GÉNESIS 7

Ninanda tamiashpa llaquichishcamanda

1Chai jipami Mandaj Diosca, Noé runataca cashna nirca:

“Cambash, tucui cambaj huasi ucupurapash, huambuna jatun huasiman yaicuichi. Cunan miraicunaca na alicunapachami. Candallami, Ñuca ñaupajpi alita rurashpa causajujtaca ricuni. 2Mapa illaj tucui animalcunamandaca, canchis jari, canchis huarmi tandachingui. Ashtahuangarin, mapa animalcunamandaca, shuj jari, shuj huarmi tandachingui. 3Shinallata, jahuata rij alasyu animalcunamandapash, canchis jari, canchis huarmi tandachingui. Ima animalcuna cashpapash, paipuralla mirashpa catichunmi, chashna tandachina cangui. 4Ña canchis punlla yalishca jipami, chuscu chunga punllata, chuscu chunga tutata, cai pachaman tamiachimusha. Chashna tamiachishpami, Ñuca rurashca, causaita charijcunataca, cai pachamanda tucuilla chingachisha” nircami. 5Shina nijpimi Noé runaca, Mandaj Dios imashna mandashcataca, tucuita pactachirca.

6Noé runaca, sucta patsaj huatata charijpimi, cai pachapica ninandapacha tamiashpa yacu jundarca. 7Chashna tamiashpa, yacu jundamuna cajpimi Noé runaca, paipaj churicunandi, paipaj huarmindi, paipaj churicunapaj huarmicunandi, huambuna jatun huasiman yaicurca. 8Mapa illaj tucui animalcunapash, mapa animalcunapash, alasyu animalcunapash, alpata llucashpa purij tucui animalcunapashmi, 9huambuna jatun huasiman Noé runahuan ishcai ishcai yaicunajurca. Taita Dios, Noé runata mandashcashnami, shuj jari, shuj huarmi yaicunajurca.

10Ña canchis punlla tucujpimi, ninandapacha tamiajpi, cai pachapica yacu jundarca. 11Noé runaca, sucta patsaj huatata charijpimi, chai huatapaj callari ishcai quilla, chunga canchis punllapica: Jatun manllanayai ucu yacu pugyucunapash tugyamushpa, jahua pacha yacucunapash urmamurca. 12Shinamandami, cai pachapica, chuscu chunga punlla, chuscu chunga tutata tamiajurca. 13Tamia callarijui chai punllallatami Noé runaca, paipaj huarmindi, Sem, Cam, Jafet shuti churicunandi, chai churicunapaj quimsandi huarmicunandi, huambuna jatun huasiman yaicurca. 14Paicunapash, tucui sacha animalcunapash, imashna cashpapash paipuralla, huasipi charina tucui animalcunapash, imashna cashpapash paipuralla, alpata llucashpa purij tucui animalcunapash, imashna cashpapash paipuralla, alasyu tucui animalcunapash, imashna cashpapash paipuralla, alasyu uchilla tucui animalcunapash, imashna cashpapash paipurallami yaicunajurca. 15Chaicunaca, huambuna jatun huasimanmi Noé runahuan shamunajurca. Causaita charij tucui animalcunami, ishcai ishcai shamunajurca. 16Chai animalcunaca, Taita Dios mandashcashnami, jaripash, huarmipash yaicunajurca. Chai jipami Mandaj Diosca punguta vicharca.

17Cai pachapica, chuscu chunga punllacunatami ninandapacha tamiajurca. Shina tamiashpami, yacucunaca ashtahuan jundashpa, huambuna jatun huasitaca vichai huandushpa, huambuchi callarirca. 18Yacucunaca ashtahuan vichai mirashpami, cai pachapi ashtahuan ninanda jundajurca. Shinamandami, huambuna jatun huasica, yacupi huambujurca. 19Yacucunaca, cai pachapi ashtahuan vichai mirashpa jundajpimi, cai pachapi tucui tiyashca jatun urcucunapash tucuilla pambarirca. 20Urcucunata quilpashca jipapash, yacucunaca, canchis metrota yalishpami, ashtahuan jundajurca. 21Chashnami, tucui cai pachapi causaita charij animalcunaca, alasyu animalcuna, huasipi charina animalcuna, sacha animalcuna, alpata llucashpa purij animalcunapash, tucui runacunapash huañurca. 22Cai pachapi, samaita charishpa causajcunapash, ima tiyashcacunapash tucuillami huañurca. 23Chashnami tucui cai pachapi causaita charijcunaca, gentemanda callarishpa, animalcunacaman, llucashpa purij animalcuna, jahuata rij alasyu animalcuna, tucuilla tucurirca. Shinami, cai alpamandaca, tucuilla tucuchi tucurca. Huambuna jatun huasipi, Noé runahuan tiyajcunallami quishpirishpa causaj saquirirca. 24Shinami, cai pachaca, patsaj picha chunga punllacaman, yacu jundashca saquirirca.

Currently Selected:

GÉNESIS 7: QVI16

Highlight

Copy