Sat-ka-lī-a-su 14

Iâ-lō͘-sat-léng kap Lia̍t-kok

1Khòaⁿ leh, Siōng Chú ê ji̍t beh kàu lah, lâng beh tī lí ê ba̍k-chiu chêng pun lí chhiúⁿ--lâi ê mi̍h. 2Góa beh tiàu-chi̍p bān-kok lâi kong-kek Iâ-lō͘-sat-léng; siâⁿ ōe siū kong-phòa, chhù siū chhiúⁿ-kiap, hū-jîn-lâng siū lêng-jio̍k; siâⁿ-lāi ê chū-bîn chi̍t-pòaⁿ hō͘ lâng lia̍h--khì, chhun--ê lâu--teh. 3Āu-lâi, Siōng Chú ōe chhut-khì kap hiah-ê kok kau-chiàn, kap í-chêng siâng-khoán. 4Tī hit-ji̍t, I ōe khiā tī Iâ-lō͘-sat-léng tang-pêng ê Kaⁿ-ná-soaⁿ. Kaⁿ-ná-soaⁿ ōe tùi tiong-ng li̍h--khui, chi̍t-pòaⁿ ǹg lâm î-sóa, chi̍t-pòaⁿ ǹg pak, tùi tang kàu sai hêng-sêng hui-siông tōa ê soaⁿ-kok. 5Lín ōe sūn chit-tiâu góa só͘ pun-khui thàng kàu A-sek ê soaⁿ-kok tô-cháu, chhin-chhiūⁿ lín ê chó͘-sian tī Iû-tāi-ông O͘-se-a ê sî in-ūi tōe-tāng teh tô-cháu siâng-khoán. Siōng Chú — góa ê Siōng-tè ōe chhōa só͘-ū ê sèng-chiá chòe-hé lâi.

6Hit-ji̍t, bô ji̍t-kng, bōe kôaⁿ, bōe lo̍h-sng. 7Koh ū chi̍t ê te̍k-pia̍t ê ji̍t, chí-ū Siōng Chú chai; bô hun ji̍t--sî á-sī mî--sî, in-ūi mî--sî mā ū kng.

8Hit-ji̍t ōe ū oa̍h-chúi tùi Iâ-lō͘-sat-léng lâu--chhut-lâi; chi̍t-pòaⁿ lâu-khì tang-pêng ê Sí-hái, chi̍t-pòaⁿ lâu-khì sai-pêng ê Tōe-tiong-hái; tang-thiⁿ hē-thiⁿ lóng sī án-ni.

9Siōng Chú beh chòe choân-tōe ê Ông. Hit-ji̍t, Siōng Chú chì-chun-bû-tùi, I ê miâ to̍k-it-bû-jī. 10Tùi pak-pêng ê Ka-pa kàu Iâ-lō͘-sat-léng lâm-pêng ê Lîm-bûn, choân-pō͘ ê tōe-khu lóng ōe pìⁿ-chòe pêng-goân. Iâ-lō͘-sat-léng tī goân-ūi koân-koân khiā--teh, siâⁿ ê hoān-ûi tùi Piān-ngá-bín-mn̂g keng-kè Kū-mn̂g kàu Kak-mn̂g; tùi Hap-lâm-gia̍p-lâu kàu ông ê chiú-khut. 11Iâ-lō͘-sat-léng ōe ū chin chōe lâng tī hia an-ku-lo̍k-gia̍p, bōe koh ū siū húi-bia̍t ê chiù-chó͘.

12Hiah-ê kong-kek Iâ-lō͘-sat-léng ê lia̍t-kok, Siōng Chú beh kàng chai-hō hō͘ in; in iáu oa̍h--teh ê sî, bah ōe nōa--khì, ba̍k-chiu kap chi̍h mā lóng ōe nōa--khì. 13Tī hit-ji̍t, Siōng Chú beh hō͘ in khí hūn-loān; in khiú-lâi-khiú-khì, hō͘-siōng kong-kek. 14Iû-tāi mā beh tī Iâ-lō͘-sat-léng chham-chiàn; hit-sî, chiu-ûi lia̍t-kok chin chōe châi-bu̍t, chiū-sī kim, gûn, i-ho̍k, lóng ōe siu-chi̍p óa--lâi. 15Siâng-khoán ê chai-hō mā ōe lîm-kàu te̍k-jîn ê bé, lô, lo̍k-tô, lû, í-ki̍p iâⁿ-tiong só͘-ū ê cheng-siⁿ.

16Só͘-ū lâi kong-kek Iâ-lō͘-sat-léng ê lia̍t-kok iáu oa̍h--lo̍h-lâi ê lâng, ta̍k-nî ōe chiūⁿ-lâi kèng-pài Siōng Chú — Bān-kun ê Thóng-sòe chit-ūi Kun-ông, koh siú Tah-liâu-choeh. 17Tōe-chiūⁿ bān-cho̍k tiong, bô chiūⁿ-lâi Iâ-lō͘-sat-léng kèng-pài Siōng Chú — Bān-kun ê Thóng-sòe chit-ūi Kun-ông ê lâng, hō͘-chúi bōe lo̍h tī in ê thó͘-tōe. 18Ai-ki̍p-lâng nā bô chiūⁿ-lâi siú-choeh, Siōng Chú bōe lo̍h hō͘-chúi tī in ê thó͘-tōe, Siōng Chú mā ōe ēng un-e̍k hêng-hoa̍t hiah-ê bô lâi siú Tah-liâu-choeh ê lia̍t-kok. 19Che chiū-sī Ai-ki̍p kap hiah-ê bô chiūⁿ-lâi siú Tah-liâu-choeh ê lia̍t-kok só͘ siū ê hêng-hoa̍t.

20Tī hit-ji̍t, bé ê hâm-lêng ōe khek-jī, “Sèng-hòa kui Siōng Chú”; Siōng Chú sèng-tiān lāi ê tiáⁿ ōe chhin-chhiūⁿ chè-tôaⁿ chêng ê óaⁿ siâng-khoán sîn-sèng. 21Só͘-ū Iâ-lō͘-sat-léng kap Iû-tāi ê tiáⁿ, lóng ōe sèng-hòa kui Siōng Chú — Bān-kun ê Thóng-sòe; só͘-ū hiàn-chè ê lâng lóng ōe ēng chiah-ê tiáⁿ chú bah. Tī hit-ji̍t, bōe koh ū lâng tī Siōng Chú — Bān-kun ê Thóng-sòe ê sèng-tiān lāi bóe-bōe.

Currently Selected:

Sat-ka-lī-a-su 14: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Popular Bible Verses from
Sat-ka-lī-a-su 14

Video for Sat-ka-lī-a-su 14

Zechariah 12-14

BibleProject

Sat-ka-lī-a-su 14

Popular Bible Verses from
Sat-ka-lī-a-su 14

Video for Sat-ka-lī-a-su 14

Zechariah 12-14

Bible:

Chinese, Min Nan

Version: 現代台語譯本羅馬字版 - TTVR

Sat-ka-lī-a-su 14

Sat-ka-lī-a-su 14

Popular Bible Verses from Sat-ka-lī-a-su 14

Video for Sat-ka-lī-a-su 14

Zechariah 12-14

Bible:

Chinese, Min Nan

Version: 現代台語譯本羅馬字版 - TTVR

Sat-ka-lī-a-su 14

Popular Bible Verses from
Sat-ka-lī-a-su 14