路加福音 23
23
耶穌佇彼拉多面前受審
(太 27.1-2, 11-14；可 15.1-5；約 18.28-38)
1全體議員攏徛起來，給耶穌押去彼拉多面前。 2𪜶就控告講：「阮有看著此個人啲迷惑阮的民族，禁止人納稅互凱撒，閣自稱是基督，是王。」
3 彼拉多問耶穌講：「你是『猶太人的王』是無？」
耶穌應講：「這是你講的。」
4 彼拉多就對許個祭司長及群眾講：「我查𣍐出此個人有什麼罪。」
5毋拘𪜶堅持講：「伊對加利利到遮，佇猶太全地教示人，煽動民眾。」
耶穌佇希律的面前
6 彼拉多一下聽著，就問看此個人是加利利人抑毋是。 7伊一下知耶穌屬希律王的管轄，就給伊送去希律遐；彼時希律本人嘛佇耶路撒冷。 8希律看著耶穌，非常歡喜，因為伊曾聽著耶穌的代誌，一直愛欲見伊，閣向望會當看著伊行神跡。 9伊問耶穌真多代誌，耶穌攏無應伊。 10祭司長及經學教師徛起來，極力給伊控告。 11希律及伊的兵嘛給伊侮辱，戲弄，然後閣給伊穿一領真媠的長袍，才給伊送轉去互彼拉多。 12希律及彼拉多本來有冤仇，佇彼一日煞變做朋友。
耶穌受判死刑
(太 27.15-26；可 15.6-15；約 18.39-19.16)
13 彼拉多召集祭司長、官員，及民眾來， 14給𪜶講：「恁押此個人來我遮，控告伊煽動民眾。今我佇恁的面前有給伊審問，查攏無恁所控告的罪。 15希律嘛認定伊無罪，才將伊送倒來咱遮。可見伊無做什麼該死的代誌。 16所以，我欲用鞭給伊教示一下，才放伊去。」
17逐年的𨃟過節，總督著照群眾的要求放一個犯人互𪜶。#23.17 有的抄本無此節。
18群眾攏喝：「此個人著互伊死！放巴拉巴互阮。」 19此個巴拉巴因為佇城內作亂閣刣人才受關監。
20 彼拉多想欲放耶穌，就閣說服眾人。 21毋拘𪜶大聲喝：「給釘十字架！給釘十字架！」
22 彼拉多第三遍對𪜶講：「是按怎？伊有做什麼歹代誌？我查𣍐出伊有該死的罪。所以，我欲用鞭給伊教示一下，才放伊去。」
23不過群眾堅持，大聲要求給耶穌釘十字架，最後𪜶的聲煞較贏。 24彼拉多就宣判，照𪜶的要求去執行， 25放𪜶所要求彼個因為作亂，刣人，互人關監的巴拉巴，給耶穌交互𪜶，照𪜶的意思去處理。
耶穌受釘十字架
(太 27.32-44；可 15.21-32；約 19.17-27)
26許個兵士押耶穌出去的時，抵好有一個古利奈人名叫做西門對庄腳來。𪜶給伊掠來，將十字架囥佇伊的肩頭互伊夯，隨耶穌的後面行。
27有一大陣民眾隨耶穌，其中有一寡婦仁人為著伊搥胸悲傷啼哭。 28耶穌越頭對𪜶講：「耶路撒冷的婦仁人啊，毋免為著我啼哭；著為恁家己及恁的子兒啼哭！ 29因為日子啲欲到，人會講：『𣍐懷孕，毋曾生子，毋曾互囝仔食奶的婦仁人真有福氣！』
30彼時，人會對大山講：
給阮硩落來！
對小山講：
給阮蓋落來！
31因為𪜶對活啲的樹木都會按呢做，對焦去的樹木豈𣍐閣較厲害？」
32另外兩個犯人嘛互人押去及耶穌做夥處死刑。 33𪜶到一個所在叫做「頭殼碗」，就佇遐給耶穌釘十字架，嘛釘彼兩個犯人，一個佇正旁，一個佇倒旁。 34耶穌講：「父啊，赦免𪜶，因為𪜶毋知𪜶啲做什麼。」#23.34 「耶穌講…做什麼」有的抄本無此句話。
後來𪜶抽籤分耶穌的衫。 35民眾徛佇遐啲看。許個猶太人的領袖給伊恥笑，講：「伊救別人；伊若是上帝所揀選的基督，著救家己！」
36許個兵士嘛給伊戲弄，行倚去，提醋互伊， 37講：「你若是『猶太人的王』，著救你家己！」
38佇伊的頭殼頂有罪狀的牌仔寫「此個是猶太人的王」。
39做夥釘的犯人，有一個一直給耶穌侮辱講：「你豈毋是基督？救你家己嘛救阮。」 40另外一個給伊責備講：「你及伊像款受刑，你豈毋驚上帝？ 41咱受刑是公道，因為咱所受的是罪該應得，毋拘此個人攏毋曾做什麼毋著。」 42伊就對耶穌講：「耶穌啊，你作王來臨的時，請會記得我！」
43耶穌給伊講：「我實在給你講，今仔日你會及我做夥佇樂園。」
耶穌的死
(太 27.45-56；可 15.33-41；約 19.28-30)
44差不多中晝的時，烏暗遮蓋全地到下晡三點，日頭失光， 45聖殿內的帳簾裂做兩旁。 46耶穌大聲喝：「父啊，我將我的靈魂交代你。」講煞，就斷氣。
47一個軍官看著所發生的代誌，歸榮光互上帝講：「此個人真正是義人！」
48聚集佇遐啲看此個代誌的眾人，看著所發生的代誌，攏那行那搥胸悲傷轉去。 49許個識耶穌的人，以及對加利利隨來的婦仁人，攏徛佇遠遠的所在看諸個代誌。
耶穌的安葬
(太 27.57-61；可 15.42-47；約 19.38-42)
50有一個人叫做約瑟；伊是議員，是一個善良正義的人。 51伊無贊成其他議員的計謀及行動。伊是猶太人的城亞利馬太的人，一直啲期待上帝國的來臨。 52此個人去見彼拉多，請求將耶穌的遺體互伊。 53伊將遺體收落來，用幼麻布包，然後給伊安葬佇拍好佇石壁的墓內面；此個墓攏猶毋曾有人用。 54彼日是備辦日，安歇日抵欲開始。
55對加利利及耶穌做夥來許個婦仁人隨約瑟去。𪜶斟酌看彼個墓，看耶穌的遺體按怎下， 56就轉去準備芳料及芳油。
安歇日，許個婦仁人照律法的規定歇睏。
Currently Selected:
路加福音 23: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
