Má-khó Hok-im 7

Chó͘-sian ê Thoân-thóng

(Thài 15.1-9)

1Ū hoat-lī-sài-phài ê lâng kap chi̍t-kóa tùi Iâ-lō͘-sat-léng lâi ê keng-ha̍k-kàu-su tàu-tīn lâi chhē Iâ-so͘. 2In khòaⁿ-tio̍h Iâ-so͘ ê bûn-tô͘ ū lâng ēng bô chheng-khì ê chhiú, chiū-sī bô sóe-chhiú chiū chia̍h-pn̄g.

3Goân-lâi Hoat-lī-sài-phài ê lâng kap só͘-ū ê Iû-thài-lâng lóng chip-siú chó͘-sian ê thoân-thóng, nā bô chiàu hoat-tō͘ sóe-chhiú chiū bô chia̍h-pn̄g; 4tùi chhī-tiûⁿ tò--lâi, nā bô sóe mā bô chia̍h. In koh chun-siú kî-tha chin chōe thoân-thóng ê kui-lē, chhin-chhiūⁿ sóe poe-á, koàn-á, tâng-khì, kap chhn̂g-pho͘, téng.#7.4 Ū ê chhau-pún bô “chhn̂g-pho͘”.

5Só͘-í, Hoat-lī-sài-phài ê lâng kap keng-ha̍k-kàu-su mn̄g Iâ-so͘, “Sī-án-chóaⁿ lí ê bûn-tô͘ ēng bô chheng-khì ê chhiú chia̍h-pn̄g, ûi-hoān chó͘-sian ê thoân-thóng?”

6Iâ-so͘ ìn kóng, “Í-sài-a só͘ kóng koan-hē lín chiah-ê ké-hó ê lâng ê ū-giân chin tio̍h; i án-ni siá:

Chit-ê chú-bîn ēng chhùi-tûn chun-kèng góa,

in ê sim khiok lī-khui góa hn̄g-hn̄g.

7In ēng lâng ê kui-lē chòe góa ê kà-sī kà-sī lâng;

in kèng-pài góa lóng bô-chhái-kang.

8Lín kèng-jiân pàng-sak Siōng-tè ê kài-bēng, khì chip-siú lâng ê thoân-thóng.”

9Iâ-so͘ koh kóng, “Lín ūi-tio̍h beh chip-siú thoân-thóng, ēng kháu-biāu ê hong-hoat lâi kū-choa̍t Siōng-tè ê kài-bēng. 10Mô͘-se bēng-lēng lín ‘Tio̍h hàu-kèng pē-bú’, koh kóng ‘Mē lāu-pē á-sī mē lāu-bú ê lâng eng-kai chhú-sí’. 11M̄-kú lín kóng, lâng nā tùi ka-kī ê lāu-pē á-sī lāu-bú kóng ‘Góa eng-kai hō͘ lí--ê í-keng chòe Kok-ní-pán’ — Kok-ní-pán ê ì-sù chiū-sī hiàn hō͘ Siōng-tè ê lé-mi̍h, 12lín chiū chún i bián hōng-ióng ka-kī ê pē-bú. 13Lín ēng lín só͘ thoân-siū ê thoân-thóng lâi hòe-tû Siōng-tè ê ōe. Lín koh chòe chin chōe chit-khoán ê tāi-chì.”

Sím-mi̍h Chiah Ōe Hō͘ Lâng Bô Chheng-khì

(Thài 15.10-20)

14Iâ-so͘ koh kiò chèng-lâng lâi, kā in kóng, “Lín tāi-ke lóng tio̍h thiaⁿ góa ê ōe, tio̍h liáu-kái: 15Tùi gōa-bīn ji̍p-khì lâng lāi-bīn ê mi̍h, bô chi̍t hāng ōe hō͘ lâng bô chheng-khì; tùi lāi-bīn chhut--lâi-ê, chiah ōe hō͘ lâng bô chheng-khì.”#7.15 Ū ê chhau-pún ū 16 chat “Ū hī-khang thang thiaⁿ--ê, tio̍h thiaⁿ!”

17Iâ-so͘ lī-khui chèng-lâng, ji̍p-khì chhù-lāi, I ê bûn-tô͘ chiū mn̄g I chit-ê phì-jū ê ì-sù. 18I kā in kóng, “Án-ni liân lín to bô bêng-pe̍k o͘h? Lín kiám bô liáu-kái, tùi gōa-bīn ji̍p-khì lâng lāi-bīn--ê lóng bōe hō͘ lâng bô chheng-khì? 19In-ūi tùi gōa-bīn ji̍p--khì-ê m̄-sī ji̍p-khì sim-lāi, sī ji̍p-khì pak-tó͘ lāi, āu-lâi pàng lo̍h-khì piān-só͘.” Iâ-so͘ án-ni kóng sī chí só͘-ū ê chia̍h-mi̍h lóng chheng-khì.

20I koh kóng, “Tùi lâng lāi-bīn chhut--lâi-ê chiah ōe hō͘ lâng bô chheng-khì. 21In-ūi tùi lāi-bīn chhut--lâi-ê, chiū-sī tùi lâng ê sim chhut--ê, ū pháiⁿ liām-thâu, su-thong, thau-the̍h, hiong-sat, 22kan-îm, tham-sim, siâ-ok, kan-chà, hòng-chhiòng, oàn-tò͘, húi-pòng, kiau-ngō͘, bōe-hiáu hun-pia̍t sī-hui. 23Chiah-ê it-chhè siâ-ok ê sū lóng sī tùi lāi-bīn chhut--lâi-ê, che chiah ōe hō͘ lâng bô chheng-khì.”

Gōa-pang Hū-jîn-lâng ê Sìn-sim

(Thài 15.21-28)

24Iâ-so͘ tùi hia chhut-hoat khì Thài-ní tōe-khu. I ji̍p-khì chi̍t keng chhù, bô ài lâng chai, put-kò bô hoat-tō͘ pó-bi̍t. 25Sûi-sî ū chi̍t ê hū-jîn-lâng thiaⁿ-tio̍h Iâ-so͘ ê tāi-chì, chiū lâi kūi tī I ê kha-chêng; i ê cha-bó͘-kiáⁿ hō͘ siâ-sîn hū-sin. 26Chit-ê hū-jîn-lâng sī chhut-sì tī Sū-lī-a Hui-nî-ki ê Hi-la̍h-lâng. I kiû Iâ-so͘ kā i ê cha-bó͘-kiáⁿ kóaⁿ-kúi. 27Iâ-so͘ kā i kóng, “Tio̍h seng hō͘ gín-á chia̍h; the̍h gín-á ê chia̍h-mi̍h hiat hō͘ káu-á chia̍h, m̄ hó.”

28Hū-jîn-lâng ìn kóng, “Chú ah, toh-á kha ê káu-á to chia̍h gín-á ê piáⁿ-iù-á.”

29Iâ-so͘ kā i kóng, “In-ūi lí chit-kù ōe, lí thang tńg--khì; kúi í-keng lī-khui lí ê cha-bó͘-kiáⁿ lah!”

30Hū-jîn-lâng tńg-khì in tau, khòaⁿ-tio̍h cha-bó͘-kiáⁿ tó tī chhn̂g--ni̍h, kúi í-keng lī-khui.

Iâ-so͘ I-tī Chi̍t Ê Lông-a ê Lâng

31Iâ-so͘ koh lī-khui Thài-ní tōe-khu, keng-kè Se-tùn í-ki̍p Te-ka-pho-lí tōe-khu, lâi kàu Ka-lī-lī-ô͘. 32Ū lâng chhōa chi̍t ê bōe thiaⁿ--kìⁿ koh bōe kóng-ōe ê lâng lâi Iâ-so͘ hia, khún-kiû Iâ-so͘ kā i hōaⁿ-chhiú. 33Iâ-so͘ chhōa hit-ê lâng lī-khui chèng-lâng khì piⁿ--á, chhng chńg-thâu-á ji̍p-khì i siang-pêng ê hī-khang, koh phùi-nōa boah i ê chi̍h, 34jiân-āu ǹg thiⁿ, thó͘-khùi, kā i kóng, “Í-hoat-tāi”, ì-sù chiū-sī “Khui!”

35Hit-lâng ê hī-khang sûi-sî khui, chi̍h-kun lēng, kóng-ōe kóng kah chin chheng-chhó. 36Iâ-so͘ giâm-giâm bēng-lēng in m̄-thang kā lâng kóng, m̄-kú I jú kìm-chí, in jú chhut-la̍t pò-iông. 37Tāi-ke lóng hui-siông tio̍h-kiaⁿ, kóng, “I ta̍k-hāng lóng chòe kah chin hó, liân bōe thiaⁿ--kìⁿ ê lâng to ōe thiaⁿ--kìⁿ, bōe kóng-ōe ê lâng to ōe kóng-ōe!”

Currently Selected:

Má-khó Hok-im 7: TTVR

Highlight

Copy