約翰福音 6
6
耶穌互五千人食飽
(太 14.13-21；可 6.30-44；路 9.10-17)
1此個代誌了後，耶穌過去加利利湖，就是提比哩亞湖的彼旁岸。 2有一大陣人隨伊去，因為𪜶有看著耶穌醫好病人的神跡。 3耶穌𬦰上山，及伊的門徒佇遐坐。 4彼時猶太人的𨃟過節啲欲到。 5耶穌攑頭看著一大陣人一直向伊遐啲來，就給腓力講：「咱欲去叨位買食物通互諸個人食？」 6伊講按呢是啲試驗腓力；其實，伊家己已經知啲欲做的代誌。
7 腓力應講：「用兩百個銀仔去買餅嘛無夠互逐個人食一屑仔。」
8另外一個門徒，就是西門‧彼得的小弟安得烈，給耶穌講： 9「遮有一個囝仔，伊有五個大麥餅及兩尾魚；毋拘人即呢多，干焦諸個哪有夠？」
10耶穌講：「恁叫眾人坐落去。」彼個所在草真多。眾人就坐落去；干焦查甫人就有五千。 11然後耶穌提許個餅，感謝了後分互坐佇遐的人；魚嘛按呢分，出在𪜶食。 12𪜶食飽了後，耶穌給伊的門徒講：「將食賰的碎屑仔拾起來，毋通拍損。」 13𪜶就將彼五個餅的屑仔，就是大家食賰的，拾起來，攏總滿十二籃。
14眾人看著耶穌所行的神跡，就講：「此個真正是欲來此世間彼位先知！」 15耶穌知影眾人啲欲強迫伊作王，就家己一個閣退去山裡。
耶穌佇湖的頂面行
(太 14.22-33；可 6.45-52)
16黃昏的時，伊的門徒落去湖邊， 17上船欲過湖去迦百農。彼時天已經暗，耶穌猶未到𪜶遐。 18忽然，因為透大風，湖起大湧。 19門徒划船，大約划五六公里的時，看著耶穌佇湖的頂面啲行，行倚近船，𪜶就起驚。 20耶穌對𪜶講：「是我，免驚！」 21門徒就歡喜接伊上船；船連鞭到𪜶欲去的所在。
耶穌是活命的餅
22隔日，猶佇湖對面岸彼陣人發覺佇遐只有一隻船若定；耶穌嘛無及門徒做夥坐船，干焦門徒家己過去。 23毋拘有幾若隻船對提比哩亞來到倚近主感謝了後互眾人食餅彼個所在。 24眾人一下發覺耶穌及伊的門徒攏無佇遐，就坐許個船過去迦百農尋耶穌。
25眾人佇湖的對面岸尋著耶穌，就給伊問：「拉比，你什麼時來遮？」
26耶穌應講：「我實實在在給恁講，恁尋我，是因為有餅食到飽，毋是因為看見神跡。 27毋通為著會敗壞的食物拍拼，著為著久長存在，會當互人得著永遠的活命彼個食物來拍拼，就是人子欲互恁的；因為父上帝已經給伊蓋印認定。」
28𪜶就問耶穌：「欲完成上帝的工作，阮著做什麼？」
29耶穌應講：「信上帝所差彼位就是做上帝的工。」
30𪜶就講：「你欲行什麼神跡互阮看來信你？你欲做什麼？ 31阮的祖先佇曠野食嗎哪，抵抵照聖經所記載：『伊有將對天來的餅互𪜶食。』」
32耶穌就給𪜶講：「我實實在在給恁講，毋是摩西將對天來的餅互恁，是我的父將對天來真的餅互恁。 33因為上帝所賜的餅就是對天降落來，賜活命互世間的。」
34𪜶就給耶穌講：「先生，請你不時將此個餅互阮。」
35耶穌給𪜶講：「我就是互人得著活命的餅；來我遮的人一定𣍐枵，信我的人一定𣍐嘴焦。 36毋拘我曾給恁講，恁已經有看著我，猶久毋信。 37父所互我的人攏會來我遮；來我遮的人，我絕對𣍐給伊棄拺； 38因為我對天降落來，毋是欲照家己的意思做代誌，是欲實行差我來彼位的旨意。 39差我來彼位的旨意是按呢：伊所互我的人，我連一個都𣍐喪失，佇末日我會互𪜶閣活。 40因為我的父的旨意是欲互所有看見子來信子的人攏會得著永遠的活命；佇末日我會互𪜶閣活。」
41因為耶穌講「我是對天降落來的餅」，猶太人就私下議論， 42講：「此個人豈毋是約瑟的子耶穌？咱識伊的父母，現在伊哪會講『我是對天降落來的』？」
43耶穌就對𪜶講：「恁啲私下議論。 44若毋是差我的父引導，無人會來我遮。來我遮的，佇末日我會互伊閣活。 45先知的冊有記載：『眾人攏會接受上帝的教導。』所有聽趁父，對伊學習的人，會來我遮。 46這毋是講有人曾看見父；只有對上帝遐來彼位曾看見。 47我實實在在給恁講：信的人有永遠的活命。 48我就是互人得著活命的餅。 49恁的祖先佇曠野食嗎哪嘛死去。 50這就是對天降落來的餅，互人食了𣍐死。 51我就是對天降落來彼個活命的餅。人若食此個餅會永遠活啲。我欲互人的餅就是我的肉，是為著欲互世間人有活命獻的。」
52對按呢，猶太人互相爭論講：「此個人哪會當用伊的肉互咱食？」
53耶穌就對𪜶講：「我實實在在給恁講，恁若無食人子的肉，無飲伊的血，恁內面就無活命。 54食我的肉，飲我的血的人，就有永遠的活命；佇末日我會互伊閣活。 55我的肉真正會食得，我的血真正會飲得。 56食我的肉，飲我的血的人，𫢶佇我內面，我嘛𫢶佇伊內面。 57永活的父差我，我嘛因為父來活；親像按呢，食我的人嘛會因為我來活。 58這就是對天降落來的餅；毋是親像恁的祖先所食的餅，𪜶食了嘛死去；食此個餅的人會永遠活啲。」
59諸個是耶穌佇迦百農的會堂教示人的時講的話。
永遠活的話
60耶穌的門徒中有真多人聽著，就講：「此個話真困難了解，啥人聽會落去？」
61耶穌心內知影伊的門徒私下啲議論此個事，就對𪜶講：「此個話給恁惹著是無？ 62按呢，恁若看著人子升高去到伊原來的所在，恁欲按怎？ 63賜活命的是上帝的神；肉體攏無功效。我給恁講諸個話是神，是活命。#6.63 「我給恁講諸個話是神，是活命。」嘛通譯做「我給恁講諸個話是賜活命的神。」 64毋拘恁中間有人毋信。」因為耶穌對起頭就知什麼人毋信，什麼人欲給伊出賣。 65伊閣講：「因為按呢，我曾給恁講，若毋是父允准，無人會當來我遮。」
66因為按呢，伊的門徒中有真多人離開，無閣隨伊。 67耶穌就對十二使徒講：「恁嘛欲離開噢？」
68 西門‧彼得應講：「主啊，你有永遠活的話，阮欲去隨啥人？ 69阮已經信，閣確實知你是上帝的聖者。」
70耶穌應講：「我豈毋是揀選恁十二人？恁中間有一個是魔鬼。」 71伊按呢講是啲指以斯加略#6.71 「以斯加略」：參看太 10.4 的註腳。西門的子猶大，伊是十二使徒的一個，啲欲出賣耶穌。
Currently Selected:
約翰福音 6: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
