GÉNESIS 24

Abrahamga, Isaacman huarmita mascashcamanda

1Abrahamga ashtaca huatacunata charishpami ña rucugupacha carca. Mandaj Diosca, paitaca tucuipimi bendiciashca carca. 2Abrahamga, paipaj huasipi tucui tiyashcata ricushpa causaj, ashtahuan ruculla runatami cashna nirca:

“Cunanga, cambaj maquita ñuca cunguripi churai. 3Candaca, Mandaj Diospaj shutipimi juramentuchigrini. Paica, jahua pachatapash, cai pachatapash ruraj Taita Diosmi. Ñuca churipaj huarmi cachunga, cananeo gentecunapaj ushicunamandaca, napacha agllanachu cangui. Ñucaca, paicunapaj chaupipimi causajuni. 4Ashtahuangarin, ñuca llactaman, ñuca ayllupurapajman rishpami, ñuca churi Isaacpaj huarmi cachun mascamuna cangui” nircami.

5Shina nijpimi chai runaca cashna nirca:

“Imashpapash cuitsagu cai llactaman na ñucahuan shamungapa munajpica, ¿cambaj churitachu, can llujshimushca chai llactaman pushashpa tigrana cani?” nircami.

6Shina nijpimi Abrahamga cashna nirca:

“Ñuca churitaca, chaimanga napacha pushanachu cangui. 7Jahua pachata Mandaj Taita Diosmi, ñuca taitapaj huasimanda, ñuca ayllucunapaj llactamanda pushamuhuarca. Paica: ‘Cambaj miraicunamanmi, cai alpataca carasha’ nishpami juramenturca. Paillata, Paipaj angelta canhuan cachajpimi, ñuca churipaj huarmi cachunga, chai llactamanda pushamuna cangui. 8Cuitsagu na shamungapa munajpica, ñucahuan juramentushcapash, na pactashpa saquiringallami. Ñuca churitaca, amapacha chaiman pushapanguichu” nircami.

9Shina nijpimi chai runaca, paipaj mandaj Abrahambaj cunguripi maquita churashpa, chaitaca pactachipashami nishpa juramenturca. 10Chai jipaca paipaj mandajpaj, chungapura camellocunatapash, caranacunatapash agllashpa apashpami rirca. Ñanda japishpa rishpaca, Mesopotamia alpapi, Nacor shuti runa causajuj pueblomanmi chayagrirca. 11Chaipimi, camellocunataca, yacuta llujchingapa, pueblo canllaman rurashca utuju pushtupi samachirca. Ña chishimi carca, Chishipica, cuitsacunami yacuta llujchingapa chaiman rij carca. 12Chaipimi chai runaca, cashna nishpa Diosta mañajurca: “Ñucata mandaj Abrahambaj Mandaj Taita Dioslla. Cunanga, tucui imapash ali pactashca cachun nipanimi. Ñucata mandaj Abrahamda llaquishcamanda, chashna pactachipangui nipanimi. 13Ñucaca, yacu llujchina cai utuju pushtupimi capani. Cai pueblopi causanajuj runacunapaj ushicunaca, caimanda yacuta apangapami shamunajun. 14Ñucaca, maijan cuitsagutapash, cashnami nipasha: ‘Yacuta ñuca ufiachun, cambaj funduta uriajuchipai’ nishami. Shina nijpica: ‘Ufiapailla, shinallata cambaj camellocunapash ufiachun carapailla’ ningami. Chai cuitsagumi, cambajta ruraj Isaacpaj huarmi capanga. Chai pactajpimi, ñucata mandaj Ahrahamda, Can llaquishcataca ricupasha” nijurcami.

15Shina mañaitapash nara tucuchijpillatami: Betuel shuti runapaj ushi Rebeca cuitsaguca, paipaj rigrapi funduta churashca, ñapash llujshimurca. Betuel shuti runaca, Milca huarmipaj churimi carca. Milca huarmica, Abrahambaj huauqui Nacorpaj huarmimi carca. 16Chai cuitsaguca, maijan jarihuambash nara ima tucushca, juyaillagumi carca. Paimi yacu pugyuman urai shamushpa, fundupi yacuta apashpa tigragrijurca. 17Shina cajpimi chai runaca, paita catishpa:

“Cambaj fundumanda asha yacuguta ufiangapa carahuai” nirca.

18Shina nijpimi chai cuitsaguca:

“Ufiapai taitalla” nishpa, paipaj rigrapi apajushca funduta ucha uriajuchishpa, ufiachun curca.

19Yacuta ufiachun cushca jipaca:

“Shinallata cambaj camellocunapash ufiachun, yacuta llujchimushallami” nircami.

20Shina nishpaca, paipaj fundumanda yacuta pilun rumipi uchalla talishpami, chai utujumanda yacuta llujchingapa cutin calparca. Shina calpashpaca, chai runapaj camellocunamambashmi, yacuta llujchimurca. 21Chai runaca, cuitsagutaca cushijushpami upalla ricujurca. Mandaj Diosca, alipajchu, na alipajchu pushamuhuashca yashpa yachangapami chashna ricujurca. 22Camellocuna yacuta ufiaita tucuchijpica, sucta gramota charij curi surtijata, patsaj chunga chuscu gramota charij, churajuna ishcai brazaletetapashmi cuitsagumanga cararca. 23Shinallata cashnami nirca:

“¿Pipaj ushiguta capangui? Cambaj taitapaj huasipi, ¿nachu ñucanchita mingachi ushapanman?” nircami.

24Shina nijpimi chai cuitsaguca:

“Betuelpaj ushimi cani, ñuca taitapaj taitaca Nacormi, paipaj huarmica Milcami” nijurca.

25Paica cashnatapashmi nirca:

“Ñucanchi huasipica ujshapash, ashtaca jihuapash, maipi puñungapapash tiyanmi” nirca.

26Shina nijpimi, chai runaca cumurishpa, Mandaj Diosta ninanda alicachijurca. 27Shinallata, cashna nishpami Diosta mañajurca: “Ñucata mandaj Abrahambaj Mandaj Taita Dioslla, Canga ninanda alicachi tucushcami capangui. Ñucata mandajtaca, ninanda juyashpami, alicunata cushpa charipangui. Ñucata mandaj Abrahambaj ayllucunapaj huasiman pushamushpami, chaitaca ricuchihuashcangui” nircami.

28Shina nijujpimi, chai cuitsaguca, paipaj mamaman villangapa calparca. 29Rebeca cuitsaguca, Labán shuti turitami charirca. Paimi, yacu pugyupi shayajuj runapajman ucha calpashpa rijurca. 30Paipaj panica, surtijata, brazaletecunata churajushcata ricushpa, shinallata, chai runa imatalla nishcata villajpimi, chai runata ricungapa rijurca. Chai runaca, camellocunandimi yacu pugyu pushtupi shuyajushca carca. 31Shina cajpimi Labán runaca, cashna nirca:

“Mandaj Dios bendiciashca runagu, shamupailla. ¿Imashpata canllapi shayajungui? Huasipipash ñami tucuita alichishcani. Camellocuna samachumbash alichishcallami” nircami.

32Shina nijpimi chai runaca, huasiman catishpa rirca. Laban runaca, camellocunapi apachishcacunata uriajuchishpami, ujshata, jihuata cararca. Chai runapash, paihuan shamushca runacunapash chaquicunata maillachunmi, yacuta curca.

33Ashtahuangarin paicunapaj ñaupajpi micunata churajpimi, chai runaca:

“Villachun mingashpa cachamushcata nara villashpaca, na micupashachu” nircami.

Shina nijpimi Labán runaca:

“Imata nina cashpapash ucha nipailla” nirca.

34Shina nijpimi paica, cashna nijurca:

“Ñucami, Abrahambajta ruraj capani. 35Mandaj Diosca, ñucata mandajtaca ninandapachami bendiciashca. Chaimandami, paica ninan charijpacha tucushca. Paimanga, llamacunata, huagracunata, culquita, curita, gañan jaricunata, gañan huarmicunata, camellocunata, burrucunatami carashca. 36Ñucata mandajpaj huarmi Sarapash, payagu cashpapash, ñucata mandajhuanmi shuj jari huahuaguta charishca. Tucui imata charishcatapash, chai churimanmi carashca. 37Ñucata mandajmi, cashna nishpa juramentuchihuarca: ‘Ñuca churipaj huarmi cachunga, ama cananeo gentecunapaj ushicunamanda mascanguichu. Ñucaca, paicunapaj llactapimi causajuni. 38Ashtahuangarin, ñuca taitapaj huasi ucupurapajman, ñuca ayllupajman rishpa, ñuca churipaj huarmi cachunga mascangui’ nishpami juramentuchihuarca” nihuarca. 39Shina nijpimi: “Cuitsaguca, ñucata catimungapaca napash munangachu” nircani. 40Shina nijpimi Abrahamga, cashna nihuarca: “Mandaj Diosta cazushpami causajuni. Paipaj angelta canhuan cachajpimi, can maita rijujpipash tucuipi ali pushanga. Shinamandami, ñuca churipaj huarmi cachunga, ñuca ayllumanda, ñuca taitapaj huasi ucupuramanda mascagrina cangui. 41Ñuca ayllupajman chayagrijpica, chai juramentushcapash na pactashpa saquiringallami. Imashpapash, cuitsaguta na cachamujpica, chai juramentushcapash na pactashpa saquiringallami” nihuarcami.

42Shinamandami, pugyuman cunan chayashpaca cashna nishpa Diosta mañajurcani: “Ñucata mandaj Abrahamda Mandaj Taita Dioslla, Cambaj munai cajpica, cunan ñuca caiman shamushcapash, tucui ali llujshishca cashpami ali capanman. 43Ñucaca, cai yacu pugyupimi capani. Yacuta apangapa shamuj maijan cuitsaguta cashpapash: ‘Cambaj fundumanda asha yacuguta, ñuca ufiangapa carahuai nipanimi’ nishami. 44Shina nijpimi: ‘Ufiailla, shinallata cambaj camellocunamambash, yacuta llujchishallami’ nishpa tigrachihuanga. Shina nishpa tigrachij cuitsagumi ñucata mandajpaj churiman, Mandaj Dios ricuchishca huarmi capanga” nijurcanimi. 45Shina nishpa, ñuca shungupi rimaita nara tucuchijpillatami Rebeca cuitsaguca, paipaj rigrapi funduta churashca, ñapash llujshimurca. Pugyuman urai shamushpa, yacuta llujchimujpimi paitaca: “Yacuta ufiangapa ñucaman carahuai nipanimi” nircani. 46Shina nijpica, paipaj funduta, paipaj rigramanda ucha uriajuchishpami: “Ufiapailla, shinallata cambaj camellocunamambash, yacuta ufiachishallami” nishpa carajpi ufiarcani. Shinallata ñuca camellocunamambashmi, yacuta ufiachirca. 47Shina ufiachijpimi paitaca: “¿Pipaj ushiguta capangui?” nishpa tapurcani. Shina tapujpimi paica: “Betuel runapaj ushimi capani. Ñuca taitapaj taitaca Nacormi, paipaj huarmica Milcami” nihuarca. Shina nijpimi, surtijataca paipaj singapi, brazaletecunataca paipaj rigrapi churachircani. 48Chai jipami cumurishpa, Mandaj Diostaca ninanda alicachircani. Ñucata mandaj Abrahambaj Mandaj Taita Diostaca, na pandana ñanda pushamushcamandami ninanda alicachijurcani nijurcani. Paimi, ñucata mandaj Abrahambaj churipaj huarmi cachunga, ñucata mandajpaj huasi ucupura ushigupajman pushamuhuashca. 49Cunanga, “ñucata mandajta llaquishpa, na llullashpa pactachina cashpaca villahuaichilla. Na nina cashpapash villahuaichilla. Ñuca imata rurana cashpapash ricupashallami” nijurcami.

50Shina nijpimi Labán shuti, Betuel shuti runacunapash cashna ninajurca:

“Mandaj Diospaj munaimandami, cashna tucupashca. Chaimandami na alichu nitapash, alimi nitapash na ushapanchi. 51Rebeca cuitsaguca, cambaj ñaupajpimi. Paitaca, canda mandajpaj churipaj huarmi cachun Mandaj Dios nishcashna pushashpa ripailla” ninajurcami.

52Abraham cachashca runaca, chashna nijta uyashpami, Mandaj Diospaj ñaupajpi cungurishpa, alpaman chayajta cumurishpa, ninanda alicachijurca. 53Chai runaca culquita, curihuan juyailla rurashcacunata, churajunacunatapash llujchishpami, Rebecaman cararca. Shinallata, ashtahuan shuj juyaillacunatapashmi, paipaj turimambash, paipaj mamamambash cararca. 54Abrahambajta ruraj runaca, paihuan shamushca runacunandimi, micushpa, ufiashpa, chai tutaca pacarinajurca. Paicunaca tutamandata jatarishpami:

“Ñucata mandaj Abrahambajman ripanchillami” ninajurca.

55Shina nijpimi, cuitsapaj turipash, paipaj mamapash:

“Cuitsaguca, chunga punllatallapash ñucanchihuan shuyapangarami. Chai jipami ripanga” ninajurca.

56Shina nijpimi chai runaca:

“Mandaj Diosca, ñucataca tucuipimi ali pushamuhuashca, cunanga richun saquihuaichilla. Ñucata mandajpajman ucha ripashallami” nirca.

57Shina nijpimi paicunaca:

“Cuitsaguta cayashpa tapushunchi” ninajurca.

58Rebecata cayashpaca:

“¿Canga, cai runahuan ringuillachu?” nijpimi paica:

“Ari, rishallami” nirca.

59Shina nijpimi paipaj pani Rebecataca, paita viñachij mamandi, Abraham cachashca runandi, caishuj runacunandi richun saquinajurca. 60Rebecataca, cashna nishpa bendiciashpami cachanajurca:

“Ñucanchi panigulla,

Canga, huaranga huarangacunapaj mamami tucungui.

Canmanda miraicunaca, paicunata fiñajcunapaj pueblocunatami quichushpa japinajunga” ninajurcami.

61Shina nishca jipami, Rebeca cuitsaguca, paipajta ruraj cuitsacunandi, camellocunapi tiyarishpa, chai runata catishpa rinajurca. Shinami chai runaca, Rebecata pushashpa rinajurca.

62Isaac runaca: “Ñucata ricujuj Diospaj yacuta llujchina jatun utuju” shuti pushtumandami, pai causajushca Neguev pambacunaman tigrajurca. 63Isaac runaca ña chishipimi, samashpandi purijungapa pambaman llujshishca carca. Pai shamujushpa vichai ricushpaca, camellocuna shamunajujtami ricurca. 64Rebecapash vichai ricushpa, Isaacta ricushpami, camellomanda uriajurca. 65Paica, Abraham cachashca runataca:

“¿Pambata ñucanchipajman shamujuj chai runaca, pita?” nishpami tapurca.

Shina tapujpimi, Abrahambajta ruraj runaca:

“Paica, ñucata mandajmi” nirca.

Shina nijpimi paica, ñavita quilparina telata japishpa, quilparijurca.

66Chai jipami Abrahambajta ruraj runaca, pai tucui imatalla rurashcata Isaacman villajurca. 67Shina cajpimi Isaac runaca, paipaj mama Sarapaj carpaman, Rebecataca pushamurca. Shina pushamushpami, Rebecahuan cazarashpa, ninanda juyashpa charirca. Chashnami Isaac runaca, paipaj mama huañushcamanda llaqui cashpapash, cushijuita japirca.

Currently Selected:

GÉNESIS 24: QVI16

Highlight

Copy