LUCAS 18

Sapalla mamamandapash, na ali juezmandapash

1Na shaijushpa Diosta mañanamandami, Jesusca shuj yarichinahuan yachachijurca: 2“Shuj pueblopimi, Taita Diostapash na manllashpa, gentecunatapash na cazuj shuj juez causajurca. 3Chai pueblopillatami, shuj sapalla mamagupash causajurca. Paica juezpajman shamushpami: ‘Ñucata fiñaj runa ama ashtahuan llaquichishpa catichun alichihuai’ nij shamujurcalla. 4Shina nijujpipash paica, unai punllacunatami na uyashpa causarcalla. Shina cashpapash, jipamanmi paipaj shungupi cashna yajurca: ‘Diostapash na manllanichu, gentecunatapash na cazunichu. 5Shina cashpapash cai sapalla huarmi, fiñachijujpillami alita ricushpa, alitapacha ruragrini. Na chashna rurajpica, fiñachij shamujushpallata shaijuchihuangami’ yajurcami” nircami.

6Apunchi Jesusca, cashnatapashmi nirca:

“Alitalla na ruraj chai juez imata nishcatapash uyaichi. 7Taita Dioscarin, ¿nachu Pai agllashcacuna tutandi, punllandi caparishpa mañanajujta uyashpaca, alitalla ruranman? ¿Uyashpapash, na tigrachishpa shuyajungallachu? 8Paica, uchami alitalla ruranga ninimi. Ashtahuangarin, Runa Aichayuj tucushca Ñuca shamushpaca, ¿cai pachapica ali crijcunata japij shamushachu imashi?” nircami.

Fariseomandapash, impuestota japijmandapash

9“Ñucanchillami, alitalla ruranchi” nishpa, shujcunata yangapi churashpa purijcunamanmi, Jesusca cashna yarichishpa yachachijurca:

10“Ishcai runacunami, Diosta mañangapa, Diosta yarina huasiman vichai rinajurca. Shujca, fariseo. Shujca, impuestota japijmi carca. 11Chai fariseo runa shayarishpaca: ‘Taita Dioslla, candaca pashi nipanimi. Na caishuj gentecunashna shuhua, alitalla na ruraj, cazarashca jahua shujcunahuan causajpash na canichu. Impuestota japij cai runashnaca na canichu. 12Semanapica, ishcai punllatami na micushpa Diosta mañani. Imaguta charishpapash, chungamanda shujgutami carapani’ nishpami mañajurca. 13Ashtahuangarin, impuestota japij runaca carullaman rishpami, jahua pachata ricuitapash na ushashpa, llaquirishpa, pechota huajtarishpa: ‘Ñuca Taita Dioslla, ñuca juchasapa runataca llaquihuayari’ nijurca. 14Cangunataca, cashnami nini: Impuestota japij runami, Dios alicachishpa chasquijpi huasiman tigrarca. Ashtahuangarin fariseotaca, na chasquircachu. Maijambash jatun tucushpa purijca, pingaichi tucungami. Shinallata na jariyashpa causajca, jatunyachi tucungami” nircami.

Huahuacunata Jesús bendiciashcamanda

(Mat. 19:13-15; Mar. 10:13-16)

15Huahuacunapi maquita churashpa mañachunmi, Jesuspajman apamunajurca. Shina apamunta Paipaj yachajujcuna ricushpami, jarcashpa rimanajurca. 16Ashtahuangarin Jesusca, paicunata cayashpami cashna nirca:

“Huahuacuna Ñucapajman shamuchun, na jarcashpa saquinallami canguichi. Taita Dios mandajuj llactaca, cai huahuacunashna shamujcunapajllami. 17Na llullashpami cangunataca cashna nini: Taita Dios mandajuj llactapi causanata, shuj huahuagushna na chasquishpaca, chai llactaman yaicuitaca napacha ushangachu” nircami.

Charij huambramandami villajun

(Mat. 19:13-15; Mar. 10:17-31)

18Shuj mandaj runami, Jesustaca cashna tapurca:

“Ali runagumi cangui Yachachij, causaita causagrinata ñuca charingapaca, ¿imatata rurana capani?” nircami.

19Shina nijpimi Jesusca, chai runata cashna nirca:

“¿Imashpata Ñucataca, ‘ali runagumi cangui’ nihuangui? Pipash alica na tiyanllu, Taita Diosllami alica tiyan. 20Mandashca shimicunataca, canllata ñami yachangui. Chaipica cashnami nijun: ‘Cazarashca jahua ama shujhuan causanguichu, ama huañuchinguichu, ama shuhuanguichu. Chashnapachami nishpa ama yangata juchachinguichu. Cambaj taitata, mamatapash alicachishpa cazungui’ nijunmi” nircami.

21Shina nijpimi Jesusca cashna nirca:

“Mandashca shimipi chashna nijujtaca, huahuamandapachami tucuita pactachijupani” nircami.

22Chashna nijta Jesús uyashpami:

“Cashnata pactachinarami cangui: Can tucui charishcata jatushpa, imagutapash na charijcunaman caragrilla. Chashna carashpaca, jahua pachapimi ninan charij cangui. Chai jipaca, Ñucata catihuailla” nircami.

23Chashna nijta uyashpami chai runaca, charij charij cashcamanda ninanda llaquirirca. 24Shina ninanda llaquirijta Jesús ricushpami cashna nirca:

“¡Ninan charijcunapajca, Taita Dios mandajuj llactaman yaicunaca shinllipachami! 25Taita Dios mandajuj llactaman, ninan charij runa yaicuitaca na fangalla ushangachu, chaipaj randica, camellorapashmi, auja utujuta fangalla yalinman” nircami.

26Shina nijta uyajcunaca:

“¿pita shinaca quishpiri ushangayari?” ninajurcami.

27Jesusca, paicunata cashnami nirca:

“Gentecunapaca, chaitaca napacha ushanallachu. Ashtahuangarin Taita Diospaca, rurai ushanallami” nircami.

28Shina nijpimi Pedroca, cashna nirca:

“Ricui, ñucanchi charishcacunata, saquishpami, candaca catinajunchi” nircami.

29Shina nijpimi Jesusca, cashna nirca:

“Na llullashpami, cangunataca cashna nini: Paipaj huasita, taitata, mamata, huauquicunata, huarmita, huahuacunata saquishpa, Taita Dios mandajuj llactaman ringapa catishpaca, 30cai pachapipash ashtahuanmi japinga. Jipa causaipicarin, causaita causagrinatami japinga” nircami.

Jesusca, Pai huañunatami cutin villashca

(Mat. 20:17-19; Mar. 10:32-34)

31Jesusca, Paipaj chunga ishcai yachajujcunatalla pushashpami, cashna nirca:

“Ricuichi, Jerusalenmanmi vichai rinajunchi. Runa Aichayuj tucushca Ñucamanda Profetacuna imata quilcashcapash, tucuimi chai pueblopica pactanga. 32Chaipimi Ñucataca, na Israelcunaman japichihuanga. Paicunami, Ñucataca pujllashpa asinajunga. Na alicachishpa rimashpa, t'ucashpami churahuanga. 33Ña astishca jipaca, huañuchihuangami. Ashtahuangarin, quimsa punllahuanga causarishallami” nircami.

34Ashtahuangarin Jesús imata nijujtapash, Paipaj yachajujcunaca, na yachai usharcachu. Imamanda chashna nishcatapash na villashca cajpimi, paicunaca na yachai ushanajurca.

Ñausa runatami Jericó pueblopi alichishca

(Mat. 20:29-34; Mar. 10:46-52)

35Jericó puebloman Jesús ña chayajujpica, shuj ñausa runami, ñambi mañashpa tiyajurca. 36Chai ñausa runaca, ashtaca gentecuna yalinajunda uyashpami, ima cajta tapurca.

37Chaimi, “Nazaret pueblomanda Jesusmari yalijun” ninajurca.

38Shina nijhuanmi:

“¡Ñaupa taita Davidpaj Churi Jesús, ñucataca llaquihuayari!” nishpa caparijurca.

39Chaimi, ñaupashpa rinajujcunaca:

“Ama chashna caparichu” nishpa jarcanajurca.

Ashtahuangarin paica:

“¡Ñaupa taita Davidpaj Churi Jesús, ñucataca llaquihuayari!” nishpami ashtahuan caparirca.

40Jesús shayarishpaca chai runata paipaj ñaupajman pushamuchunmi cacharca. Ña chayamujpica:

41“Canga, ¿imagutata rurachun munangui?” nishpami tapurca.

Shina tapujpimi paica:

“Ñuca ñavigu ricuchun alichihuai, Apunchi Jesús” nirca.

42Shina nijpimi Jesusca:

“Can mañashcataca chasquilla. Canga tucui shunguhuan crishcamandami, ña ali tucushcangui” nircami.

43Shina nijhuan paica ricushpami, Taita Diostaca ninanda alicachishpandi, Jesusta catishpa rirca. Shina alichijta ricushpami gentecunaca, Taita Diosta tucuilla alicachinajurca.

Currently Selected:

LUCAS 18: QVI16

Highlight

Copy