius 24

Pasal Kouyasan di Valai Sasambayangan Tagajo

(Mar. 13:1-2; Luk. 21:5-6)

1Om koopod nopo dii i Yisus monuduk, om labusno dii Isido do mogidu mantad siri Valai Sasambayangan Tagajo. Om susuut nogi dii ikoi i tongotulunJo lumabus mongoi siri Disido do popoontong ikoi diri kavavaalo diri Valai Sasambayangan Tagajo. 2Nga kadi Yisus dagai, “Aantangan mujui kama kasangkat ilo? Nga patangaronKu marong dikovu iti, do kasangkat dilo vatu pinoititimpak nga uyason do insan tadau,” kadi Yisus.

Kosusaan om Pokorualan do Tulun

(Mar. 13:3-13; Luk. 21:7-19)

3Om ontok diri ongoino dii i Yisus silo Kulud#24:3 Kulud: Kotud Jaitun om ogomno dii Isido. Om rikotno dii ikoi i tongotulunJo bubugol do kumituturan Disido om kadagai, “Abarai ikoipo nong sombia naku do uyason ilo Valai Sasambayangan Tagajo, om onu naku pongintutunanja dino korikatanNu di kumoinduvo, om pongintutunanja do koovion diti maso?” kanja.

4Nga jawapno dii i Yisus dagai do, “Antatangai mujuno, om ada kou mibobojo polidon do tulun. 5Do oguu iri tongotulun do sumangalu Dogo mamalid di tongotulun do ka, ‘Iokuno i Koristus,’ kadino, om irino do oguu i tongotulun do apalid diolo. 6Om kivaro nopo orongou muju do moipaparang siti somok om abar do moipaparang i tongotulun soi vonuvo do osodu, nga ada kou rumosi, do misti orikot kasangkat iti komoionKu. Nga okonko poko korikatan diri gosob do koovion. 7Sabap kivaro bansa gumirot lumavan sondiang bansa, om kivaro kopomorintaan gumirot lumavan sondiang kopomorintaan. Om inombo-nombo do vonuvo nga kivaro mononlikop om gunggun tana. 8Nga insan ajadi kasangkat irad diri om iri nogi dino kotimpuun di kosusaan irad diri tongondu monsusu.

9Nga kivaro dino manangkap dikovu do mongovit pataak si pantok pasansaraan om patajon kou nogi. Om kasaangkat do bansa nga obonsi dikovu sabap maja kou Dogo. 10Om irino ontok do oguu tulun mundur do lumuoi i kaparsayaan diolo, om moisuli-suli iolo manangkap do pataakon siri porinta om moibobonsi iolo. 11Om oguu nabi diri momumudut do mimbulai om mamalid do tulun toguu. 12Om muang-ruang iri karaato di tongotulun, irino sabap do kogumuan do tulun apalo ginavo do au kojuu di tulun vokon. 13Nga isaai nopo iri atagar i ginavo gosob do koovion, om irino kaanu do kovijaan di auso koovion. 14Om tumongkop i tongotulun siti vonuvo do mangaabar di Abar do Aandai nong potingkuro i Kinoringan monguasa di tongotulunJo, supaya korongou kasaangkat i tongobansa, om orikot nogi dino iri gosob do koovion diti maso,” kadi Yisus.

Iri Kobonsijan do Kinoringan

(Mar. 13:14-23; Luk. 17:20-37; 21:20-24)

15-16Om kadi Yisus kavagu, “Sombia do koontong kou nopo diri patung di kobonsijan di Kinoringan do pinoingkakat si pantok do olidang irad di natangar di nabi Daniol pogulupo, om pogidu kouno marong dikovu tulun siti Vonuvo Yudia do mongoi silo tongokulud.#24:15 kulud: kotud Nga oiduan di Kinoringan iri Valai Sasambayangan Tagajo sabap sirino i patung. -- Nga isaai nopo iri mambasa diti om rotiono i komoion diri.#Antangai Daniol 9:27; 11:31; 12:11. -- 17Om isaai nopo dikovu siri labus do valai, om adano asu siri saralom do mongongoi do onuu nopo poromponjo. 18Om isaai nopo dikovu siri dumo, nga adano uli siri valai do mongongoi di sabung nga polombusaii mogidu. 19Om ontok nopo dino diri nga okonko naalang-alang sinusa di tongotongondu do momontijan, om i tongotongondu di posusu di tanak topoyok ontok diri nga osusa nogi. 20Nga aandai do sumambayang kou si di Kinoringan do mokitulung supaya do ontok di mogidu kou ada do koontok di musim osogit ko i Tadau Koingkajadan. 21Do okonko naalang-alang kasansara ontok diri, do mantad di voruno do Kinoringan iti vonuvo aupo insan kivaro kasansaraan marong irad dino mantad di pogulupo sampai do maino, nga katalibpo iri kasansaraan om ausono rumikot kavagu kasansaraan do irad diri kasansara. 22Nga nong au pinoruai do Kinoringan i maso diri kasansaraan nga auso tulun ovijau. Nga pinoruai Disido i maso diri supaya ovijau iri tongotulun di piniliJo.

23Om nong kivaro nopo tulun do mitangar dikovu do ontok diri do, ‘Antangai pogi nga sitino i Koristus!’ ka, ko, ‘Silono i Koristus!’ ka nopo, nga ada kouno kaparsayaai diri. 24Do mimbulai piipiro koristus do momumudut om piipiro nabi do momumudut do popoontong di pongintutunan om koiranan do mamalid daa do tulun pinili do Kinoringan. 25Om ondodomo mujuno do pinoiloKuno ikovu maantad.

26Jadi abaran kou nopo do tulun do, ‘Silono Isido padang do kovotuvan,’ ka nopo, nga ada kouno ongoi mongontong, ko, ‘Sitino Isido bilik,’ ka nopo, nga ada kouno kaparsayaai diri. 27Do Iokuno i Sinumiliu do Tulun, om kointalanganKu nopo nga irad do tungkilap do monungkilap silo kosilauon om kavaang ponong silo kotonobon.

28Nga misti orikot iti tinangaranKu do irad di tongotombolog do misti rumikot monutuk di tongobangkai,” kadi Yisus.

Pongintutunan do Korikatan di Sinumiliu do Tulun

(Mar. 13:24-27; Luk. 21:25-28)

29Om kadi Yisus kavagu, “Au kalalaid kinotoliban diri kasansaraan diri, om osiliu irad do tinangaran si Kitab do,

‘Misokno vinaang dilo tadau om vulan,

om tumupitak ilo tongokorombituon mantad si tavan,#24:29 tavan: langit

om mimban kasangkat iri tongokuasa soi tavan,’

ka.#Antangai Yasaya 13:10; 34:4.

30Om ontok dirino koontong i tongotulun diri pongintutunan silo tavan do rumikot Oku, i Sinumiliu do Tulun, om mogiad nogi dino tikid-tikid bansa do tulun siti vonuvo. Om aantangan Oku nogi dino di tongotulun siri timpak do kavut do rumikot silo tavan mivaja do kuasa om i vinaangKu do agajo. 31Om ounipo dino i toburi#24:31 toburi: torumpit do opuod marong, om suuonKu nogi dino i tongomoloikatKu do monguntun di tulun piniliKu mantad poingompus diti disan tana,” kadi Yisus.

Poiradan di Puun do Nunuk

(Mar. 13:28-31; Luk. 21:29-33)

32Om kadi Yisus kavagu, “Sonsodo mujuno minsoromo iri nunuk onuon do poiradan, do momutolid nopo om momuroun kavagu, om oilaan mujuno dii do oruaino musim magadau. 33Om irad nogi dino, ontok do koontong kou kasangkat diti komoionKu, nga oilaan mujui dino do oruaino i korikatanKu.#24:33 oruaino i korikatanKu: siri solinan vokon pinotulis do: Osomokno Isido, oruaino i korikatan Disido. 34PatangaranKu marong dikovu iti, do aupo apatai kasangkat iti tongotulun maso maino om orikotno ino kouyasan do Yorusalim. 35Insan olijotpo ilo tavan om iti tana, nga tinangaranKu nopo nga auso iso olijot,” kadi Yisus.

Auso Iso Koilo Sombo do Tadau ko Jaam

(Mar. 13:32-37; Luk. 17:26-30, 34-36)

36Om kadi Yisus kavagu, “Auso iiso tulun koilo sombo do tadau ko sombo do jaam do korikatanKu, insan i moloikat silo suruga ko Ioku i Tanak nga au koilo,#24:36 Kivaro piipiro solinan di poguluupo do auso pointulis di tangar do “i Tanak nga au koilo” nga irino i TamaKu do koilo di korikatanKu. 37Om korikatanKu nopo, i Sinumiliu do Tulun, nga irad diri jaman di Nuu pogulupo. 38Do ontok di aupo nalampai do loni, mangkas i tongotulun do mogiginakanon, mogiginiupon om moikakawin irad di koubasan gosob do norikot i tadau do kinasakaan di Nuu siri kapal. 39Om okonko noilaan diolo do rumikot i loni tagajo gosob do nalampai om napatai kasaangkat i tongotulun do nolosod, om irad nogi dino i korikatanKu, i Sinumiliu do Tulun. 40Om ontok nopo diri, nong kivaro duvo kusai kumaraja siri dumo, iri nopo iso nga angatan, om iri iso koopung. 41Om nong kivaro duvo tongondu do misaud monutu do parai, iri nopo iso nga angatan om iri iso koopung.

42Om sabap diri antatangai mujuno do au oilaan muju nong sombia korikatanKu kavagu, i Tuhan muju. 43Soromoono mujuno marong, nong irad di tulun sanganu di valai do koilo do korikatan di tulun taraat do mongoi manakau, nga au dii modop isido do mangajaga supaya auno kobojou i tulun do monguyas om masu siri valaijo. 44Om sabap diri aandai do poinsodia kou laid do rumikot Oku do Iokuno i Sinumiliu do Tulun, om au muju oilaan nong sombia i korikatanKu kavagu,” kadi Yisus.

Poiradan di Turipon di Aandai om i Araat

(Luk. 12:41-48)

45Om kadi Yisus kavagu, “Isaai nopo i turipon di rumalan do kumaraja om opintar mangajaga do barang di tuanjo, om irino onuon di tuanjo do mandur monguasa kasangkat di tongoturipon vokon saralom valaijo, do papaakan diolo do taakanon ontok do kapangakanan. 46Ososogitno i turipon diri okosupan di tuanjo do papanau diri nipakaraja disido ontok do korikatan di tuanjo. 47PatangaronKu marong dikovu iti, do nong irad diri kaandai iri karajajo om arapon nogi dino isido di tuanjo do mangajaga kasangkat di tongoporomponjo. 48Nga nong araat nopo i turipon diri, om minsoromo noopo i ginavo disido do, ‘Alaidpo bo korikatan di tuanku dii,’ ka, 49om pinlalapasaino dii disido i koruangjo kumaraja, om uruk isido mangakan om mongiup mivaja di tulun naavuk, 50om auno dii aandaman disido iri tadau korikatan di tuanjo. Om tadau ko jaam di au noilalaanjo do nokorikot i tuanjo, om naantangan dii do irad diri gaagaya di turiponjo, 51om pinrutadaino dii di tuan#24:51 pinrutadaino dii di tuan: siri solinan vokon pinotulis do: sunsubon palabus i turiponjo diri, om porundunono dii isido diri tongotulun diri puupura noopo siri pantok do songiadan om sangarit-ngarit i nipon diolo do oolian kasansara,” kadi Yisus.

Currently Selected:

Matius 24: LabukPKV

Highlight

Copy