約翰福音 16
16
1「我已經有將諸個代誌給恁講，是欲互恁的信心𣍐搖動。 2人會給恁趕出會堂；時啲欲到，欲刣恁的人攏會想講𪜶是啲服事上帝。 3𪜶會做諸個代誌，是因為𪜶毋識父，嘛毋識我。 4毋拘我已經有將諸個代誌給恁講，是欲互恁時到會記得我有給恁講。」
聖神的工作
「我無對起頭就將諸個代誌給恁講，是因為我一直攏有及恁做夥。 5現在我啲欲轉去差我來彼位遐，恁中間無人問我『你欲去叨位？』 6我將諸個代誌給恁講，恁煞滿心憂悶。 7不過，我著將實情給恁講：我去，是對恁有利益，因為我若無去，慰助者就𣍐來恁遮；我若去，我會差伊來恁遮。 8伊來的時，會給世間人指證𪜶對罪，對義，對審判的觀念有錯誤。 9對罪，因為𪜶毋信我； 10對義，因為我啲欲去父遐，恁𣍐閣看見我； 11對審判，因為此世間的統治者已經受審判。
12「我猶有真多代誌欲給恁講，毋拘恁現在猶𣍐當了解。 13真理的神來的時，伊會導恁了解一切的真理。伊𣍐照家己的意思講，會照所聽見的來講，嘛會給恁傳達啲欲來的事。 14伊會將榮耀歸互我，因為伊會將我交代伊的給恁傳達。 15我的父所有的攏是我的；因為按呢，我才講聖神會將我交代伊的給恁傳達。」
憂愁變做歡喜
16「閣無偌久，恁𣍐閣看見我；又閣無偌久，恁會閣看見我。」
17有幾若個門徒講來講去：「伊給咱講『閣無偌久，恁𣍐閣看見我；又閣無偌久，恁會閣看見我』，閣講『因為我啲欲去父遐』，諸個話是什麼意思？」 18所以𪜶一直問：「伊所講『閣無偌久』是什麼意思？咱毋知伊啲講什麼。」
19耶穌知𪜶愛欲問伊，就給𪜶講：「恁因為我講『閣無偌久，恁𣍐閣看見我；又閣無偌久，恁會閣看見我』啲問來問去是無？ 20我實實在在給恁講，恁會啼哭哀傷，毋拘世間人會歡喜；恁會憂愁，毋拘恁的憂愁會變做歡喜。 21產婦生子的時有憂愁，因為產期已經到；嬰仔一下出世就無閣記得生產的痛苦，伊會因為嬰仔已經出世佇世間來歡喜。 22親像按呢，現在恁有憂愁，不過我會閣見著恁，恁的心就會歡喜；恁的歡喜無人會給恁搶去。
23「佇彼日，恁𣍐閣給我問什麼。我實實在在給恁講：恁奉我的名無論對父求什麼，伊會賜互恁。 24到現在，恁猶毋曾奉我的名求什麼。恁著求，就會得著，通互恁的歡喜滿滿。」
耶穌已經較贏世間
25「諸個代誌我已經用譬喻給恁講啦。時啲欲到，我𣍐閣再用譬喻，會明明對恁講起父的事。 26佇彼日，恁會奉我的名祈求；我並無給恁講我會替恁對父懇求。 27父本身疼恁，因為恁有疼我，閣有信我是對上帝遐來的。 28我對父遐出來，來到世間；現在我欲離開世間，轉去父遐。」
29伊的門徒講：「現在你明明講，無閣用譬喻來講。 30今阮知你無所不知，無需要人給你問；因為按呢阮信你是對上帝遐來的。」
31耶穌應講：「此陣恁有信無？ 32恁看，時啲欲到，今已經到，恁會分散，逐個人攏轉去家己的所在，放我家己一個。其實我毋是家己一個，因為有父及我同在。 33我有將諸個代誌給恁講，是欲互恁佇我內面有平安。佇世間恁有苦難，毋拘著勇敢，我已經較贏世間。」
Currently Selected:
約翰福音 16: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
