HECHOS 3

Suchu runata alichishcatami villajun

1Quimsa pacha chishipi, Diosta mañana cashcamandami, Pedropash, Juanbash, Diospaj huasiman vichai rinajurca. 2Chaimanmi, huacharishca punllamandapacha suchu causaj runaguta apamushpa: “Juyailla pungu” nishca quimiriapi punllandi tiyachinajun carca. Paitaca, Diospaj huasiman yaicujcunata mañashpa tiyajuchunmi chaipi tiyachin carca. 3Diospaj huasiman Pedrondi, Juandi yaicunajunda ricushpami, chai runaca: “imagutallapash carahuaichi” nishpa mañarca. 4Shina mañajpimi Pedropash, Juanbash paita ricushpaca:

“Ñucanchita ricui” nirca.

5Shina nijpimi: “Imagutapash carajpi japishami” yashpa, paicunata ricuriajurca. 6Ashtahuangarin Pedroca, cashnami nirca:

“Culquitapash, curitapash na charinichu. Ashtahuangarin, ñuca imaguta charishcatallami canman cugrini nishpaca: ‘Nazaret pueblomanda Jesucristopaj shutipi, cunanga jatarishpa rilla’ ninimi” nirca.

7Shina nishpa, chai runapaj ali maquimanda aisashpa jatarichijpimi, chaqui tullucunaca shinlliyarca. 8Paica fahuashpa shayarishpami, puri callarirca. Paicunahuan rijushpaca, cushijuihuan fahuashpa, Diospaj huasiman yaicushpami, Taita Diostaca alicachijurca. 9Tucui gentecunami, pai purishpa Taita Diosta alicachijujtaca ricunajurca. 10Diospaj huasiman yaicuna: “Juyailla pungu” nishca quimiriapi mañashpa tiyajtaca, tucuicunami rijsij carca. Chai runa ali tucushcata ricushpaca, ninandapachami manllarinajurca.

Salomón rurashca pungupi, Pedro villajushcamanda

11Ali tucushca chai runaca, Pedrotapash, Juandapash na saquishpami catiriyajurca. Shinamandami, tucuicuna ninanda manllarishpa, Salomón rurashca corredorpi tandanajurca. 12Chaita ricushpami Pedroca, tucuicunata cashna nirca: “Israel runacuna, ¿imashpata caita rurashcamandaca manllaringuichi? ¿Imashpata ñucanchitalla ricunajunguichi? ¿Ñucanchi ushaihuan, ñucanchi juyaihuanmi cai runataca purichishca yashpachu ricunajunguichi? 13Ashtahuangarin ñucanchi ñaupa taita Abrahambaj, Isaacpaj, Jacobpaj Taita Diosmi, Paipaj Churi Jesustaca chashna ninan ushaita charichun jatunyachirca. Cangunami, Paitaca mandajcunapaj ñaupajman aparcanguichi. Pilato cacharingapa munajpipash, cangunaca: ‘Ama cacharichu’ nircanguichimi. 14Ashtahuangarin, Jucha illaj, alitalla Rurajtaca na cacharichun munashpami, huañuchij runatara cacharichun mañarcanguichi. 15Chashna rurashpami, Causaita caraj Jesustaca, huañuchi tucuchun saquircanguichi. Ashtahuangarin Paitaca, Taita Diosmi huañushcacunapaj chaupimanda causachirca. Ñucanchica, chaita ricushcata villajcunami canchi. 16Jesuspaj shutipi crijpimi, canguna ricushpa, ña rijsishca cai runataca alichirca. Jesusta crishcamandami, cunanga cangunapaj ñaupajpi ali tucushca shayajun.

17Huauquicuna, ashtahuangarin cunanga, cangunapash, cangunata mandajcunapash, na yachaimandami chashnapacha na alitaca rurarcanguichi. 18Tucui profetacunami: ‘Cristoca, ninan llaquicunatami apanga’ nishpa villanajushca carca. Chai villanajushcatami Taita Diosca pactachirca. 19Shina cashcamandami, cangunapaj juchacunata saquishpa Diospajman tigrarina canguichi, chashna rurajpimi, cangunapaj juchacunataca anchuchinga. Cushijushpa causanata Jatun Dios carachunmi chashna rurana canguichi. 20Pundallata cangunaman, cachamusha nishpa villashca Jesucristo mandachunga, Paillatami cachamunga. 21Ima tiyashcatapash tucuita mushujman tigrachina punllacamanmi Jesusca jahua pachapi tiyajunga. ‘Chashnami canga’ nishpami, Taita Dios cachamushca jucha illaj profetacunaca ña pundallata villanajushca carca. 22Moisesllatami, ñucanchi ñaupaj taitacunataca cashna nijushca: ‘Cangunata Mandaj Jatun Diosca, ñucashnalla shuj profetatami, cangunapuramanda cachamunga. Pai ima nishcatami, tucuita cazuna canguichi. 23Chai profeta villajujta maijambash na cazujpica, Israelpuramanda llujchishpami cachanga’ nishcami.

24Shinallata, Samuelmanda callarishpaca, tucuilla profetacunami, cai punllacunapi ima tucunatapash ña villashpa shamunajushca. 25Cangunaca, profetacunapaj mirai huahuacunami canguichi. Shinallata: ‘Cambaj mirai huahuacunamandami, cai pachapi causanajuj gentecunaca, tucui bendicionda japinajunga’ nishpa, Taita Dioshuan Abrahamhuan, ari ninajushcatapash japinacunami canguichi. 26Taita Diosca, huañushcacunapaj chaupimanda, Paipaj Churita causachishpami, cangunatara punda bendiciachun cachamurca. Tucuicuna na ali causaita saquishpa, Diospajman tigrarichunmi, chashna cachamurca” nijurcami.

Currently Selected:

HECHOS 3: QVI16

Highlight

Copy