MALAQUÍAS 3

1Tucuita Mandaj Taita Diosca cashnami nin: “Ñucamanda villajtami cachamusha. Paimi, Ñuca purina ñandaca ñaupashpa alichinga. Canguna shuyajushca Jatun Mandajca, ñapashmi Paipajlla agllashca huasiman shamunga. Ari ninajushcata pactachij canguna shuyanajushca angelmi shamunga. Ñapachami shamunga” ninmi.

2Pai shamui punllapica, ¿pita llaquicunata apai ushanga? Pai ricurimujpica, ¿pita shinlli shayari ushanga? Paica, rupachishpa mapata anchuchin ninashna, tajshashpa mapata llujchin jabonshnami. 3Paica, culquita jacushpa mapa illajta, punchallata rurangapashnami tiyaringa. Levipaj miraicunapaj juchacunataca, curita, culquita ninapi rupachishpa, mapata anchuchinshnami anchuchinga. Shina rurajpimi, caranacunataca, Mandaj Dios munashcashna alitapacha apamunajunga. 4Shinami, Judá llactapi, Jerusalén pueblopi causajcuna, Mandaj Diosman ofrendacunata cushcataca, ñaupa huatacunapi cushijushpa chasquishcashna chasquinajunga.

5Tucuita Mandaj Diosca, cashnatapashmi nin: “Ñucaca, cangunata llaquichingapami shamusha. Chaipica yumbucunata, cazarashca jahua shujcunahuan causajcunata, llullashpa juramentujcunata, llaquichingapami cungashcapi shamusha. Shinallata, imata rurachishpapash culquita na cushpa, sapalla mamagutapash, taita mama illaj huahuatapash llaquichijcunata, caru llactamanda shamujcunata llaquichijcunatapash, Ñucata na manllashpa chashna rurashcamandami, llaquichij shamusha” ninmi.

Chungamanda shujguta cunatami villajun

6Mandaj Dios Ñucapaj juyaica napacha tucurinllu. Chaimandami Jacobpaj mirai cangunataca, na llaquichishpa tucuchircani. 7Cangunapaj punda taitacuna imashna na alicuna cashcashnami, cangunapash Ñuca mandashcacunataca na cazushpa causanguichi. Juchata saquishpa, Ñucata cazujpica, Ñucapash cangunata llaquishami. Tucuita Mandaj Dios Ñuca chashna nijujpipash, cangunaca: “¿Imatata saquina canchi?” nircanguichimi. 8¿Runaca, Taita Diosta shuhuai ushangachu? Cangunaca, Ñucapaj cashcatami shuhuarcanguichi. Shina rurashpapash: “¿Imatata shuhuarcanchi?” ninguichimi. Cangunaca, chungamanda shujguta cunatapash, ofrendacunatapash na cushpami shuhuarcanguichi. 9Cai llactapi causajcuna, chashna Ñucata shuhuashcamandami, Ñuca napacha alicachijpi causanguichi. 10Chungamanda shujguta Ñucaman cunataca, Ñuca huasiman apamuichi. Shina apamujpimi, Ñuca huasipica micuna tiyanga. Cunanda chashna rurashpa ricuichi. Canguna chashna rurajpica, Ñucapash jahua pacha ventanacunata pascashpami, ashtacatapacha bendiciamusha. Tucuita Mandaj Dios Ñucami, chashna nini. 11Shinallata, pambacunapi tarpushcacunata tucuchij ungüicunatapashmi, cangunamandaca jarcasha. Shina rurajpimi, cangunapaj pambapi fucushca granocunapash, uva chagracunapash alipacha fucunga. Tucuita Mandaj Dios Ñucami chashna nini. 12Shinallata, cangunapaj llactaca causanayai cajpimi, shuj llactacunapi causajcunaca: “Paicunaca sumaj causaitami charin” ninajunga. “Tucuita Mandaj Dios Ñucami chashna nini” nijurcami.

Alitalla rurajmandapash, na alita rurajmandapash

13Mandaj Diosca, cashnami nin: “Cangunaca, Ñucataca ninandami na alicachishpa rimarcanguichi. Shina rimashpapash: ‘¿Ima na alitata rimarcanchi?’ nircanguichimi. 14Cashnatapashmi nircanguichi: ‘Yangallatami, Taita Diospajta rurashpa causanchi. Pai mandashcata pactachishpa, tucuita Mandaj Diospaj ñaupajpi llaquirishpa causashpapash, ¿ima alitata japinchi? 15Cunanga chaimandami cashna ninchi: Jariyashpa jatun tucujcunarami cushijushpa causanajun. Na alita rurajcunara, Taita Diostapash na manllashpa causajcunarami, ima llaquipash illaj causanajun’ nircanguichimi” ninmi.

16Chaimandami, Mandaj Diosta manllajcunaca, caishuj chaishuj paicunapaj cumbacunahuan parlarinajurca. Chaita Mandaj Dios uyashpa, Paipaj libropi quilcachishpami, Mandaj Diosta manllashpa causajcunata, Paipaj shutita yarishpa causajcunata yaringapami chashna quilcachirca.

17Tucuita Mandaj Diosca cashnami nin: “Ñuca shamui punllapica, paicunaca, ashtahuan ninanda alichishcashnami canga. Imashnami taitaca, paipajta ruraj huahua na alita rurajpi cungan, chashnallatami Ñucapash paicuna ima na alita rurashcataca cungasha. 18Canguna, Ñucapajman tigrarimushpami, alita rurashpa causanahuan, na alita rurashpa causanahuan, shican cashcata, shinallata, Taita Diosta cazushpa causanahuan, na cazushpa causanahuan shican cashcatapash yachanguichi” ninmi.

Currently Selected:

MALAQUÍAS 3: QVI16

Highlight

Copy