GÉNESIS 12

Taita Dios, Abramda cayashcamanda

1Ashtahuangarin Mandaj Diosca, Abramdaca cashnami nishca carca: “Cambaj llactata, cambaj ayllupurata, cambaj taitapaj huasi ucupurata saquishpa, Ñuca carasha nishca llactaman rilla. 2Chaipimi cambaj miraicunaca, shuj jatun llacta tucunga. Candaca bendiciashpami, cambaj shutitapash jatumbi churasha. Shinallata, canmandami tucuicuna bendiciai tucunga. 3Canda bendiciajcunataca, Ñucapashmi bendiciasha. Canda: 'Ima llaquipash japichun' nijcunataca, Ñucapashmi llaquichisha'. Canmandami, cai pachapi causanajuj tucui ayllucunaca bendiciai tucunga” nircami.

4Shina nijpimi Abramga, Mandaj Dios imashna mandashcashna, Harán shuti pueblomanda llujshishpa rirca. Lotpashmi, paihuan rirca. Harán shuti pueblomanda llujshishpa rijushpaca, canchis chunga picha huatatami Abramga charirca. 5Abramga, paipaj huarmi Saraitapash, paipaj huauquipaj churi Lottapashmi pushashpa rirca. Shinallata, pai imatalla rurashpa, tucui charishcacunatapash apashpa, Harán shuti pueblopi randishca runacunatapash pushashpami, Canaán llactaman ri callarirca. Shinami paicunaca, Canaán llactaman chayagrirca. 6Abrahamga, chai llactata yalishpa rijushpami, Siquem shuti puebloman, More shuti encina quiru shayajuj pushtucaman chayarca. Chai llactapica, Canaán llacta gentecunami causanajushca. 7Mandaj Diosca, Abramman ricurishpami: “Cambaj mirai huahuacunamanmi, cai llactataca carasha” nirca.

Chaipimi, paipaj ñavipi ricurishca Mandaj Diosmanga, shuj altarta rurarca. 8Chaimandaca, Bet-el pueblomanda indi llujshimujman tiyajuj urcuman rishpami, pai causana carpata shayachirca. Bet-el shuti puebloca, indi huashajunman, Hai shuti puebloca, indi llujshimujmanmi carca. Chaipimi, Mandaj Diosman altarta rurashpa, Mandaj Diosta jatunyachijurca. 9Chaimandapash purishpa rijushpami Abramga, Neguev shuti pambacunaman chayagrirca.

Abram, Egiptoman rishcamanda

10Canaán llactapica ninan yarjai tiyajpimi, Abramga, Egipto llactapi causangapa urai rirca. Chai llactapica, micuna illashpa ninan yarjai tiyashcamandami chaiman rirca. 11Egiptoman ña yaicunajushpami Abramga, paipaj huarmi Saraitaca, cashnami nirca: “Canga juyailla huarmigumari cangui. 12Egiptopi causaj runacuna canda ricushpaca: ‘Chai runapaj huarmimari cashca’ nishpami, ñucataca huañuchishpa, candaca causajta saquinga. 13Chaimandami cunanga, ñucapaj panimi cani nina cangui. Shina nijpimi ñucataca na huañuchishpa, ashtahuangarin ali chasquihuanga” nijurca.

14Egiptoman Abram yaicujpica, chaipi causaj runacunaca, chai huarmitaca ninan juyaillagu cajtami ricunajurca. 15Shinallata, Faraonbaj cati mandajcuna Sarai juyaillagu cajta ricushpami, Faraonbaj ñaupajpillata ninanda alicachinajurca. Shina cashcamandami, Sarai huarmitaca, Faraonbaj huasiman pusharca.

16Faraonga, Sarai huarmimandami, Abramdaca aliguta chasquirca. Shinamandami, llamacunata, huagracunata, burrucunata, huarmi burrucunata, camellocunata paimanga cararca. Paipajta ruraj jaricunata, huarmicunatapashmi curca. 17Ashtahuangarin Mandaj Diosca, Abrampaj huarmita Faraón chashna rurashcataca napacha chasquishpami, Faraondapash, paipaj huasi ucupuracunandi, millai ungüicunata cachamushpa ninanda llaquichirca. 18Chaimandami Faraonga, Abramda cayashpa cashna nirca: “¿Imashpata canga, ñucataca chashna llaquichihuashcangui? ¿Imashpata cambaj huarmi cajtaca, na villahuarcangui? 19¿Imashpata: ‘Ñuca panimi’ nihuarcangui? Ñuca huarmi cachun paihuan pacta puñushpaca, na alitapachami ruraiman carcani. Cunanga cambaj huarmita pushashpa, caimanda uchashpa rilla” nircami. 20Shinamandami Faraonga, Abramdapash, paipaj huarmitapash, tucui imatalla charishcacunandi apashpa, ñambi yalichigrichun paipajta rurancunata mandashpa cacharca.

Currently Selected:

GÉNESIS 12: QVI16

Highlight

Copy