GÉNESIS 31

1Jacobca, Labanbaj churicuna, huasha parlajtami uyashca carca. Paicunaca: “Ñucanchi taitapaj ima tiyashcata, ñucanchi taita imata charishcatapash, pailla japishpami chashnapacha charijyashca” ninajushcami carca. 2Shinallata Jacobca, Labán runaca, ninanda fiñashpa, ña na pundashna paihuan ali cajtami ricujurca. 3Shinamandami, Mandaj Diosca, Jacobtaca cashna nirca: “Cambaj taitacuna, cambaj ayllucuna causanajuj llactaman tigrailla. Ñucami canhuan causajusha” nircami.

4Shina nijpimi Jacobca, Raqueltapash, Leatapash, pai maipi llamacunata michijuj pambaman pushamugrichun cacharca. 5Chaipimi cashna nirca:

“Cangunapaj taitaca, ña na pundashnalla aliman ricuhuanllu. Ashtahuangarin, ñuca taitapaj Taita Diosmi, ñucahuan causajushca. 6Cangunallata ña yachanguichimi, tucui shunguhuanmi, cangunapaj taitapajtaca rurashpa causashcani. 7Cangunapaj taitaca, imata rurashcamanda, cushapachami nishpapash, cutin cutinmi umachishpa, ñucaman cunataca na cuhuashca. Ashtahuangarin, Taita Diosca, cangunapaj taita, ñucata llaquichijuchunga na saquishcachu. 8Shinallata: ‘Tucui color llamacunatami, can rurashcamandaca japingui’ nijpipash, llamacunaca tucui colormi huacharirca. Shinallata: ‘Lishta llamacunatami, cambaj rurashcamandaca japingui’ nijpipash, llamacunaca lishtacunami huacharirca. 9Chashnami Taita Diosca, cangunapaj taitapaj animalcunata quichushpa, ñucaman carahuarca.

10Shinallata, jari llamacunataca, lishtacunatapash, tucui colorcunatapash, muru llamacunatapash muscuipishna vichai ricurcani. Chaicunami, huarmi llamacuna, ña chichu tucuna punllacunapica, puñunajujta ricurcani. 11Chai muscuipillatami, Taita Diospaj ángel rimashpaca: ‘Jacob’ nijpi: ‘Caipimi cani’ nircani. 12Shina nijpimi cashna nihuarca: ‘Cunanga, vichai ricui. Huarmi llamacunata puñunajuj, jari llamacunaca, lishtayu, tucui colorta charij, muru llamacunami. Labán runa, canda tucuita rurajtaca, Ñucami ricushcani. 13Ñucami Bet-el shuti pambapi canman ricurij Taita Dios cani. Chaipimi aceiteta rumipi talishpaca, ñucaman imatapash rurashpa pactachisha nihuarcangui. Cunanga, cai llactamanda llujshishpa, can huacharishca llactaman tigrailla’ nihuarcami” nijurcami.

14Shina nijpimi Raquelpash, Leapash cashna ninajurca:

“Ñucanchi taitamandaca ¿imatapash japinataca charinachu canchi? 15¿Nachu ñucanchi taitaca, istacunatashna ñucanchitaca ricujun? Ashtahuangarin, ñucanchimanda, tucui imata japishcatapash, ñami tucuchishca. 16Ñucanchi taita imatalla charishcata, Taita Dios quichushcacunaca, ñucanchipaj, ñucanchi huahuacunapajmi canga. Cunanga, Taita Dios canman imashna nishcata tucuita rurailla” ninajurcami.

Jacobca, Labanmanda pacajushpami rishca

17Shinamandami Jacobca, paipaj churicunatapash, paipaj huarmicunatapash pushashpa ringapa, camellocunapi tiyachirca. 18Shinallata, pai charishca tucuilla animalcunatapashmi apashpa ri callarirca. Padan-aram llactapi tucuita rurashpa causajpi cushca animalcunatapash apashpami, paipaj taita Isaac causajuj, Canaán llactaman tigrarca. 19Ashtahuangarin, Labán runaca, llamacunapaj milmata rutungapami rishca carca. Chaipimi Raquelca, paipaj taita charishca, rurashcalla dioscunata shuhuarca. 20Jacobca, arameopuramanda Labán shuti runamanga, na villashpami, pacalla llujshishpa rirca. 21Pai tucui ima charishcatapash apashpami, Éufrates jatun yacu rijujta chimbashpa, Galaad urcuman pacajushpa rijurca.

22Ña quimsa punlla jipami, Jacob pacalla rishcataca, Labán runaman villanajurca. 23Chaimandami Labán runaca, paipaj ayllucunata pushashpa, canchis punllacaman catishpa rishpaca, Galaad urcupi Jacobtaca japigrirca. 24Chai tutami Taita Diosca, arameopura Labán runaman muscuchishpaca: “Jacobtaca, ama imapash cachun rimashpa llaquichinguichu” nijurca.

25Jacobtaca, Galaad urcupi, carpacunata shayachishpa causajujtami, Labán runaca japigrirca. Chaipimi, paipash, paipaj ayllucunandi, carpacunata shayachishpa saquirirca. 26Chaipimi Labán runaca, Jacobtaca cashna nijurca:

“¿Imashpata cashnatapachaca rurashcangui? ¿Ñucata umashpachu, ñuca ushicunatapash, macanajuipi mishashpa prezu apajshna apamurcangui?. 27¿Imashpata, pacajushpa upalla shamurcangui? Can llujshimunata ñuca yachashpaca, jatun cushijuita rurashpami candashcacunahuan, tamborpi, arpapi taquishcacunahuan, cayacaman niman carcani. 28Ñuca huahuacunata, ñuca ushicunata, muchashpa cayacaman nijuchumbash, na saquishcanguichu. Cunanga, juizu illajshnami chashnaca rurashcangui. 29Chashna rurashcamanda, canda llaquichingapa ushaita charinimi. Ashtahuangarin, cunan tutami ñucataca, cambaj taita Isaacpaj, Taita Diosca: ‘Jacobtaca, ama imapash cachun rimashpa llaquichinguichu’ nihuarca. 30Cambaj taitapaj huasiman tigrana munaita charishpa, ña rijushpaca, ¿imapata ñuca dioscunata shuhuamurcangui?” nijurcami.

31Shina nijpimi Jacobca, Labán runataca cashna nijurca:

“Cambaj ushicunataca, quichuhuanguipacha yashpami manllarcani. 32Cambaj dioscunata, maijambash charijujta tarijpica, paica huañungami. Cambaj ima charishcata, ñuca apamushcata tarishpaca, tucuicunapaj ñaupajmanda apailla” nircami.

Jacobca, chai dioscunata, Raquel huarmi shuhuamushcataca na yacharcachu.

33Labán runaca, Jacobpaj carpaman, Lea shuti huarmipaj carpaman, paicunapajta ruraj ishcai huarmicunapaj carpaman yaicushpa mascashpapash, chai dioscunataca na tarircachu. Lea huarmipaj carpamanda llujshishpaca, Raquel huarmipaj carpamanmi yaicurca. 34Shina cajpimi, Raquel huarmica, chai shuhuashca rurashcalla dioscunataca, camelloman apachinapi churashpami, chai jahuapi tiyarirca. Shina cajpimi paipaj taita Labanga, tucui carpata mascashpapash, napacha tarirca. 35Shina mascajujpimi Raquel huarmica, paipaj taitataca cashna nirca:

“Ñuca taitalla, ama fiñahuanguichu. Cunanga ñucami, quilla nanai shamuna punlla pactashca cashpa, na jatari ushapani” nirca.

Labán runaca, chashna mascajushpapash, chai rurashcalla dioscunataca na tarircachu.

36Shina na tarijpimi Jacobca, Labandaca, ninandapacha fiñarishpa cashna nijurca:

“Ñuca ¿Ima na alitata rurarcani? Nina japirinshna fiñashpa, ñucata catishpa shamuchunga, ¿ima juchatata rurashcani? 37Ñuca tucui ima charishcapica, ñami mascashcangui. Imata tarishca cashpapash, ñuca ayllucunapaj ñaupajpi, cambaj ayllucunapaj ñaupapi churailla. Paicuna, ricushpami, imata cashpapash ninga. 38Ishcai chunga huatatami, cambaj huasipi causarcani. Llamacunata, chivocunata, ñuca michijujpica, na chullushcachu. Cambaj llamacunamandaca, shuj carnerotallapash na micushcanichu. 39Sacha animalcuna, cambaj llamata huañuchijpipash, chaitaca na apamushpami, shuj ali llamata canmanga cun carcani. Punlla cashpa, tuta cashpa, llamata shuhuajpica, ñucatami tigrachihuai nin carcangui. 40Punllapica, rupaihuanmi, llaquita apajuj carcani. Tutaca, chirihuanmi, puñuitapash na tarishpa, llaquita apajuj carcani. 41Chashnami, ishcai chunga huatata, cambaj huasipi causarcani. Chunga chuscu huatataca, cambaj ishcai ushicunamandami tucuita rurashpa causarcani. Sucta huatataca, cai tucui animalcunamandami rurajurcani. Cutin cutinmi, imatapash cushami nishpalla umahuarcangui. 42Ñuca taita Isaac manllashca Taita Dios, Abrahambaj Taita Dios, na ñucahuan cajpica, imapash illajtami calpachihuanguiman carca. Ashtahuangarin, ñuca maquihuan llaquinayaita rurashpa causajujta, Taita Dios ricushca cashpami, caina tutaca ñucamanda, canhuan rimashca” nircami.

43Shina nijpimi Labán runaca, Jacobtaca cashna nirca:

“Cai huarmicunaca, ñuca ushicunami, paicunapaj huahuacunapash, ñuca huahuacunami. Llamacunapash, ñuca llamacunami. Tucuita can ricujungui, chaicunaca ñucapajmi. Ñuca ushicunatapash, paicunapaj huahuacunapash, imata ruraitapash na ushanichu. 44Shamui, cunanga, canhuan, ñucahuan, ali tucunajushcata ricuchingapa, ari ninajushun” nircami.

45Shina nijpimi Jacobca, shuj jatun rumita marcashpa, chai rumita tucuicuna ricushpa yarichun, shayachishpa saquirca. 46Shina shayachishpami Jacobca, paipaj huasi ucupuracunataca:

“Rumicunata tandachipaichi” nirca.

Shina nijpi, rumicunata tandachishpa mundunashpaca, chai jahuapi tiyarishpami micunajurca.

47Chai rumi mundundaca, “Jerar Sahaduta” nishpami, Labán runaca shutichirca. Jacobca, “Galaad” shutitami shutichirca.

48Labán runaca:

“Cai rumi mundunmi, ñucanchi ali tucushcataca villajun” nishpami, chashna shutichirca.

Chaimandami chaitaca, “Galaad” shutita shutichirca. 49Shinallata, “Mizpa” shutitapash shutichishpami, Labán runaca cashna nirca:

“Ñucanchi shicanyarishpa, caruyarijpipash, ñucanchitaca, Mandaj Diosllata huacaichishpa charichun. 50Shinallata, ñuca ushicunata cazarashca jahua, shuj huarmicunata cazarashpara, ‘pipash na ricujunllu’ yashpa llaquichipanguiman. Chaitaca, Taita Diosmi tucuita ricujun” nishpami, chashna shutichirca.

51Labanga, Jacobtaca ashtahuan cashnatapashmi nirca:

“Cai rumi mundumbash, cai jatun rumipash, ñucanchi ali tucushpa, ari nirishcatami ricuchijun.

52Chashna cajpimi, cai rumi mundumbash, cai jatun rumipash, canda ñuca llaquichingapa na yalimui ushashcata ricuchinga. Shinallata, cambash, ñucata imatapash na alita rurashpa llaquichingapa, na ushanatami ricuchinga. 53Cambaj taita Abrahambaj, ñuca taita Nacorpaj, Taita Diosllata, ñucanchitaca ricuchun” nijurcami.

Shina nijpimi Jacobca, paipaj taita Isaac manllashpa causashca, Diospaj shutipi juramenturca. 54Chai jipami Jacobca, animalcunata sachapi huañuchishpa, paipaj huauquicunatapash cayashpa micunajurca. Shina micushca jipaca, chai tutaca, chai urcupillatami saquirishpa puñunajurca.

55Labanga, tutamandata jatarishpami, paipaj ushicunata, paicunapaj huahuacunata, muchashpa bendiciarca. Chai jipaca, paipaj llactaman tigrarcallami.

Currently Selected:

GÉNESIS 31: QVI16

Highlight

Copy