MAT 5
5
Kulci kǝ Yesu den tlǝndǝre
1Nan Yesu shin mbarǝm dom wur na womtiwo, arni tǝ to gǝs den gam tlǝndǝre. Nan tǝ dǝmo, arni mir mǝn kulci kar ti to kar ti. 2Arni tǝ ɓul bi tǝ kulci wuri.
Albarka
3<< Mǝn ghol mbatl ni'e munju kan mom na ɗattǝn gǝzǝn gip ruhu gwa.
Mulki kǝ Yamo gwazin ni.
4Mǝn ghol mbatl ni'e munju ra na dun mbatl gwa.
Yam ba iɗa'i wur mbatli.
5Mǝn ghol mbatl ni'e munju kan pali gam gǝzǝnka atli gwa.
Atl kundǝrǝndlip baa dǝm gwazini.
6Mǝn ghol mbatl ni'e munju ba kum guzum na lam pi argon tu kan dlat ni ar ra gwa.
Yam ba laa'i wur tu na argon tu wu ndu gwa.
7Mǝn ghol mbatl ni'e munju ra na guna ger gwa.
Yam ba kum guna gǝzǝni.
8Mǝn ghol mbatl ni'e munju mbatl gǝzǝn ra ngǝlan gwa.
Wi shin Yami.
9Mǝn ghol mbatl ni'e mǝn sitin gip dlom kǝ ɗiri dǝmi zhǝlili.
Baa la wur bi mimir kǝ Yami.
10Mǝn ghol mbatl ni'e munju kan ba kumi wur dli den bi pitǝn dlat gwa.
Mulki kǝ Yamo gwazin ni.
11Kǝn mǝn ghol mbatl ni wokoci tu mbarǝm ba zage ine, wu kumi in dli, wu pa ne in ko gonge ɗasi tu te gamka den kǝn mǝn kopi gǝn ni gwa. 12Untuni wu kumi dli ga mǝn yari shirǝm kǝ Yam munju kan ra kapǝn kǝn gwa. Gyatl ni kǝ pini ghol mbatl na naari, domici argon tu Yam baa bi in to yamkawo ar naari. Untuni wu kumi dli ga mǝn yari shirǝm kǝ Yam munju kan ra kapǝn kǝn gwa.
Kulci den Mas na cirtǝni
13<<Kǝn nǝra wule mas gip duniya. Mas ni julkawo, na unun ba pali tǝmtǝn gǝs we? Ar ina mbap kǝ pi da'a, se dǝ shotika, dǝ mbarǝm desika.
14<<Kǝn nǝra wule cirtǝn kar mbarǝm den kaar atli. Bǝn tu kan tu to den tudu kawo, ba mani ghundǝr gǝska da'a. 15Ba ɓatl masǝɓi gip pitila kan dǝ zupka na bar gal da'a. Ama ba ne ti den ba dǝmi gǝsi, kan ar bi mbarǝm kǝ bomi kup cirtǝni. 16Untu ma, za ni dǝ cirtǝn gin cir cina dǝ mbarǝme, kǝ dǝ wu shin mbuni mbap gin ra, arni wi ɗǝɗa Ba gin kǝ to yamka.
Kulci den kulci kǝ Musa
17<<Ba kǝ pǝn ni den a sur ni kǝ dǝ a pa'ika na kulci kǝ Musa, ko rǝshi kǝ ga mǝn yari shirǝm kǝ Yam da'a. A sur ni kǝ dǝ a pa'ika nan wur da'a, ama kǝ dǝ a laa'i wur ni. 18Ge shirǝm ni a yari in'e, yam na atl baa paka, ama ko nya njem ko ɗigo gon ra da'a gip Kulci kǝ Musa kan ba pa'ika nari kapǝn dǝ ko unu pi kandatu Kulciyi'e wule ar baa pi gwa. 19Ra'untuwo, kup muntu kan cen nǝm gip Kulci ju kan tǝ pa kulci jen wu cen Kulciyi ka pa'o, baa wul ti'e heli gip mulki kǝ Yami. Ngapo, kup muntu kan kop Kulciyi kan tǝ kulci jeno, baa wul ti'e mǝn nartǝn gip mulki kǝ Yami. 20A yari in'e, pitǝn dlat gin ni man kǝ me gam kǝ Parise na mǝn kulci den Kulci kǝ Musa dawo, ki te gip mulki kǝ Yam da'a.
Kulci kǝ Yesu den pi lo'e
21<<Kǝ kum yari ga kori gǝmi terka'e, <Ba kǝ rini gon eka da'a. Muntu ri gon ekawo, ba hukunte ti.> 22Ama a yari ine, kup muntu ba pi lo na esi ma, baa hukunte ti. Muntu es wul esi'e wop mbarǝmo, baa ri ti cina dǝ mǝn tloyi shirǝmi. Eso, muntu wul esi'e kǝdlǝmo, tǝ ndar tetǝn gip utu.
23Ra untuwo, kini den bi Yam bar den bagadi sadakawo, kan kǝ dam ki den gon ra nan ki su mbatlkawo, 24za ari bi bagadiyi kakani, kǝ ri kǝrkǝm dlom gin na ya'iyi, kan kǝ'i bi Yam bar giyi.
25<<Zho'i kǝ ci atl gam na muntu kan ra na shirǝm den ki gwa, kapǝn dǝ ri'i cina dǝ mǝn tloyi shirǝmi. Kini kǝ pi untu dawo, ti la ki am dǝ mǝn tloyi shirǝmi, kan dǝ mǝn tloyi shirǝm byal ki am dǝ dogari, kan dǝ la ki gip bom kǝ moni. 26Ge shirǝm ni a yari'i, ki ɗǝl gip bom kǝ moniyi da'a, se kini kǝ batl argon tu kup ba kop ki gwa.
Kulci kǝ Yesu den muri na mǝtli ko moni kaari
27<<Kǝ kum yari in'e, <Ba kǝ mur ni na mǝtli ko moni kaari da'a.> 28Ama a yari ine, muntu kup shin gǝr mǝtli, shintǝn kǝ ndutǝn kǝ ci mbatlo, ya mur nan ti gip mbatl gǝs ituwi. 29Ger gǝ kǝ shimli ni ba kem ki kǝ pi warwat pitǝno, ɗǝli kǝ laka. Ar ba mani'i dǝ kǝti kǝ dli gi gon liika, na dǝ la dli gi kup te gip utuka. 30Am gi kǝ shimli ni ba kem ki kǝ pi warwat pitǝno, tlo kǝ laka. Ar ba mani'i dǝ kǝti kǝ dli gi gon liika, na dǝ la dli gi kup te gip utuka.
Kulci kǝ Yesu den kari gǝrka
31<<Yari es'e, <Kup muntu baa kar gǝr gǝskawo, ar nǝm tǝ bi gǝri tǝlankur kǝ kartǝnka.> 32Ama argon tu a yari ino arni'e, muntu kup kar gǝr gǝska, ba'e den tǝp kǝ muri na moni kari ni dawo, tǝ kem ti kǝ muri na moni kaari ituwi. Muntu kup gudlumi na gǝr tu kan karkawo, tǝ dǝm mǝn muri na mǝtli kaari ituwi.
Kulci den ɓe am atli
33<<Kǝ kum yari ga kori gǝmi terka'e, <Ba kǝ ɓo am atl na atli, ko na yam den lar da'a, se de kǝ ɓatl argon tu kǝ pǝni gam gi ki bi Babom gwa. 34Ama a yari ine, ba kǝ ɓoni am atl na atli ko na yam dama, domici to yamka ni'e dandi kǝ Yami. 35Ba kǝ ɓo am atli na atl da'a, domici atl ni'e ba ne asǝm gǝsi, ko na bǝn Urshalima domici arni'e bar bǝn kǝ Bar Gunye. 36Ba kǝ ɓo ngetl gi da'a, domici ki mani pali ta gam gi gon dunyi ko gholi da'a. 37Kup argon tu ki yariwo, ar dlǝr den <Aan> ko <o'o.> Ar ni man untuwo kar Mǝn ɗasi tu ni ɗǝli.
Kulci den pǝni pansa
38<<Kǝ kum yari terka'e, <ger den am kǝ ger ni, shin ngapo den am kǝ shin ni.>#5.38 Kulci kǝ Musa yari'e argon tu baa hukunte mbarǝm denewo ar ɗǝr nǝm na argon tu mǝri pi gwa. Zhit muntu gip Ɗǝltǝne 21.24, Livitikus 19.18; 24.20, Bi Doka kǝ rop 19.21 39Ama a yari in'e bakǝ nge ni mbarǝm mǝn ɗasi tu da'a. Gon ni ɓe'i ankayama den gǝskǝm gi kǝ shimliwo, bali ti nǝmi pa'e. 40Gon ni ri'i cina dǝ mǝn bǝn kǝ dǝ tǝ nǝmi'i lulur gi kawo, za'i tǝ bar kǝ ghumtǝn gi esi. 41Gon ni kem ki kǝ ɓomi asǝm kǝ mil nemo, ri nan ti kǝ mil rop. 42Murgon ni lirki bargono, bi ti. Muntu ngen cigǝri karkiwo, ba kǝ nge ti bika da'a.
Ndu mǝn nge gi
43<<Kǝ kum yari'e kǝ ndu ya'i, kǝ nge mǝn nge gi. 44Ama a yari ine, ndu ni mǝn nge gini. Shirǝm ni na Yam den mǝn kumi in dli. 45Kǝn ni kǝ pi untuwo arni ki dǝm mimir kǝ ba gin kǝ to yamka. Tǝ kem dǝ pǝt gǝs ɗǝl den ho mbarǝm na wani mbarǝme. Tǝ kem dǝ ghon nde mǝn pitǝn dlat na munju ba pi dlat dagwa. 46Kǝn ni kǝ ndu mǝn ju ba ndu kǝn katlo, unun ki zam we? Mǝn nǝmi wurpi bom ma untuni wu pi diya? 47Ya'i ni katl kǝ shirmi tiwo, unun kǝ pi kan man jen we? Ko munju kan mom Yam dama untun wu pi. 48Ra'untuwo, dǝm ni na laai kandatu Ba gin kǝ to yamka ra na laa'i gwa.
Currently Selected:
MAT 5: PLJ
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
