使徒行傳 7
7
司提反的答辯
1大祭司問司提反：「事實是按呢是無？」
2 司提反應講：「各位父老兄弟，請聽！咱的祖先亞伯拉罕徙去哈蘭以前，猶住佇美索不達米亞的時，榮光的上帝對伊顯現， 3給伊講：『著離開你的故鄉及親族，去我欲指示你的所在。』 4亞伯拉罕就離開迦勒底人的地方，去住佇哈蘭。伊的老父死了後，上帝對遐給伊遷徙來現在恁啲住此個地。 5毋拘上帝攏無產業互伊，連立足之地都無。雖然彼時伊猶無子，毋拘上帝應允欲賜伊此個土地，互伊及伊的後代做產業。 6上帝有按呢講：『你的後代會去寄居佇外國，做奴才受虐待四百年久。』 7伊閣講：『毋拘我欲審判彼個互𪜶做奴才的國家，後來我會互𪜶出來，佇此個所在敬拜我。』 8然後上帝有及伊立約，用割禮做記號。因為按呢，亞伯拉罕生以撒了後第八日給伊割禮。後來以撒生雅各，雅各生十二個族長。
9「諸個族長怨妒約瑟，給伊賣去埃及，毋拘上帝及伊同在， 10救伊脫離一切的災難，閣賜伊智慧，互伊得著埃及王法老的關愛，指派伊做埃及的首相及王宮的總管。 11後來埃及及迦南全地發生飢荒，引起大災難，咱的祖先無糧食通食。 12雅各聽著埃及有糧食，就差咱的祖先去遐；這是頭一遍。 13第二遍𪜶去的時，約瑟對伊的兄弟表白伊的身份；對按呢法老才識約瑟的家族。 14約瑟差人去請伊的老父雅各及全家族七十五個人攏去埃及。 15雅各就落去埃及，後來伊及咱的祖先攏死佇遐； 16𪜶的遺體互人運到示劍，埋葬佇亞伯拉罕用錢對哈抹的子孫買彼個墓地。
17「上帝對亞伯拉罕的應允啲欲實現的時，以色列人佇埃及的人口加添真多。 18後來有另外一個毋識約瑟的王起來統治埃及。 19伊用詭計對付咱的民族，虐待咱的祖先，強迫𪜶給嬰仔擲佇外面，互𪜶死。 20抵此個時摩西出世，生做非常清秀得人疼。伊佇老父的厝受養飼三月日久。 21伊受放拺的時，法老的查某子給伊拾去做家己的子養飼。 22伊受栽培學習埃及一切的智慧，講話做代誌攏有才能。
23「摩西滿四十歲的時，想欲去探家己的兄弟以色列同胞。 24伊看著一個兄弟互埃及人欺負，就去給伊保護，拍死彼個埃及人，替伊報復。 25伊想講家己的兄弟會了解上帝欲用伊的手來解救𪜶，毋拘𪜶無了解。 26隔日，伊看著兩個以色列人啲冤家，想欲給𪜶調解，講：『朋友，恁是兄弟，哪啲互相傷害？』 27毋拘彼個啲欺負人的給摩西拺開，講：『啥人任命你作阮的頭人，作阮的判官？ 28你嘛欲刣我親像昨昏刣彼個埃及人噢？』 29摩西一下聽著此個話就逃走，去米甸人的地寄居；伊佇遐生兩個子。
30「四十年後，佇西奈山的曠野有一個天使佇莿的火焰中對摩西顯現。 31摩西看見此個景象感覺真希奇，欲行倚去看較詳細的時，聽見主的聲講： 32『我是恁祖先的上帝，是亞伯拉罕、以撒、雅各的上帝。』摩西驚甲皮皮惙，毋敢看。 33主對伊講：『鞋褪起來，因為你所徛的所在是神聖的地。 34我的子民佇埃及所受的痛苦，我確實有看著，嘛有聽著𪜶的哀叫，我落來欲拯救𪜶。今你來，我欲差你去埃及。』
35「此個摩西，以色列人曾給伊拒絕，問伊講『啥人任命你作頭人，作判官』；此個人上帝卻通過佇火焰中顯現的天使差派伊作領袖，作拯救者。 36伊導𪜶出來，佇埃及，佇紅海，佇曠野四十年久，行真多奇事神跡。 37此個摩西曾對以色列子孫講：『上帝欲對恁同胞的中間給恁興起一個親像我此款的先知。』 38摩西嘛曾及佇西奈山對伊講話彼個天使以及咱的祖先佇曠野聚會；伊有將所領受活的信息傳互咱。 39咱的祖先毋肯聽趁，顛倒給伊拒絕，想欲倒轉去埃及。 40𪜶對亞倫講：『你著造一寡神明來給阮導路，因為導阮出埃及彼個摩西毋知抵著什麼代誌。』 41彼時𪜶造一個牛仔子的像，對彼個偶像獻祭，為著家己的手所造的偶像慶祝。 42毋拘上帝越頭毋看𪜶，出在𪜶去拜天頂的星辰，照先知書所講：
以色列人啊，恁佇曠野四十年久，
豈曾獻牲禮抑是祭物互我？
43恁扛摩洛的布棚，
以及理番神的星，
就是恁造來拜的像；
所以我欲給恁放逐去巴比倫彼旁！
44「咱的祖先佇曠野有見證上帝同在的會幕，就是上帝對摩西講話的時指示伊，照伊所看見的模型建造的。 45後來咱的祖先承接此個會幕。上帝對𪜶面前給外族趕走；𪜶佔領彼個土地以後才及約書亞將會幕徙去遐，一直到大闢的時代。 46大闢有得著上帝歡喜，通求上帝准伊為著雅各的家#7.46 「雅各的家」有的抄本是「雅各的上帝」。尋一個徛起的所在。 47毋拘後來為著上帝起聖殿的是所羅門。
48「其實至高的上帝並無住佇人的手所起的厝，親像先知所講：
49主講：天是我的寶座，
地是我的腳砧。
恁欲給我起什麼款厝？
叨位是我安歇的所在？
50這一切豈毋是我親手創造的？
51「恁即呢固執！恁的心硬，耳孔毋聽！恁及恁的祖先相像，不時反抗聖神！ 52叨一個先知無受著恁的祖先迫害？預言彼個公義的僕人來臨許個人攏互恁刣死。今恁成做出賣閣刣死彼位僕人的人。 53恁是對天使領受上帝律法的人，竟然無遵守！」
司提反受抌死
54𪜶聽著司提反諸個話非常受氣，對伊咬牙切齒。 55毋拘司提反互聖神充滿，攑頭看天，看見上帝的榮光，嘛看著耶穌徛佇上帝的正旁。 56伊講：「恁看！我看見天開，人子徛佇上帝的正旁！」
57眾人掩耳孔，大聲喝，做夥扼倚去， 58給伊拖出去城外，用石頭給伊抌。許個證人將家己的外衫交互一個叫做掃羅的少年人顧。 59𪜶用石頭抌司提反的時，司提反求叫講：「主耶穌，求你接納我的靈魂！」 60伊閣跪落去，大聲喝：「主啊，毋通將此個罪歸互𪜶！」伊講了就死。
Currently Selected:
使徒行傳 7: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
