Má-thài Hok-im 28

Iâ-so͘ ê Koh-oa̍h

(Khó 16.1-10; Lō͘ 24.1-12; Iok 20.1-10)

1An-hioh-ji̍t kè-liáu, Lé-pài-ji̍t#28.1 “Lé-pài-ji̍t” goân-bûn sī “Chhit ji̍t ê thâu chi̍t ji̍t”, chiū-sī Iû-thài-le̍k ta̍k lé-pài ê tē-it ji̍t. thiⁿ beh kng ê sî, Boa̍t-tāi-lia̍p ê Má-lī-a kap pa̍t-ê Má-lī-a khì thàm-bōng. 2Hut-jiân, ū tōa tōe-tāng, in-ūi Chú ê chi̍t ê thiⁿ-sài tùi thiⁿ kàng-lîm, chiong hit-tè chio̍h-thâu kō-khui, chē tī hit téng-bīn. 3I ê bīn-māu chhin-chhiūⁿ sih-nà, i ê saⁿ chhin-chhiūⁿ seh hiah-ni̍h pe̍h. 4Hiah-ê kò͘-siú ê ōe-peng kiaⁿ kah phi̍h-phi̍h-chhoah, soah pìⁿ-chòe chhin-chhiūⁿ sí-lâng.

5Hit-ê thiⁿ-sài kā hiah-ê hū-jîn-lâng kóng, “M̄-bián kiaⁿ; góa chai lín teh chhē hō͘ lâng tèng si̍p-jī-kè ê Iâ-so͘. 6I bô tī chia, chiàu I só͘ kóng, I í-keng koh-oa̍h. Lâi, lâi khòaⁿ I tó ê só͘-chāi. 7Lín kóaⁿ-kín khì kā I ê bûn-tô͘ kóng, ‘I í-keng tùi sí-lâng tiong koh-oa̍h lah. I pí lín seng khì Ka-lī-lī, tī hia lín ōe kìⁿ-tio̍h I.’ Tio̍h ōe-kì-tit góa í-keng ū kā lín kóng lah.”

8In chiū kóaⁿ-kín lī-khui bōng, iā kiaⁿ iā tōa hoaⁿ-hí, cháu-khì kā Iâ-so͘ ê bûn-tô͘ kóng.

9Hut-jiân, Iâ-so͘ chhut-hiān, tùi in kóng, “Tāi-ke pêng-an!” In kiâⁿ chìn-chêng lám I ê kha, kā I pài. 10Iâ-so͘ kā in kóng, “M̄-bián kiaⁿ! Khì kā góa ê hiaⁿ-tī kóng, kiò in khì Ka-lī-lī, tī hia in ōe kìⁿ-tio̍h góa.”

Ōe-peng ê Pò-kò

11Hiah-ê hū-jîn-lâng lī-khui ê sî, ū chi̍t-kóa kò͘-siú bōng ê ōe-peng ji̍p-khì siâⁿ-lāi, chiong só͘ hoat-seng ê tāi-chì lóng kā chè-si-tiúⁿ pò-kò. 12Chè-si-tiúⁿ kap tiúⁿ-ló chū-chi̍p chham-siông liáu-āu, the̍h chin chōe gûn-á hō͘ hiah-ê peng, 13kóng, “Lín tio̍h án-ni kóng, ‘I ê bûn-tô͘ àm-sî lâi, tī goán teh khùn ê sî chiong I ê sin-si thau-the̍h--khì.’ 14Bān-it chóng-tok thiaⁿ-tio̍h chit-ê tāi-chì, goán ōe khì kā i an-tah, pau lín bô tāi-chì.”

15Ōe-peng chiū the̍h hiah-ê gûn-á chiàu in só͘ hoan-hù--ê khì chòe. Chit-ê tāi-chì kàu kin-á-ji̍t iáu tī Iû-thài-lâng ê tiong-kan teh liû-thoân.

Chhe-khián Bûn-tô͘

(Khó 16.14-18; Lō͘ 24.36-49; Iok 20.19-23; Tô͘ 1.6-8)

16Cha̍p-it ê bûn-tô͘ khì Ka-lī-lī, kàu Iâ-so͘ chí-tēng in khì hit-chō soaⁿ-téng. 17In kìⁿ-tio̍h Iâ-so͘ chiū kā I pài, put-kò ū lâng iáu-teh giâu-gî.

18Iâ-so͘ kiâⁿ óa-khì kā in kóng, “Siōng-tè í-keng chiong thiⁿ-téng tōe-ē it-chhè ê koân-pèng lóng hō͘ góa. 19Só͘-í, lín tio̍h khì chio bān-bîn lâi chòe bûn-tô͘, kā in sóe-lé, hō͘ in kui tī Pē, Kiáⁿ, Sèng Sîn ê miâ#28.19 “kā in...ê miâ” mā thang e̍k-chòe “hōng Pē, Kiáⁿ, Sèng Sîn ê miâ kā in sóe-lé”., 20kà-sī in chun-siú góa só͘ hō͘ lín it-chhè ê bēng-lēng. Tio̍h ōe-kì--tit, góa ta̍k-ji̍t kap lín tông-chāi, ti̍t-kàu kim-sè ê kiat-sok.”

Currently Selected:

Má-thài Hok-im 28: TTVR

Highlight

Copy