LUCAS 15

Chingashca llamagumanda yarichishpami yachachishca

(Mat. 18:10-14)

1Impuestota japijcunapash, juchayu gentecunapash, Jesús villajujta uyangapami, tucuicuna quimirinajurca. 2Chaita ricushpami, fariseocunapash, mandashca Shimita yachachijcunapash, na alicachishpa:

“Cai runaca, juchayu gentecunata chasquishpami, paicunahuan micushpa tiyajun” ninajurca.

3Shina ninajujpimi, cai yarichinacunahuan cashna yachachijurca:

4“Cangunapuramanda maijambash, patsaj llamacunata charijpi, shuj llamagu chingajpica, ¿nacha iscun chunga iscun llamacunataca, jichushca pambapillata saquishpa, chai chingashca llamagutara taringacaman mascangapa ringuichiman? 5Ña tarishpaca, ninanda cushijushpami, rigrapi churashpa apanguichiman. 6Ña huasiman chayashpaca cumbacunatapash, quimirialla causajcunatapash tandachishpami: ‘Shamupaichi cushijungapa. Chingashca llamagutaca ñami tariparcani’ ninman. 7Cangunataca cashnami nini: ‘Shuj juchayu Diospajman tigrarijpica, jahua pachapi causajcunami ninanda cushijunga. Alitalla rurashpa causaj cashcamanda, Diospajman tigrarinata na mascaj iscun chunga iscunmandapash yalitami cushijunga’ ninimi.

Chingashca culquihuan yarichishpami yachachishca

8Chunga Dracma culquita charijushpami, shuj huarmica shujguta chingachinman. Shina chingachishpaca, ¿nacha michata japichishpa, ucutapash fichashpa taringacaman ninanda mascanman? 9Ña tarishpaca cumbacunatapash, quimirialla causajcunatapash tandachishpami: ‘Shamupaichi cushijungapa. Chingashca dracma culquigutaca ñami tariparcani’ ninman. 10Cangunataca cashnami nini: ‘Ninanda llaquirishpa, Diospajman shuj juchayu tigrarijpica, Taita Diospaj angelcunapash ninandami cushijun’ ninimi” nishpami yachachirca.

Chingashca churimanda yarichishpami yachachishca

11Jesusca cashnatapashmi nirca:

“Shuj runagumi, ishcai churita charirca. 12Jipa churimi, paipaj taitataca cashna nirca: ‘Taiticu, ñucaman caranataca, cunanda ucha carahuai’ nircami. Shina nijpimi taitaca, imata charishcatapash chaupishpa cararca. 13Asha punlla jipami, chai jipa churica, paiman imata carashcata tucuilla jatushpa caru llactaman rirca. Chaipimi, tucui na alicunata rurashpa, pai ima charishcataca, yanga yanga tucuchirca. 14Pai tucui charishcata yanga tucuchishca jipami, chai llactamanga yarjai punllacuna chayarca. Chaipimi, paica imapash illaj purijurca. 15Paica, chai llactapi causaj shuj runapaj huasipimi mingarishpa causajurca. Chai runaca, paipaj alpapimi cuchicunata michishpa causachun cacharca. 16Paica yarjaimanda na ushashpami, cuchicunapaj micunatallapash micungapa munarca. Ashtahuangarin chaitallapash, pipash na cararcachu. 17Shina cashpami, paipaj shungupica cashna yajurca: ‘Ñuca taitapaj huasipi tucuita rurashpa causajcunaca, micunataca mashnatapashmi charin. ¡Ñucaca caipica, yarjaimandamari huañugrini!’ 18Cunanda jatarishpa, ñuca taitapajman tigrashpami, cashna nigrisha: ‘Taiticu, juchata rurashpamari jahua pacha Diostapash, candapash fiñachipashcani’ yajurca. 19Chashna cashpami, ‘ñuca churimi cangui’ nishpa chasqui tucunataca, na charipani. Cunanga, ‘cambajta ruraj cachun chasquihuayari’ nigrisha yajurcami. 20Shina yajushpami, paipaj taitapajman tigrajurca.

Paipaj taitaca caruta shamujujta ricushpallatami, shungu ucumanda ninanda llaquishpa, calpashpa tuparigrishpami, ugllarishpa muchajurca. 21Shina chasquijpimi churica, cashna nirca: ‘Taiticu, juchata rurashpamari jahua pacha Diostapash, candapash fiñachipashcani. Chaimi, ñuca churimi cangui nishpa chasqui tucunataca, na charipani’ nircami. 22Ashtahuangarin taitaca, paipajta rurajcunataca, cashnami nirca: ‘Juyailla ali churajunata llujchimushpa churachipaichi. Maquipipash surtijata churachipaichi, chaquipi churajunatapash churachipaichi. 23Racu shicuta apamushpa, huañuchipaichi. Cunanga, jatun micuihuan cushijuita rurapashunchi. 24Cai ñuca churiguca, huañushca cashpapash causaripashcami. Chingashca cashpapash cutinmi tagramupashca’ nishpami ninanda cushijunajurca.

25Shina cajpimi punda churica, pambapi imatapash rurashpa tigramujurca. Shamushpa ña huasiman chayamujushpaca, ninanda taquinajunda, tushunajundami uyarca. 26Shina uyashpami, shuj runata cayashpaca: ‘¿Imatata ruranajun?’ nishpa tapujurca. 27Shina tapujpica cashnami nirca: ‘Cambaj huauquimi tigramushca. Na imapash tucushpa, ali shamushca cajpimi, cambaj taitaca shuj racu shicuta huañuchigrichun mandarca’ nircami. 28Shina nijpimi, ninanda fiñarishpa huasiman yaicungapaca, na munarca. Shina cajpimi, taita llujshishpaca: ‘ucuman yaicupai’ nijurca. 29Ashtahuangarin chai churica, taitataca cashnami nirca: ‘Taiticu, ñucacarin tauca huatacunatami, cambajta rurashpa causajuni. Can imata mandajpipash, upallamanda rurajunillami. Shina rurajujpipash, ñuca cumbacunahuan cushijushpa micuchunga, shuj chivotallapash na carahuashcanguichu. 30Cai cambaj churica, culquimanda huainayaj huarmicunahuan purishpami, can imata charishcatapash tucuchishca. Chashna rurashpa tigramujpipash, racu shicutami huañuchigrichun mandashcangui’ nircami. 31Shina nijpimi taitaca, cashna nirca: ‘Ñuca churigu, can ñucahuan tiyajushcamandaca, ñuca imata charishcapash canbajllami. 32Ashtahuangarin, cai cambaj huauquiguca, huañushca cashpapash causaripashcami. Chingashca cashpapash cutin tigramupashcami. Shinamandami, jatun micuihuan cushijuita ruranajunchi’ nircami” nishpami yachachijurca.

Currently Selected:

LUCAS 15: QVI16

Highlight

Copy