創世記 28

1 以撒叫雅各來，給伊祝福，吩咐伊講：「你毋通娶迦南的查某囝仔做某。 2你隨時去美索不達米亞，去恁外公彼土利遐，娶恁母舅拉班的查某子做某。 3願全能的上帝賜福你，互你的後代加添極其多，成做真多族。 4願上帝將伊欲互亞伯拉罕的福氣賜互你及你的後代，互你承接你現在寄居的地做產業，就是上帝互亞伯拉罕的地。」 5以撒叫雅各出發，雅各就去美索不達米亞，亞蘭人彼土利的子拉班遐；拉班是麗百加的兄哥，雅各及以掃的母舅。

以掃閣娶某

6 以掃看著以撒給雅各祝福，叫伊去美索不達米亞，對遐娶某；閣聽著以撒祝福雅各的時，吩咐伊毋通及迦南的查某囝仔結婚； 7閣看著雅各聽父母的話去美索不達米亞， 8就知伊的老父以撒無合意伊娶迦南的查某囝仔做某。 9以掃就去以實瑪利遐，佇伊許個某以外閣娶瑪哈拉；瑪哈拉是亞伯拉罕的子以實瑪利的查某子，尼拜約的小妹。

雅各佇伯特利的夢

10 雅各離開別是巴，欲去哈蘭。 11到一個所在#28.11 「一個所在」嘛通譯做「一個聖的所在」。，因為日落，就佇遐歇暝；伊提一塊石頭做枕頭，佇遐睏。 12伊夢見有一個梯𫞼佇地裡，梯的頂面抵天，有上帝的使者佇梯裡起起落落。 13彼時，上主徛佇梯頂#28.13 「徛佇梯頂」嘛通譯做「佇伊邊仔」。，講：「我是上主 — 你的阿公亞伯拉罕的上帝，嘛是以撒的上帝。我欲將你現在睏的地賞賜你及你的後代。 14你的後代會親像地上的土沙赫呢多；你會向東、西、南、北發展；地上萬族會因為你及你的後代得著福氣。 15你無論去叨位，我欲及你同在，保護你；嘛欲導你倒來此個所在，攏𣍐放拺你，直到我實現對你講的應允。」 16雅各對眠夢醒起來，就講：「上主真正佇遮，我竟然毋知。」 17伊真驚，講：「此個所在有夠可怕！遮真正是上帝的厝，是天的門。」

18 雅各透早起來，將伊做枕頭的石𫞼做柱，閣倒油佇彼頂面。 19伊給彼個所在號做伯特利#28.19 「伯特利」意思是「上帝的厝」。；此個城本來叫做路斯。 20雅各下願講：「上帝若及我同在，一路保護我，閣互我有物通食，有衫通穿， 21互我平安倒來阮老父的厝，我就尊上主你做我的上帝。 22我𫞼起來做柱此塊石頭欲做上帝的厝。所有你賞賜我的，我一定欲獻十分一互你。」

Currently Selected:

創世記 28: TTVH

Highlight

Copy