Má-la-ki-su 2

1Siōng Chú — Bān-kun ê Thóng-sòe tùi lín chiah-ê chè-si kóng, “Chit-ê bēng-lēng sī hō͘ lín--ê: 2Lín nā m̄ thiaⁿ-thàn, m̄ khǹg tī sim-lāi, bô chiong êng-kng kui hō͘ góa, góa chiū beh hō͘ chiù-chó͘ lîm-kàu lín, hō͘ lín ê hok-khì pìⁿ-chòe chiù-chó͘. Bô m̄-tio̍h, góa í-keng kā lín chiù-chó͘ lah, in-ūi lín bô chiong góa ê bēng-lēng khǹg tī sim-lāi. 3Góa beh chek-hoa̍t lín ê hō͘-tāi, ēng lín tī choeh-kî hiàn ê cheng-siⁿ ê pùn boah lín ê bīn, kā lín the̍h chhut-khì pùn-tui hiat-ka̍k. 4Hit-sî lín chiū chai góa ū hō͘ lín chit-ê bēng-lēng, sī beh hō͘ góa kap Lī-bī ê hō͘-tāi só͘ li̍p ê iok ōe-tàng khak-li̍p. Siōng Chú — Bān-kun ê Thóng-sòe án-ni soan-kò.

5“Góa kap Lī-bī ê hō͘-tāi li̍p ê iok sī èng-ún sù oa̍h-miā kap hô-pêng ê iok, bo̍k-te̍k sī ài in kèng-ùi góa. In khak-si̍t ū kèng-ùi góa, chun-tiōng góa. 6In ū thoân-siū chin-lí ê kà-sī, bô kóng put-gī ê ōe. In kap góa kâng pō͘-tiau kiâⁿ hô-pêng chèng-ti̍t ê lō͘, hō͘ chin chōe lâng oa̍t tò-tńg lī-khui chōe-ok. 7Chè-si ê chek-jīm sī ûi-hō͘ tì-sek, lâng-lâng tio̍h tùi in chhē-kiû kà-sī, in-ūi in sī Siōng Chú — Bān-kun ê Thóng-sòe ê sù-chiá.

8“M̄-kú lín chiah-ê chè-si lī-khui chiàⁿ-lō͘, hō͘ chin chōe lâng in-ūi lín ê kà-sī poa̍h-tó hoān-chōe. Lín í-keng phò-hoāi góa kap Lī-bī-lâng li̍p ê iok. Siōng Chú — Bān-kun ê Thóng-sòe án-ni kóng. 9Só͘-í, góa tian-tò beh hō͘ Í-sek-lia̍t chú-bîn kā lín khòaⁿ-khin, hō͘ lín tī tāi-chiòng bīn-chêng siū lêng-jio̍k; in-ūi lín bô chun-siú góa ê chí-ì, khòaⁿ lâng ê bīn-sek kóe-seh lu̍t-hoat.”

Jîn-bîn tùi Siōng Chú Put-tiong Pōe-sìn

10Lán tāi-ke kiám m̄-sī ū siâng chi̍t ê lāu-pē? Kiám m̄-sī siâng chi̍t ūi Siōng-tè chhòng-chō lán? Án-ni, sī-án-chóaⁿ lán hō͘-siōng pōe-sìn, ûi-pōe Siōng-tè kap lán lia̍t-chó͘ só͘ li̍p ê iok? 11Iû-tāi jîn-bîn ê hêng-ûi khúi-chà, tī Í-sek-lia̍t kap Iâ-lō͘-sat-léng chòe khó-ò͘ⁿ ê tāi-chì, in-ūi in ū phah lâ-sâm Siōng Chú só͘ ì-ài ê sèng-tiān, chhōa ho̍k-sāi gōa-pang sîn-bêng ê lú-chú chòe bó͘. 12Chòe chit-khoán tāi-chì--ê, bô-lūn sím-mi̍h khoán lâng, sui-jiân in hiàn chè-mi̍h hō͘ Siōng Chú, goān Siōng Chú — Bān-kun ê Thóng-sòe tùi Í-sek-lia̍t cho̍k-kûn tiong kā in kóaⁿ-chhut.

13Lín lēng-gōa ū koh chòe chi̍t hāng tāi-chì. Lín pi-chhám ai-khàu, ba̍k-sái im-móa Siōng Chú ê chè-tôaⁿ, in-ūi I bô koh-chài hoaⁿ-hí chiap-la̍p lín hiàn hō͘ I ê chè-mi̍h. 14Lín mn̄g, “Sī-án-chóaⁿ Siōng Chú bô ài chiap-la̍p?” Sī in-ūi lí ū pōe-poān lí siàu-liân ê sî chhōa ê bó͘, i sī lí ê phit-phòe, lí ū kap i li̍p-iok. Siōng Chú sī lí kap i tiong-kan ê chèng-jîn. 15Lâng nā-sī iáu ū chi̍t-sut-á lêng-sèng, i bōe án-ni chòe. Siōng-tè só͘ ì-ài--ê kiám m̄-sī tùi I tiong-sêng ê hō͘-tāi? Só͘-í, tio̍h kín-sīn, m̄-thang pōe-poān lín siàu-liân ê sî chhōa ê bó͘. 16Siōng Chú — Í-sek-lia̍t ê Siōng-tè án-ni kóng, “Góa thó-ià lî-hun. Góa thó-ià lín tiong-kan ū lâng tùi ka-kī ê bó͘ chòe chit-khoán chân-jím ê tāi-chì. Só͘-í, tio̍h kín-sīn, m̄-thang tùi ka-kī ê bó͘ put-tiong pōe-sìn.” Siōng Chú — Bān-kun ê Thóng-sòe án-ni soan-pò͘.

Sím-phòaⁿ ê Ji̍t Teh-beh Kàu

17Lín ê tâm-lūn hō͘ Siōng Chú ià-siān chhau-hoân. Lín iáu-teh mn̄g, “Goán án-chóaⁿ teh hō͘ I ià-siān chhau-hoân?” Sī in-ūi lín kóng, “Siōng Chú khòaⁿ só͘-ū choh-pháiⁿ ê lâng chòe hó-lâng, koh kah-ì chit-khoán lâng.” Koh kóng, “Kong-gī ê Siōng-tè tī tó-ūi?”

Currently Selected:

Má-la-ki-su 2: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Videos for Má-la-ki-su 2

Malachi

BibleProject

Malachi 1-2

BibleProject

Má-la-ki-su 2

Popular Bible Verses from
Má-la-ki-su 2

Bible:

Chinese, Min Nan

Version: 現代台語譯本羅馬字版 - TTVR

Má-la-ki-su 2

Videos for Má-la-ki-su 2

Malachi

Malachi 1-2

Má-la-ki-su 2

Popular Bible Verses from Má-la-ki-su 2

Bible:

Chinese, Min Nan

Version: 現代台語譯本羅馬字版 - TTVR

Má-la-ki-su 2

Videos for Má-la-ki-su 2

Malachi

Malachi 1-2

Popular Bible Verses from
Má-la-ki-su 2