GÉNESIS 16
16
Agarmandapash, Ismaelmandapash
1Abrambaj huarmi Saraica, huahuacunata na chari ushajchu carca. Paipajta ruraj huarmica, Egipto llactamanda Agar shuti huarmimi carca. 2Chaimandami Sarai huarmica, Abramdaca cashna nirca:
“Mandaj Diosllatami ñucataca, huahuata na chari ushaj huarmita rurahuashca. Chaitaca canllata ricunguimi. Chaimandami candaca, ñucapajta ruraj huarmihuan huahuata charipai nipani. Paimandarapash, huahuacunata charishapashchari” nircami.
Shina nijpimi Abramga, paipaj huarmi ima nishcata pactachirca. 3Abrambaj huarmi Saraica, Egiptomanda Agar huarmitami, paipaj cusaman curca. Paicunaca, ña chunga huatata Canaán llactapi causanajushpami, chashna tucurca. 4Agar huarmica, Abrambaj huahuatami vijsayu tucurca. Shina vijsayu tucushpami, paita mandaj Sarai huarmitaca, yangapi churai callarirca. 5Chaimandami Sarai huarmica, Abramdaca cashna nirca:
“Canmandami ñucaca na alicachi tucujuni. Ñucallatami Agar huarmitaca canman curcani. Paica vijsayu cashpami, ñucataca yangapi churashpa ricujuhuan. Candapash, ñucatapash, Mandaj Diosllatami imata rurana cashpapash ricunga” nircami.
6Shina nijpimi Abramga, Saraitaca cashna nirca:
“Ricui, cambajta ruraj huarmica, cambaj maquipimi. Cambaj ima ali cana cajpipash, can ricushpa imatapash rurailla” nircami.
Agar huarmica, Sarai huarmi ninanda llaquichi callarijpimi, paipaj ñaupajmanda pacajushpa rirca. 7Shina rijujpimi Mandaj Diospaj angelca, jichushca pambapi tiyajuj pugyupi, Shur shuti pushtuman rina ñambi tuparirca.
8Shina tuparishpami:
“Saraipajta ruraj Agar, ¿maimandata canga shamujungui, maimanda rijungui?” nirca.
Shina nijpimi chai huarmica:
“Ñucata mandaj Sarai huarmipaj ñaupajmandami pacajushpa rijuni” nirca.
9Shina nijpimi Mandaj Diospaj angelca:
“Canda mandaj Sarai huarmipajman tigrailla. Imata mandajpipash, paita cazunguilla” nirca.
10Mandaj Diospaj angelca, cashnatapashmi nirca:
“Cambaj miraicunataca, ninandapachami mirachisha. Chashna ninandapacha mirashcamandami, yupaitapash na ushanalla canga” nircami. 11Mandaj Diospaj angelca, ashtahuan cashnatapashmi nircami: “Cunanga vijsayu tucushca cashpami, jari huahuata charigringui. Chai huahuataca, cambaj llaquita Mandaj Dios uyashca cajpimi, Ismael shutita shutichingui. 12Paica, ninan millai runami canga. Paica tucuicunahuanmi fiñajunga, shinallata, tucuicunami paitaca fiñanga. Tucuilla paipaj huauquicunahuanmi fiñanajushpa causanga” nircami.
13Chaimandami Agar huarmica, paihuan rimaj Mandaj Diostaca: “Canga, ricujuj Taita Diosmi cangui” nishpa shutichirca. Paica: “¿Nachu ñucapash, ñucata caipi ricujuj Diostaca ricurcani?” nircami. 14Chaimandami, yacuta llujchingapa allashca jatun utujutaca: “Ñucata ricujuj Diospaj yacuta llujchina jatun utuju” nishpa shutichirca. Chaica Cades shuti, Bered shuti pueblocunapaj chaupipimi tiyajun.
15Agar huarmica, Abrambaj huahuatami charirca. Abramga, Agar huarmihuan charishca huahuataca, Ismael shutitami shutichirca. 16Abramga, pusaj chunga sucta huatata charijpimi, Agar huarmica Ismael shuti, chai huahuataca charirca.
Currently Selected:
GÉNESIS 16: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
