Má-khó Hok-im 5

Iâ-so͘ I-hó Siâ-sîn Hū-sin ê Lâng

(Thài 8.28-34; Lō͘ 8.26-39)

1Iâ-so͘ kè-khì Ka-lī-lī-ô͘ ê hit-pêng hōaⁿ, Kek-la-sim-lâng ê tōe-khu. 2I chi̍t-ē lo̍h-chûn, ū chi̍t ê hō͘ siâ-sîn hū-sin ê lâng tú tùi bōng-á-po͘ chhut--lâi, tú-tio̍h I. 3Chit-ê lâng lóng tòa tī bōng-á-po͘, lâng ēng thih-liān to kā i liān bōe tiâu. 4Chin chōe piàn lâng ēng thih-liān kap kha-khàu kā i khún-pa̍k, thih-liān hō͘ i chhoah-tn̄g, kha-khàu hō͘ i kòng-chhùi, bô lâng ū khùi-la̍t kā i chè-ho̍k. 5I mî-ji̍t tī bōng-á-po͘ á-sī soaⁿ-phiâⁿ loān jióng, koh ēng chio̍h-thâu siong-hāi ka-kī.

6I tī hn̄g-hn̄g ê só͘-chāi khòaⁿ-tio̍h Iâ-so͘, chiū cháu-lâi kūi tī I ê bīn-chêng, 7tōa-siaⁿ hoah, “Chì-koân Siōng-tè ê Kiáⁿ Iâ-so͘, lí mài chhap--góa! Góa kí Siōng-tè ê miâ khún-kiû#5.7 “khún-kiû” mā thang e̍k-chòe “bēng-lēng”. lí m̄-thang khó͘-chhó͘ góa.” 8In-ūi Iâ-so͘ ū tùi i kóng, “Siâ-sîn, tùi chit-ê lâng chhut--khì!”

9Iâ-so͘ mn̄g i, “Lí sím-mi̍h miâ?”

I ìn kóng, “Góa ê miâ sī ‘Kun-thoân’, in-ūi goán chin tōa-tīn.” 10I pek-chhiat ai-kiû Iâ-so͘ m̄-thang kóaⁿ in lī-khui hit-ê tōe-khu.

11Hit-sî, hù-kūn ê soaⁿ-phiâⁿ ū chi̍t tōa-kûn ti teh thó-chia̍h. 12Siâ-sîn kiû Iâ-so͘ kóng, “Hō͘ goán khì ti-kûn hia, thang ji̍p-khì in lāi-bīn.” 13Iâ-so͘ chún in. Siâ-sîn chiū chhut--khì, chìn-ji̍p hit-kûn ti; kui-kûn ti, iok ū nn̄g-chheng chiah, tùi soaⁿ-phiâⁿ chông lo̍h-khì ô͘--ni̍h, hō͘ chúi tū-sí.

14Chhī ti ê lâng chiū kiaⁿ kah cháu-khì siâⁿ-lāi kap hiong-chhoan pò chit-ê siau-sit. Chèng-lâng chiū chhut-lâi beh khòaⁿ ū hoat-seng sím-mi̍h tāi-chì. 15In lâi Iâ-so͘ hia, khòaⁿ-tio̍h hit-ê hō͘ kúi hū-sin, chiū-sī bat hō͘ “Kun-thoân” tîⁿ--tio̍h ê lâng chē tī hia, ū chhēng-saⁿ, cheng-sîn chèng-siông, chiū chin tio̍h-kiaⁿ. 16Khòaⁿ--tio̍h ê lâng chiū chiong hō͘ kúi hū-sin ê lâng kap ti-kûn só͘ tú--tio̍h ê tāi-chì kā lâng kóng. 17In chiū iau-kiû Iâ-so͘ lī-khui in ê tōe-khu.

18Iâ-so͘ beh chiūⁿ-chûn ê sî, bat hō͘ kúi hū-sin hit-ê lâng kiû Iâ-so͘ chún i chòe-hé khì.

19Iâ-so͘ m̄-chún, kā i kóng, “Tńg-khì lín tau, lín chhin-lâng hia, chiong Chú lîn-bín lí, tùi lí só͘ chòe hiah-ni̍h tōa ê tāi-chì lóng pò in chai.”

20Hit-ê lâng chiū lī-khui, tī Te-ka-pho-lí thoân-iông Iâ-so͘ tùi i só͘ chòe hiah-ni̍h tōa ê tāi-chì; só͘-ū ê lâng lóng tio̍h-kiaⁿ kî-koài.

Hōe-tn̂g Chú-koán ê Cha-bó͘-kiáⁿ kap Tì-tio̍h Hiat-lāu-pīⁿ ê Hū-jîn-lâng

(Thài 9.18-26; Lō͘ 8.40-56)

21Iâ-so͘ koh chē-chûn kè-khì ô͘ ê hit-pêng hōaⁿ; I tī ô͘-piⁿ, ū chi̍t tōa-tīn lâng chū-chi̍p óa--lâi. 22Ū chi̍t ê hōe-tn̂g ê chú-koán kiò-chòe Ia̍p-ló͘ lâi, chi̍t-ē khòaⁿ-tio̍h Iâ-so͘ chiū phak tī I ê kha-chêng, 23khún-kiû I, kóng, “Góa ê sòe-hàn cha-bó͘-kiáⁿ teh-beh sí ah, chhiáⁿ lí lâi kā i hōaⁿ-chhiú, i-hó, hō͘ i ōe oa̍h.”

24Iâ-so͘ chiū kap i khì; ū chi̍t tōa-tīn lâng mā oe-oe-khoeh-khoeh tè I khì.

25Ū chi̍t ê hū-jîn-lâng tì-tio̍h hiat-lāu-pīⁿ cha̍p-jī nî kú; 26i ū hō͘ chin chōe i-seng khòaⁿ--kè, siū-tio̍h chin chōe thòng-khó͘, koh chîⁿ lóng khai-liáu-liáu, i ê pīⁿ m̄-nā bô khah hó, tian-tò ná siong-tiōng. 27I ū thiaⁿ-tio̍h Iâ-so͘ ê tāi-chì, chiū khoeh ji̍p-khì kûn-chiòng lāi-bīn, kiâⁿ óa-khì Iâ-so͘ ê āu-bīn, bong I ê saⁿ. 28I siūⁿ-kóng, “Góa kan-ta bong-tio̍h I ê saⁿ, pīⁿ chiū ōe hó.”

29I ê hiat-lāu sûi-sî chí, kám-kak seng-khu ê pīⁿ í-keng hó. 30Iâ-so͘ sûi-sî chai ū khùi-la̍t tùi I chhut--khì, chiū oa̍t--kè-lâi, mn̄g kûn-chiòng, “Sím-mi̍h-lâng bong góa ê saⁿ?”

31Bûn-tô͘ ìn kóng, “Lí khòaⁿ kui-tīn lâng teh kā lí khoeh, lí ná ōe kóng ‘Sím-mi̍h-lâng kā góa bong’?”

32Iâ-so͘ sì-kho͘-lìn-tńg khòaⁿ chi̍t-ē, ài chai sím-mi̍h-lâng kā I bong. 33Hit-ê hū-jîn-lâng chai tī i sin-chiūⁿ só͘ hoat-seng ê tāi-chì, kiaⁿ kah phi̍h-phi̍h-chhoah, chiū phak tī Iâ-so͘ kha-chêng, chiong lóng-chóng ê si̍t-chêng kóng--chhut-lâi. 34Iâ-so͘ kā i kóng, “Cha-bó͘-kiáⁿ, lí ê sìn-sim hō͘ lí hó--khì lah, pêng-an tò--khì, lí ê pīⁿ í-keng hó ah.”

35Iâ-so͘ iáu-teh kóng ê sî, ū lâng tùi hōe-tn̂g chú-koán ê chhù lâi, kā Ia̍p-ló͘ kóng, “Lí ê cha-bó͘-kiáⁿ í-keng sí--khì, ná tio̍h koh lô-hoân lāu-su.”

36Iâ-so͘ ū thiaⁿ-tio̍h in kóng ê ōe, chiū tùi hōe-tn̂g chú-koán kóng, “M̄-bián kiaⁿ, chí-ū tio̍h sìn!” 37I chiū chhōa Pí-tek, Ngá-kok, kap Ngá-kok ê sió-tī Iok-hān chòe-hé khì, í-gōa m̄-chún pa̍t-lâng tè--khì. 38In lâi kàu hōe-tn̂g chú-koán ê chhù, Iâ-so͘ khòaⁿ-tio̍h tiûⁿ-bīn chin loān, ū lâng teh háu, ū lâng tōa-siaⁿ teh khàu. 39I chi̍t-ē ji̍p--khì chiū kā in kóng, “Lín ná khàu kah loān-chhau-chhau? Chit-ê gín-á m̄-sī sí--khì, sī teh khùn.”

40In chiū kā I thí-chhiò, m̄-kú I kā in lóng kóaⁿ--chhut-khì, jiân-āu chhōa gín-á ê pē-bú kap hit saⁿ ê bûn-tô͘ ji̍p-khì gín-á ê pâng-keng. 41I khan gín-á ê chhiú, tùi i kóng, “Tāi-lī-tāi kó͘-bí!” ì-sù chiū-sī “Cha-bó͘ gín-á, góa kā lí kóng, khí--lâi!”

42Cha-bó͘ gín-á sûi-sî peh khí-lâi kiâⁿ, in-ūi i í-keng cha̍p-jī hè. In hui-siông tio̍h-kiaⁿ. 43Iâ-so͘ giâm-giâm kéng-kài in m̄-thang chiong chit-ê tāi-chì hō͘ lâng chai, koh kiò in the̍h mi̍h-kiāⁿ hō͘ cha-bó͘ gín-á chia̍h.

Currently Selected:

Má-khó Hok-im 5: TTVR

Highlight

Copy