路加福音 7
7
耶穌醫好羅馬軍官的僕人
(太 8.5-13；約 4.43-54)
1耶穌講互民眾聽的話攏講煞，就入去迦百農。 2有一個羅馬軍官，伊所重用的僕人破病，病甲啲欲死。 3軍官聽著耶穌的代誌，就差幾若個猶太人的長老去耶穌遐，請耶穌來醫治伊的僕人。 4諸個長老到耶穌遐，懇切求伊講：「此個人會堪得你給伊幫贊， 5因為伊愛護咱猶太人，閣給咱起會堂。」
6耶穌就及𪜶去。耶穌啲欲到伊的厝的時，彼個軍官差幾若個朋友來給伊講：「主啊，毋通勞煩你，你來阮兜，我𣍐堪得。 7所以我才毋敢家己來見你。你只有講一句話，我的僕人就會好。 8因為我是互人管的人，嘛有兵互我管。我給此個講『去』，伊就去；給別個講『來』，伊就來；給我的僕人講『你做此個』，伊就去做。」 9耶穌聽著諸個話對伊感覺真意外，越轉身給隨伊的群眾講：「我給恁講，連佇以色列人的中間，我都猶毋曾看著此款的信心。」
10受差的人轉去軍官的厝，看著僕人已經好去。
耶穌互寡婦的子閣活
11過無偌久，耶穌去一個城，叫做拿因。伊的門徒及歸大陣人隨伊去。 12耶穌欲到城門的時，抵好有人扛一個死人出來，伊的老母孤孤生此個子，閣是寡婦。有一陣城內的人出來送葬。 13主一下看著此個寡婦就可憐伊，給伊講：「毋通哭！」 14然後耶穌行倚去按扛身屍的架，扛的人就停腳。耶穌講：「少年人，我給你講：『起來！』」 15彼個死人就𬦰起來坐，開嘴講話。耶穌就將伊交互伊的老母。
16眾人攏非常驚惶，將榮光歸互上帝，講：「咱中間有出現一位大先知啦！」閣講：「上帝有看顧伊的子民！」
17關係耶穌此個風聲傳到全猶太及周圍逐地區。
施洗者約翰差門徒去見耶穌
(太 11.2-19)
18 約翰的門徒將諸個代誌攏給約翰報告。約翰就叫兩個門徒來， 19差𪜶去見主，講：「你就是啲欲來彼位，抑是阮著聽候別人？」 20諸個人來到耶穌遐，就講：「施洗者約翰差阮來問你講『你就是啲欲來彼位，抑是阮著聽候別人？』」
21抵彼時，耶穌有醫好真多身苦病疼及互邪神附身的人，閣互真多失明的人會看見。 22耶穌應講：「恁轉去給約翰報告恁所看著及聽著的，就是失明的人閣看見，腳跛的人行路，痲瘋病人清氣，耳孔𣍐聽見的人聽見，死人閣活，散赤人有好消息傳互𪜶。 23對我無失去信心的人真有福氣！」
24 約翰差來的人離開了後，耶穌才對群眾講起約翰的事。伊講：「恁出去曠野是欲看什麼？欲看互風吹搖來搖去的蘆葦是無？ 25若毋是，恁出去欲看什麼？欲看穿高貴衣服的人是無？恁看，穿奢華的衣服生活奢侈的人是佇王宮。 26按呢，恁出去欲看什麼？欲看先知是無？是，毋拘我給恁講，伊比先知閣較偉大。 27關係約翰，聖經有按呢記載：
看啊，我差我的使者做你的先鋒；
伊欲佇你的頭前給你開路。
28我給恁講，婦仁人所生的無一個比約翰較偉大；毋拘，佇上帝國上微細的猶比伊閣較偉大！」
29聽著諸個話的民眾及貿稅的嘛攏承認上帝是公義，因為𪜶有領受約翰的洗禮。 30毋拘法利賽派的人及律法教師攏拒絕上帝對𪜶所定的旨意，無領受約翰的洗禮。
31耶穌閣講：「按呢，此世代的人我欲用什麼來比並？𪜶親像什麼？ 32𪜶親像一陣囝仔坐佇市場口對同伴互相喝：
阮對恁歕𥰔仔，恁無跳舞！
阮唱哀歌，恁嘛無哭！
33施洗者約翰來，無食飯，無飲酒，恁就講：『伊互鬼附身！』 34人子來，嘛食嘛飲，恁就講：『伊是貪食好酒的人，是貿稅的及罪人的朋友。』 35智慧是對有智慧的人得著證實。」
有罪的婦仁人得著赦免
36有一個法利賽派的人請耶穌食飯，耶穌就入去彼個法利賽人的厝坐桌食飯。 37彼個城內有一個有罪的婦仁人，伊知耶穌佇彼個法利賽人的厝啲食飯，就帶一罐貯芳油的玉瓶來。 38伊徛佇耶穌的後面，倚伊的腳啲哭，目屎滴霑伊的腳，就用家己的頭毛給拭，閣直直唚伊的腳，用芳油給抹。 39請耶穌彼個法利賽人一下看著，心內想：「此個人若是先知，一定會知啲給伊摸的是啥人，是什麼款查某人，因為伊是罪人。」
40耶穌就對伊講：「西門，我有話欲給你講。」
西門講：「老師，請講。」
41耶穌就講：「有兩個人對一個債主借錢，一個欠伊五百個銀仔，猶一個欠伊五十。 42𪜶無法度通還，債主就擦消𪜶的債。按呢，叨一個會較疼債主？」
43 西門應講：「我想是債受擦消較多彼個。」
耶穌給伊講：「你的判斷真著。」 44然後耶穌越頭向婦仁人，對西門講：「你有看著此個婦仁人無？我入你的厝，你無用水互我洗腳，毋拘伊用目屎滴霑我的腳，閣用伊的頭毛拭。 45你無給我唚，毋拘我入來了後，伊直直唚我的腳。 46你無用油抹我的頭殼，毋拘伊用芳油抹我的腳。 47所以，我給你講，伊疼較多，表示伊真多的罪過已經有得著赦免。得著赦免較少，疼就少。」
48耶穌就給婦仁人講：「你的罪得著赦免啦。」
49仝桌許個人心內想：「此個到底是什麼人，伊竟然赦免人的罪！」
50耶穌給彼個婦仁人講：「你的信心有救你；平安倒去。」
Currently Selected:
路加福音 7: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
