路加福音 19
19
耶穌及撒該
1耶穌入去耶利哥，對遐啲經過。 2佇遐有一個人名叫做撒該；伊是貿稅的頭人，真好額。 3伊愛欲看耶穌是什麼款人，不過因為人真多，伊的身材閣矮，看𣍐著。 4伊就走進前，𬦰上一欉桑材樹欲看耶穌，因為耶穌啲欲對遐經過。
5耶穌行到彼個所在，攑頭看，對伊講：「撒該，趕緊落來；今仔日我一定欲住恁兜。」 6撒該就趕緊落來，歡歡喜喜接待耶穌。 7眾人一下看著，嗷嗷唸講：「此個人煞入去罪人的厝住！」
8 撒該徛啲，對主講：「主啊，我欲提財產的一半賑濟散赤人。我若有給人諞錢，欲四倍還伊。」
9耶穌對伊講：「今仔日拯救已經臨到此個家，因為伊嘛是亞伯拉罕的子孫。 10人子來是欲追尋閣拯救失落的人。」
十個金幣的譬喻
(太 25.14-30)
11眾人啲聽諸個話的時，耶穌閣給𪜶講一個譬喻，因為伊啲欲到耶路撒冷，閣許個人想講上帝國連鞭會實現。 12所以耶穌給𪜶講：「有一個貴族去真遠的所在欲受封作王才轉來。 13伊召集十個僕人來，互𪜶十個金幣#19.13 「金幣」原文是「彌那」。一彌那約當時一個人三個月的工資。，一人一個，給𪜶講：『我轉來以前，恁用諸個金幣去做生理。』 14本國的人民怨恨伊，差一個使者隨伊的後面去，對皇帝奏講：『阮無愛此個人做阮的王。』
15「此個貴族受封作王轉來的時，叫許個領著錢的僕人來，愛知𪜶逐個人賺偌多。 16頭一個來伊的面前，講：『主啊，我有用你彼個金幣賺十個。』 17主人給伊講：『真好，好的僕人！你既然佇小事忠實，我欲互你有權管理十個城。』 18第二個來，講：『主啊，我有用你彼個金幣賺五個。』 19主人嘛按呢給此個人講：『我欲互你管理五個城。』
20「閣另外一個來，講：『主啊，你看，你的金幣佇遮。我用手巾給伊包起來囥。 21我真驚你，因為你是一位嚴轄的人，無寄，你嘛欲領；無種，你嘛欲收。』 22主人給伊講：『你此個可惡的僕人，我欲照你家己所講的給你定罪。你既然知我是嚴轄的人，無寄嘛欲領，無種嘛欲收， 23你哪無將我的錢寄佇銀行，等我轉來的時通領母錢及利息？』
24「主人就給徛佇邊仔的人講：『給伊的金幣提來，交互彼個有十個金幣的！』 25𪜶就對伊講：『主啊，伊已經有十個金幣啦。』 26主人講：『我給恁講，已經有的，欲閣較多互伊；無的，連伊所有的嘛欲給伊搶起來。 27毋拘許個對敵我，無愛我做𪜶的王的，給𪜶拖來遮，佇我的面前給𪜶刣死！』」
耶穌光榮進入耶路撒冷
(太 21.1-11；可 11.1-11；約 12.12-19)
28講諸個話了後，耶穌行做前上耶路撒冷。 29伊啲欲到橄欖山山腳的伯法其及伯大尼的時，差兩個門徒， 30吩咐𪜶，講：「恁去對面的庄社，入去的時會看著一隻毋曾互人騎過的驢仔子縛佇遐。恁給伊解開，牽來遮。 31若有人問：『恁是按怎啲解驢仔子？』恁著講：『主欲用伊。』」
32𪜶就去，所抵著的代誌逐項及耶穌所講的像款。 33𪜶啲解彼隻驢仔子的時，主人問𪜶講：「恁是按怎啲解此隻驢仔子？」
34𪜶應講：「主欲用伊。」 35𪜶就牽彼隻驢仔子來耶穌遐，將家己的外衫袚佇驢仔頂，給耶穌扶起去騎。 36耶穌騎驢仔子進前行的時，眾人將家己的外衫鋪佇路裡給伊歡迎。 37耶穌啲欲到耶路撒冷欲落橄欖山的所在，歸大陣的門徒因為看著一切奇妙的事就攏歡喜，大聲謳咾上帝講：
38奉主的名來的王應該受稱讚！
願天頂有和平，榮光歸互至高的上帝！
39眾人中間，有幾若個法利賽派的人給耶穌講：「老師，著責備你的門徒！」
40耶穌應講：「我給恁講，𪜶若恬恬，諸個石頭嘛會大聲喝出來。」
耶穌為著耶路撒冷哀哭
41耶穌啲欲到耶路撒冷，看著城，就為著城哀哭， 42講：「我實在真愛你今仔日知按怎才會行向和平！毋拘此個事現在對你蓋啲，互你看𣍐著。 43因為日子啲欲到，彼時你的對敵會佇你的周圍造土堆包圍，對四面給你攻擊。 44𪜶會將你及你城內的人民全部毀滅，無留兩塊石相疊，因為你看𣍐出上帝拯救你的時機。」
耶穌潔淨聖殿
(太 21.12-17；可 11.15-19；約 2.13-22)
45耶穌入去聖殿，就起手趕許個賣物件的人出去。 46伊給𪜶講：「聖經有記載：
我的厝應該是祈禱的殿，
恁煞給伊變做土匪仔窟。」
47耶穌逐日佇聖殿教示人。祭司長、經學教師，及人民的頭人一直想辦法欲害死耶穌， 48毋拘尋無法度，因為眾人攏真注意啲聽伊的話。
Currently Selected:
路加福音 19: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
