Susuuon 3

Tulun do Nokimai Nolingasan

1Nga kivaro iso tadau do minongoi i Pitrus duvo di Yaya siri Valai Sasambayangan Tagajo di pukul tiga minsosodop. Irino jaam do koubasan di tongotulun Joudi sumambayang. 2Jadi ontok diri minongoi i Pitrus om i Yaya sumambayang siri, om nokoontong iolo do kivaro iso tulun do nokimai duduvo i takodjo do au kapanau mantad di kosususu do pinoiuupan di tongotulun mangakat pakaa siri pintu. Nga tikid tadau isido kakaton di tongotulun do irad diri om pokoyon siri gotuvang di pintu, i ponguranan do tulun do “Pintu do Aandai”. Om mokianu i tulun nokimai diri do siin di tongotulun masu siri. 3Om nokoontong nopo dii isido di Pitrus duvo di Yaya masu silo Valai Sasambayangan Tagajo, om mokianu daa isido diolo do siin. 4Nga antangai dii marong di Pitrus om i Yaya iri tulun nokimai diri, om kadi Pitrus disido, “Antangai ikoi pogi,” ka. 5Jadi tinumingaa dii iri tulun do nokimai diri diolo mongiduvo do andasan nopo daa disido nong taakan diolo do siin.

6Nga kadi Pitrus kavagu, “Ausoi siinku. Nga saralom ngaran di Yisus Koristus mantad Bandar Nasarit mongolingos oku dika. Ingkakatno om pampanauno!” ka. 7Om kuutaino dii di Pitrus i longonjo vanan do poingkakat disido. Nga turus dii do nokogirot iri takodjo om iri tampangiljo. 8Om sinumimpod isido mingkakat om pipanau-panau isido. Om minaja isido di Pitrus om i Yaya masu siri Valai Sasambayangan Tagajo. Om mimpod-simpod isido mampanau om majou-rajoui dii do Kinoringan. 9Nga kasangkat di tongotulun siri nokoontong disido manau-panau om majou-rajou do Kinoringan. 10Om notutunan diolo iri tulun nokimai do isidono iri mokisadaka siri Pintu do Aandai si Valai Sasambayangan Tagajo. Om osumboijan dii marong i tongotulun do nokoontong di tulun nokimai diri do nolingasan.

Ponudukan di Pitrus siri Valai Sasambayangan Tagajo

11Om kuutaino dii di tulun nokimai iri longon di Pitrus om i Yaya. Om oiranan dii marong iri tongotulun do nolingasan iri tulun nokimai. Om santangkus-tangkusno#3:11 santangkus-tangkus: songundak-undak dii i tongotulun mongoi siri diolo. Nga sirino iolo saralom do kakilima i roitan do “I Kakilima di Suliman”. 12Nga kaantangai dii di Pitrus i tongotulun do irad diri, om kadisido diolo, “Oou kosusuladanku tulun Israil, ada kou koiranai diti tulun nokimai. Om ada kou mongontong marong dagai irad do panantaman muju daa om irino dagai do sinundu do nolingasan iti tulun ko irino sabap do rumalan ikoi maja do ugama om nolingasan isido. Nga okoni dagai do toilaan do irino mantad di Kinoringan. 13I Kinoringan nopo nga i sambawon diIbraim, om iIsak, om i Yakub, i taki tokou. Om maino pinagajo di Kinoringan i ngaran di SusuuonJo, irino i Yisus. Ikovu nopo nga minongovit di Yisus pataak siri tulun porinta. Om ontok do tinantu di Pilatus do papalabus di Yisus daa nga minangada kou Disido. 14-15I Yisus nopo nga tulun do olidang om abanar, om Isidono nontodon do kovijaan. Apatut do polobuson muju Isido nga au kovi mangakun. Om mokitulung kou di Pilatus papalabus di iso tulun do mamamatai mantad siri jiil do pogontion muju di Yisus. Nga niada muju i Yisus, om ipapatai muju Isido. Napatai nopo dii i Yisus om pinovijau Isido kavagu do Kinoringan mantad si kinapatajon, om nokoontong ikoi kasangkat do novijau Isido. 16Om irino kuasa do ngaran di Yisus do popogirot diti tulun nokimai. Antangan muju om oilaan mujui do nolingasan iti tulun, nga irino mantad do kaparsayaan disido di Yisus. Aparsaya ikoi di Yisus om irino minongolingos disido i gotuvang muju,” kadi Pitrus.

17Om kadi Pitrus kavagu, “Oou kosusuladanku, maino oilaanku do ikovu om i tongokotua muju minonuu mamatai di Yisus sabap au kovi nokoilo nong Isai Isido. 18Nga di pogulupo minonuu i Kinoringan di tongonabiJo, i popolombus di tinangaranJo do popoilo di tongotulun do osuat i Koristus do kasansaraan. Nga maino nopo nokorikotno iri tinangaranJo laaid. 19Nga irad nopo dino, rumorogo kouno di duso muju, om gumotuvang kou di Kinoringan supaya oopusan Disido i duso muju, 20om supaya pogiroton do Tuhan i ginavo muju. Om nong rumorogo kovi do duso muju nga pogulion kavagu do Kinoringan i Yisus siti dikovu. I Yisus nopo nga i Koristus, iri pinili di Kinoringan laaid do porikot siti dikovu. 21Poindada i Yisus silo suruga maino, gosob do orikot i maso do mongimban i Kinoringan diti vonuvo do mamaal kavavagu, om rumikot nogi dino i Yisus kavagu. Nga irino nipoilo do Kinoringan di pogulupo diri tongonabiJo tolidang. 22Jadi irad diti tinangaran di nabi Musa di tongotaki tokou pogulu do ka, ‘I Kinoringan nopo nga i Tuhan tokou om monuu Isido do iso nabi bansa tokou rumikot si dikovu irad diri minonuu Isido dogo. Nga rongoo mujuno marong iri tinangaran diri nabi sinuuJo. 23Nga isai-isai nopo au mongkinongou do tinangaran di nabi diri nga porijangon isido mantad di tongotulun do Kinoringan om patajon isido,’ kadi Musa.#Antangai Gulion 18:15, 18, 19. #Antangai Kinovorunan 22:18; 26:4.

24Om isaai nopo nabi sinuu di Kinoringan irad di Somuil om i tongonabi vokon nga popoilo pasal diti kojodian do maso maino. 25Sinuu di Kinoringan i tongonabi popoilo diri pinongojonjianJo nga irino nijanji Disido daton.#3:25 daton: ditokou Om iri nopo nijanji do Kinoringan diodu-aki tokou nogi nga nokorikotno siti daton. Do irad diti tinangaran do Kinoringan diIbraim, ‘Kasangkat do tulun siti vonuvo nga kibarakat mantad di koturunannu,’ kadi Kinoringan. 26Jadi pinili do Kinoringan i Yisus sumiliu do SusuuonJo. Om sinuu di Kinoringan i SusuuonJo mogulu rumikot siti daton, supaya mamarakat Isido daton do suuon tokou Disido tumolikud mantad do karaato tokou,” kadi Pitrus di tongotulun.

Currently Selected:

Susuuon 3: LabukPKV

Highlight

Copy