Lō͘-ka Hok-im 7

Iâ-so͘ I-hó Lô-má Kun-koaⁿ ê Po̍k-jîn

(Thài 8.5-13; Iok 4.43-54)

1Iâ-so͘ kóng hō͘ bîn-chiòng thiaⁿ ê ōe lóng kóng soah, chiū ji̍p-khì Ka-pek-lông. 2Ū chi̍t ê Lô-má kun-koaⁿ, i só͘ tiōng-iōng ê po̍k-jîn phòa-pīⁿ, pīⁿ kah teh-beh sí. 3Kun-koaⁿ thiaⁿ-tio̍h Iâ-so͘ ê tāi-chì, chiū chhe kúi-nā ê Iû-thài-lâng ê tiúⁿ-ló khì Iâ-so͘ hia, chhiáⁿ Iâ-so͘ lâi i-tī i ê po̍k-jîn. 4Chiah-ê tiúⁿ-ló kàu Iâ-so͘ hia, khún-chhiat kiû I kóng, “Chit-ê lâng ōe-kham-tit lí kā i pang-chān, 5in-ūi i ài-hō͘ lán Iû-thài-lâng, koh kā lán khí hōe-tn̂g.”

6Iâ-so͘ chiū kap in khì. Iâ-so͘ teh-beh kàu i ê chhù ê sî, hit-ê kun-koaⁿ chhe kúi-nā ê pêng-iú lâi kā I kóng, “Chú ah, m̄-thang lô-hoân lí, lí lâi goán tau, góa bōe-kham--tit. 7Só͘-í góa chiah m̄-káⁿ ka-kī lâi kìⁿ lí. Lí chí-ū kóng chi̍t kù ōe, góa ê po̍k-jîn chiū ōe hó. 8In-ūi góa sī hō͘ lâng koán ê lâng, mā ū peng hō͘ góa koán. Góa kā chit-ê kóng ‘Khì’, i chiū khì; kā pa̍t-ê kóng ‘Lâi’, i chiū lâi; kā góa ê po̍k-jîn kóng ‘Lí chòe chit-ê’, i chiū khì chòe.” 9Iâ-so͘ thiaⁿ-tio̍h chiah-ê ōe tùi i kám-kak chin ì-gōa, oa̍t-tńg-sin kā tè I ê kûn-chiòng kóng, “Góa kā lín kóng, liân tī Í-sek-lia̍t-lâng ê tiong-kan, góa to iáu m̄-bat khòaⁿ-tio̍h chit-khoán ê sìn-sim.”

10Siū chhe ê lâng tńg-khì kun-koaⁿ ê chhù, khòaⁿ-tio̍h po̍k-jîn í-keng hó--khì.

Iâ-so͘ Hō͘ Kóaⁿ-hū ê Kiáⁿ Koh-oa̍h

11Kè bô jōa kú, Iâ-so͘ khì chi̍t ê siâⁿ, kiò-chòe Ná-in. I ê bûn-tô͘ kap kui tōa-tīn lâng tè I khì. 12Iâ-so͘ beh kàu siâⁿ-mn̂g ê sî, tú-hó ū lâng kng chi̍t ê sí-lâng chhut--lâi, i ê lāu-bú ko͘-ko͘ siⁿ chit-ê kiáⁿ, koh sī kóaⁿ-hū. Ū chi̍t tīn siâⁿ-lāi ê lâng chhut-lâi sàng-chòng. 13Chú chi̍t-ē khòaⁿ-tio̍h chit-ê kóaⁿ-hū chiū khó-lîn i, kā i kóng, “M̄-thang khàu!” 14Jiân-āu Iâ-so͘ kiâⁿ óa-khì hōaⁿ kng sin-si ê kè, kng ê lâng chiū thêng-kha. Iâ-so͘ kóng, “Siàu-liân-lâng, góa kā lí kóng, ‘Khí--lâi!’” 15Hit-ê sí-lâng chiū peh khí-lâi chē, khui-chhùi kóng-ōe. Iâ-so͘ chiū chiong i kau hō͘ i ê lāu-bú.

16Chèng-lâng lóng hui-siông kiaⁿ-hiâⁿ, chiong êng-kng kui hō͘ Siōng-tè, kóng, “Lán tiong-kan ū chhut-hiān chi̍t ūi tōa sian-ti lah!” Koh kóng, “Siōng-tè ū khòaⁿ-kò͘ I ê chú-bîn!”

17Koan-hē Iâ-so͘ chit-ê hong-siaⁿ thoân kàu choân Iû-thài kap chiu-ûi ta̍k tōe-khu.

Si-sóe-chiá Iok-hān Chhe Bûn-tô͘ Khì Kìⁿ Iâ-so͘

(Thài 11.2-19)

18 Iok-hān ê bûn-tô͘ chiong chiah-ê tāi-chì lóng kā Iok-hān pò-kò. Iok-hān chiū kiò nn̄g ê bûn-tô͘ lâi, 19chhe in khì kìⁿ Chú, kóng, “Lí chiū-sī teh-beh lâi Hit-ūi, á-sī goán tio̍h thèng-hāu pa̍t-lâng?” 20Chiah-ê lâng lâi kàu Iâ-so͘ hia, chiū kóng, “Si-sóe-chiá Iok-hān chhe goán lâi mn̄g lí kóng ‘Lí chiū-sī teh-beh lâi Hit-ūi, á-sī goán tio̍h thèng-hāu pa̍t-lâng?’”

21Tú hit-sî, Iâ-so͘ ū i-hó chin chōe sin-khó͘-pīⁿ-thiàⁿ kap hō͘ siâ-sîn hū-sin ê lâng, koh hō͘ chin chōe sit-bêng ê lâng ōe khòaⁿ--kìⁿ. 22Iâ-so͘ ìn kóng, “Lín tńg-khì kā Iok-hān pò-kò lín só͘ khòaⁿ--tio̍h kap thiaⁿ--tio̍h-ê, chiū-sī sit-bêng ê lâng koh khòaⁿ--kìⁿ, kha-pái ê lâng kiâⁿ-lō͘, bâ-hong pīⁿ-lâng chheng-khì, hī-khang bōe thiaⁿ--kìⁿ ê lâng thiaⁿ--kìⁿ, sí-lâng koh-oa̍h, sàn-chhiah-lâng ū hó-siau-sit thoân hō͘ in. 23Tùi góa bô sit-khì sìn-sim ê lâng chin ū hok-khì!”

24 Iok-hān chhe--lâi ê lâng lī-khui liáu-āu, Iâ-so͘ chiah tùi kûn-chiòng kóng-khí Iok-hān ê sū. I kóng, “Lín chhut-khì khòng-iá sī beh khòaⁿ sím-mi̍h? Beh khòaⁿ hō͘ hong chhe iô-lâi-iô-khì ê lô͘-úi sī--bô? 25Nā m̄-sī, lín chhut--khì beh khòaⁿ sím-mi̍h? Beh khòaⁿ chhēng ko-kùi i-ho̍k ê lâng sī--bô? Lín khòaⁿ, chhēng chhia-hoa ê i-ho̍k seng-oa̍h chhia-chhí ê lâng sī tī ông-kiong. 26Án-ni, lín chhut--khì beh khòaⁿ sím-mi̍h? Beh khòaⁿ sian-ti sī--bô? Sī, m̄-kú góa kā lín kóng, i pí sian-ti koh-khah úi-tāi. 27Koan-hē Iok-hān, Sèng-keng ū án-ni kì-chài:

Khòaⁿ ah, góa chhe góa ê sù-chiá chòe lí ê sian-hong;

i beh tī lí ê thâu-chêng kā lí khui-lō͘.

28Góa kā lín kóng, hū-jîn-lâng só͘ siⁿ--ê bô chi̍t ê pí Iok-hān khah úi-tāi; m̄-kú, tī Siōng-tè-kok siōng bî-sòe--ê iáu pí i koh-khah úi-tāi!”

29Thiaⁿ-tio̍h chiah-ê ōe ê bîn-chiòng kap ba̍uh-sè--ê mā lóng sêng-jīn Siōng-tè sī kong-gī, in-ūi in ū niá-siū Iok-hān ê sóe-lé. 30M̄-kú Hoat-lī-sài-phài ê lâng kap lu̍t-hoat-kàu-su lóng kū-choa̍t Siōng-tè tùi in só͘ tēng ê chí-ì, bô niá-siū Iok-hān ê sóe-lé.

31Iâ-so͘ koh kóng, “Án-ni, chit sè-tāi ê lâng góa beh ēng sím-mi̍h lâi pí-phēng? In chhin-chhiūⁿ sím-mi̍h? 32In chhin-chhiūⁿ chi̍t tīn gín-á chē tī chhī-tiûⁿ-kháu tùi tâng-phōaⁿ hō͘-siōng hoah:

Goán tùi lín pûn phín-á, lín bô thiàu-bú!

Goán chhiùⁿ ai-ko, lín mā bô khàu!

33Si-sóe-chiá Iok-hān lâi, bô chia̍h-pn̄g, bô lim-chiú, lín chiū kóng, ‘I hō͘ kúi hū-sin!’ 34Jîn-chú lâi, mā chia̍h mā lim, lín chiū kóng, ‘I sī tham-chia̍h hò͘ⁿ-chiú ê lâng, sī ba̍uh-sè--ê kap chōe-jîn ê pêng-iú.’ 35Tì-hūi sī tùi ū tì-hūi ê lâng tit-tio̍h chèng-si̍t.”

Ū-chōe ê Hū-jîn-lâng Tit-tio̍h Sià-bián

36Ū chi̍t ê Hoat-lī-sài-phài ê lâng chhiáⁿ Iâ-so͘ chia̍h-pn̄g, Iâ-so͘ chiū ji̍p-khì hit-ê Hoat-lī-sài-lâng ê chhù chē-toh chia̍h-pn̄g. 37Hit-ê siâⁿ-lāi ū chi̍t ê ū-chōe ê hū-jîn-lâng, i chai Iâ-so͘ tī hit-ê Hoat-lī-sài-lâng ê chhù teh chia̍h-pn̄g, chiū tòa chi̍t koàn tóe phang-iû ê ge̍k-pân lâi. 38I khiā tī Iâ-so͘ ê āu-bīn, óa I ê kha teh khàu, ba̍k-sái tih-tâm I ê kha, chiū ēng ka-kī ê thâu-mn̂g kā chhit, koh ti̍t-ti̍t chim I ê kha, ēng phang-iû kā boah. 39Chhiáⁿ Iâ-so͘ hit-ê Hoat-lī-sài-lâng chi̍t-ē khòaⁿ--tio̍h, sim-lāi siūⁿ, “Chit-ê lâng nā-sī sian-ti, it-tēng ōe chai teh kā I bong--ê sī siáⁿ-lâng, sī sím-mi̍h khoán cha-bó͘-lâng, in-ūi i sī chōe-jîn.”

40Iâ-so͘ chiū tùi i kóng, “Se-bûn, góa ū ōe beh kā lí kóng.”

Se-bûn kóng, “Lāu-su, chhiáⁿ kóng.”

41Iâ-so͘ chiū kóng, “Ū nn̄g ê lâng tùi chi̍t ê chè-chú chioh-chîⁿ, chi̍t ê khiàm i gō͘-pah ê gûn-á, iáu chi̍t ê khiàm i gō͘-cha̍p. 42In bô hoat-tō͘ thang hêng, chè-chú chiū chhat-siau in ê chè. Án-ni, tó chi̍t ê ōe khah thiàⁿ chè-chú?”

43 Se-bûn ìn kóng, “Góa siūⁿ sī chè siū chhat-siau khah chōe hit-ê.”

Iâ-so͘ kā i kóng, “Lí ê phòaⁿ-toàn chin tio̍h.” 44Jiân-āu Iâ-so͘ oa̍t-thâu ǹg hū-jîn-lâng, tùi Se-bûn kóng, “Lí ū khòaⁿ-tio̍h chit-ê hū-jîn-lâng bô? Góa ji̍p lí ê chhù, lí bô ēng chúi hō͘ góa sóe-kha, m̄-kú i ēng ba̍k-sái tih-tâm góa ê kha, koh ēng i ê thâu-mn̂g chhit. 45Lí bô kā góa chim, m̄-kú góa ji̍p--lâi liáu-āu, i ti̍t-ti̍t chim góa ê kha. 46Lí bô ēng iû boah góa ê thâu-khak, m̄-kú i ēng phang-iû boah góa ê kha. 47Só͘-í, góa kā lí kóng, i thiàⁿ khah chōe, piáu-sī i chin chōe ê chōe-kò í-keng ū tit-tio̍h sià-bián. Tit-tio̍h sià-bián khah chió, thiàⁿ chiū chió.”

48Iâ-so͘ chiū kā hū-jîn-lâng kóng, “Lí ê chōe tit-tio̍h sià-bián lah.”

49Kâng-toh hiah-ê lâng sim-lāi siūⁿ, “Chit-ê tàu-tóe sī sím-mi̍h-lâng, I kèng-jiân sià-bián lâng ê chōe!”

50Iâ-so͘ kā hit-ê hū-jîn-lâng kóng, “Lí ê sìn-sim ū kiù lí; pêng-an tò--khì.”

Currently Selected:

Lō͘-ka Hok-im 7: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Popular Bible Verses from
Lō͘-ka Hok-im 7

Videos for Lō͘-ka Hok-im 7

Jesus Forgives Sinful Woman

Jesus Film Project

Centurion: The Book of Luke

Eyewitness Bible Series

Episode 21: Gospel Revolution Pt. 3

Under The Hood

Episode 15: Healing of Jairus’ Daughter and the Bleeding Woman

The Bible Show

Lō͘-ka Hok-im 7

Popular Bible Verses from
Lō͘-ka Hok-im 7

Videos for Lō͘-ka Hok-im 7

Jesus Forgives Sinful Woman

Centurion: The Book of Luke

Episode 21: Gospel Revolution Pt. 3

Episode 15: Healing of Jairus’ Daughter and the Bleeding Woman

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 7

Lō͘-ka Hok-im 7

Popular Bible Verses from Lō͘-ka Hok-im 7

Videos for Lō͘-ka Hok-im 7

Jesus Forgives Sinful Woman

Centurion: The Book of Luke

Episode 21: Gospel Revolution Pt. 3

Episode 15: Healing of Jairus’ Daughter and the Bleeding Woman

Bible:

Chinese, Min Nan

Version: 現代台語譯本羅馬字版 - TTVR

Lō͘-ka Hok-im 7

Popular Bible Verses from
Lō͘-ka Hok-im 7