使徒行傳 5
5
亞拿尼亞及撒非喇
1有一個人名叫做亞拿尼亞，伊及伊的某撒非喇賣一寡田園； 2伊得著某的同意，將所得著的錢留一寡起來，賰的提來交互使徒。 3彼得對伊講：「亞拿尼亞，你哪互撒旦控制你的心來欺騙聖神，給賣田園的錢留一部份起來？ 4田園猶未賣是你的，賣了所得著的錢你有權通處理，你哪做此款代誌？你毋是欺騙人，是欺騙上帝！」 5亞拿尼亞一下聽著此個話，慄落去就死。聽著此個代誌的人攏真驚惶。 6有幾若個少年人來，給伊的屍體包起來，扛出去埋葬。
7差不多三點鐘後，伊的某入來，毋知所發生的代誌。 8彼得問伊：「你給我講，恁賣田園所得著的錢干焦諸個是無？」
伊應講：「是，諸個若定。」
9 彼得對伊講：「恁哪同心試探主的神？你看，埋葬你的丈夫的人抵轉來到門口，𪜶嘛欲給你扛出去！」 10撒非喇隨時慄落去，佇彼得的腳前死去。許個少年人入來，看著伊已經死，就給伊扛出去，埋葬佇伊丈夫的身邊。 11全教會及聽著諸個代誌的人攏真驚惶。
神跡奇事
12使徒佇民間行真多神跡奇事。信徒攏同心合意佇所羅門走廊聚會。 13民眾攏真尊重𪜶，毋拘毋敢及𪜶接近。 14信主的人一直加添，男的女的攏真多。 15有人將病人囥佇眠床抑是床舖，扛出來下佇路邊，佇彼得經過的時通互伊的影蔭著。 16閣有歸群人導破病的以及互邪神苦楚的人對耶路撒冷周圍的鄉鎮聚集倚來，𪜶攏有得著醫好。
使徒受迫害
17大祭司以及及伊仝黨，就是撒都該派的人，對使徒滿心怨妒。 18𪜶下手掠使徒，給𪜶關落監。 19彼暝，主的天使拍開監門，給𪜶導出來，對𪜶講： 20「恁去，徛佇聖殿將此個賜活命的信息全部對民眾宣講。」 21使徒聽伊的話，天欲光的時入去聖殿教示人。
大祭司及伊仝黨的人到位，就召集所有以色列人的長老開會，然後差人去監獄導使徒來。 22守衛到的時，發見使徒無佇監裡，就倒來報告講： 23「阮發見監房鎖牢牢，看守徛佇門口，阮一下開監門，內面攏無看著半人。」 24聖殿的守衛官及祭司長聽著此個報告，毋知代誌會按怎演變就真著急。 25彼時，有一個人入來給𪜶講：「恁給𪜶掠去關佇監裡許個人，現在徛佇聖殿啲教示民眾！」 26彼個守衛官及伊的部下就去給使徒導來；𪜶無用暴力，因為驚民眾用石頭給𪜶抌。
27𪜶導使徒入來，互𪜶徛佇議會面前。大祭司就給𪜶審問， 28講：「阮有嚴嚴禁止恁毋通奉此個名教示人，恁顛倒將此個道理傳遍耶路撒冷，想欲將流此個人的血的責任歸互阮。」
29 彼得及其他的使徒應講：「阮著順服上帝，毋是順服人。 30恁給伊釘死佇十字架頂的耶穌，咱祖先的上帝有互伊閣活。 31此位耶穌，上帝高舉伊坐佇家己的正旁，作首領，作救主，通互以色列人悔改，罪得著赦免。 32阮是諸個代誌的見證人。上帝賜互順服伊的人的聖神嘛為著諸個代誌作證人。」
33議會的議員聽著諸個話非常受氣，愛欲刣𪜶。 34毋拘𪜶中間有一個法利賽派的人，叫做迦瑪列，是眾人尊敬的律法教師。伊徛起來，吩咐使徒暫時出去， 35然後對議會講：「以色列人，恁欲辦諸個人著真謹慎！ 36以前杜達起來，自稱大人物，約有四百人隨伊，後來伊互人刣死，所有隨伊的人攏四散，消失去。 37後來有一個加利利人猶大佇戶口普查的時出現，導一寡人隨伊，伊嘛互人刣死；隨伊的人攏四散。 38今關係此項代誌，我給恁講，諸個人恁毋通插，出在𪜶去。𪜶所計劃所做的若出佇人，一定會失敗； 39若出佇上帝，恁就𣍐當給𪜶消滅，驚了恁煞及上帝作對頭！」
議會接納伊的意見。 40𪜶叫使徒入來，用鞭給𪜶拍，命令𪜶𣍐用得閣奉耶穌的名講道，然後放𪜶出去。 41使徒離開議會，滿心歡喜，因為𪜶互人看做會堪得為著主的名受凌辱。 42𪜶逐日佇聖殿及人家厝繼續教示人，傳基督耶穌。
Currently Selected:
使徒行傳 5: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
