路加福音 4
4
耶穌受試探
(太 4.1-11；可 1.12-13)
1耶穌受聖神充滿，對約旦河轉來。伊互聖神導去曠野， 2佇遐四十日久受魔鬼試探。彼個期間伊攏無食什麼，許個日子過了，腹肚就枵。
3魔鬼對伊講：「既然你是上帝的子，命令此塊石頭變做餅！」
4耶穌應講：「聖經有記載：『人啲活毋若倚靠餅。』」
5然後魔鬼導耶穌去到高的所在，一目𥍉久將天下萬國互伊看， 6給伊講：「諸個一切的權勢及榮華，我攏欲互你；因為諸個一切已經攏交互我，我欲互什麼人就互彼個人。 7所以，你若跪落來拜我，諸個一切攏總是你的。」
8耶穌應講：「聖經有記載：
著拜主 — 你的上帝，
只有服事伊。」
9魔鬼閣導耶穌去耶路撒冷，互伊徛佇聖殿上高的所在，給伊講：「既然你是上帝的子，對遮跳落去， 10因為聖經有記載：『上帝會為著你命令伊的天使來保護你』； 11閣講：
𪜶會用手給你扶啲，
互你的腳𣍐磕著石頭。」
12耶穌應講：「聖經有記載：『毋通試探主 — 你的上帝。』」
13所有的試探攏用了，魔鬼就離開耶穌，聽候後遍的機會。
耶穌開始佇加利利傳道
(太 4.12-17；可 1.14-15)
14耶穌受聖神的權能充滿，轉去加利利。伊的名聲傳到四圍逐地區。 15伊佇逐個會堂教示人，受眾人尊敬。
耶穌佇拿撒勒受拒絕
(太 13.53-58；可 6.1-6)
16耶穌倒去伊長大的所在拿撒勒，照習慣佇安歇日入去會堂。伊徛起來欲讀聖經。 17有人提一卷先知以賽亞的冊互伊，伊就搋開，尋著一所在有記載：
18主的神臨到我，
因為伊用油抹我，
互我傳好消息互散赤人。
伊差派我宣布：
受掠的得著解放，
無看見的閣看見，
受壓迫的得著自由，
19宣布主恩惠的年#4.19 「恩惠的年」：參看用詞簡釋。。
20耶穌給冊捲起來，還互會堂的助理，就坐落去。會堂內的眾人攏注目給伊看。 21伊就給𪜶講：「此段聖經，今仔日恁啲聽的時已經實現啦。」
22大家攏稱讚耶穌，對伊所講仁慈的話感覺奇怪，講：「此個人豈毋是約瑟的子？」
23耶穌對𪜶講：「恁一定會引用『醫生啊，著醫治你家己』此句俗語來對我講：『阮有聽著你佇迦百農做真多代誌，今嘛著佇你的故鄉做。』」 24耶穌閣講：「我實在給恁講，先知無一個佇家己的故鄉受歡迎。 25我給恁講實話，佇以利亞的時代有曠旱三年半久，逐所在有大飢荒，彼時以色列中有真多寡婦； 26以利亞並無受差去𪜶遐，只有去西頓 撒勒法一個寡婦遐。 27先知以利沙的時，以色列中有真多痲瘋病人，除去敘利亞人乃縵以外，無一個得著清氣。」
28會堂內所有的人一下聽著諸個話真受氣。 29𪜶徛起來，給耶穌趕出城外，扭到山崁，欲給伊捙落去；𪜶的城是起佇山頂。 30耶穌卻對𪜶中間行過，做伊去。
耶穌醫好邪神附身的人
(可 1.21-28)
31耶穌落去加利利的迦百農城，逐個安歇日攏有啲教示人。 32𪜶對伊的教示感覺非常希奇，因為伊的話有權威。 33會堂內有一個互無清氣的鬼神附身的人，伊大聲喝： 34「拿撒勒人耶穌，你插阮！你來欲毀滅阮是無？我知你是什麼人；你是上帝的聖者。」
35耶穌給伊責備講：「恬恬！對此個人出去！」鬼佇眾人的面前給伊摔倒，就對伊出去，攏無給伊傷害著。
36眾人真著驚，講來講去：「伊的話哪赫厲害？伊用權威及能力命令邪神，𪜶就出去。」 37耶穌的名聲就傳到四圍逐所在。
耶穌醫好真多病人
(太 8.14-17；可 1.29-34)
38耶穌離開會堂，入去西門𪜶兜。西門的丈姆破病，發熱真燒；有人給耶穌講此個代誌。 39耶穌徛倚去伊的邊仔，責備熱病，熱就退；婦仁人隨時起來給𪜶侍候。
40日落的時，眾人將有逐種病的人攏導來尋耶穌。耶穌一個一個給𪜶按手，攏給𪜶醫好。 41嘛有鬼對真多人的身軀出來，喝講：「你是上帝的子！」耶穌給𪜶責備，毋准𪜶講，因為𪜶知耶穌是基督。
耶穌佇會堂傳道
(可 1.35-39)
42天一下光，耶穌就出城去偏僻無人住的所在。歸陣人啲尋伊，尋著就給伊留啲，無愛伊離開。 43毋拘耶穌給𪜶講：「我嘛著去別個城市傳上帝國的福音；這是上帝差派我來的目的。」
44伊就繼續佇猶太逐個會堂傳道。
Currently Selected:
路加福音 4: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
