Sù-tô͘ Hēng-toān 1

Iâ-so͘ Èng-ún Sù Sèng Sîn

1-2 Thê-o-hui-lô sian-siⁿ:

Tī góa só͘ siá ê thâu chi̍t pún chheh, góa í-keng ū chiong Iâ-so͘ só͘ chòe só͘ kà-sī it-chhè ê tāi-chì, tùi I khai-sí kang-chok ti̍t-kàu chiūⁿ-thiⁿ hit-ji̍t, lóng ū kóng-khí. I chiūⁿ-thiⁿ í-chêng, ū thong-kè Sèng Sîn chiong chin chōe tāi-chì chí-sī só͘ kéng-soán ê sù-tô͘. 3I siū-hāi í-āu, ū ēng chin chōe chèng-kù hián-bêng I pún-sin oa̍h--teh, tī sì-cha̍p ji̍t ê tiong-kan ū hián-hiān hō͘ sù-tô͘ khòaⁿ--kìⁿ, tùi in káng-lūn Siōng-tè-kok ê sū. 4Iâ-so͘ kap in chòe-hé#1.4 “chòe-hé” mā thang e̍k-chòe “chia̍h-pn̄g”. ê sî ū hoan-hù in, “M̄-thang lī-khui Iâ-lō͘-sat-léng, chiàu góa bat kā lín kóng, tio̍h thèng-hāu Pē ê èng-ún. 5Iok-hān ēng chúi kā lín sóe-lé, m̄-kú koh bô kúi ji̍t, lín ōe niá-siū Sèng Sîn ê sóe-lé.”

Iâ-so͘ Chiūⁿ-thiⁿ

6Sù-tô͘ kap Iâ-so͘ chū-chi̍p ê sî, mn̄g I kóng, “Chú ah, lí beh tī chit-ê sî chiong chú-koân hôe-ho̍k hō͘ Í-sek-lia̍t sī--bô?”

7I kā in kóng, “Pē ēng ka-kī ê koân-pèng koat-tēng ê sî-kan kap ki-hōe, m̄-sī lín thang chai--ê. 8M̄-kú Sèng Sîn lîm-kàu lín ê sî, lín ōe tit-tio̍h lêng-le̍k, tī Iâ-lō͘-sat-léng, choân Iû-thài kap Sat-má-lī-a, ti̍t-kàu thiⁿ-piⁿ-hái-kak ūi-tio̍h góa chòe kiàn-chèng.” 9Iâ-so͘ kóng chiah-ê ōe liáu-āu, tī in teh khòaⁿ ê sî siū chiap chiūⁿ-thiⁿ; ū chi̍t phìⁿ hûn kā I chiap--khì, in chiū khòaⁿ bōe tio̍h.

10In iáu-teh chù-ba̍k khòaⁿ thiⁿ ê sî, hut-jiân ū nn̄g ê chhēng pe̍h-saⁿ ê lâng khiā tī in sin-piⁿ, 11kóng, “Ka-lī-lī-lâng ah, lín ná khiā tī chia teh khòaⁿ thiⁿ? Chit-ūi lī-khui lín siū chiap chiūⁿ-thiⁿ ê Iâ-so͘, lín khòaⁿ-kìⁿ I án-ni chiūⁿ-thiⁿ, I mā ōe chiàu án-ni koh-lâi.”

Soán Má-thê-a Chòe Sù-tô͘

12Āu-lâi, sù-tô͘ tùi hit-ê kiò-chòe Kaⁿ-ná-soaⁿ ê só͘-chāi tò-khì Iâ-lō͘-sat-léng; Kaⁿ-ná-soaⁿ lī Iâ-lō͘-sat-léng bô jōa hn̄g, chha-put-to chi̍t kong-lí, chiū-sī An-hioh-ji̍t ōe-ēng-tit kiâⁿ ê lō͘-thêng. 13In ji̍p-siâⁿ liáu-āu, peh-khí-khì in só͘ tòa hit-keng chhù lâu-téng ê thiaⁿ; Pí-tek, Iok-hān, Ngá-kok, An-tek-lia̍t, Hui-le̍k kap To-má, Pa-to-lô-mái kap Má-thài, A-le̍k-hui ê kiáⁿ Ngá-kok, Kek-chìn-tóng ê Se-bûn, kap Ngá-kok ê kiáⁿ Iû-tāi tī hia. 14In kap kúi-nā ê hū-jîn-lâng, mā ū Iâ-so͘ ê lāu-bú Má-lī-a í-ki̍p I ê hiaⁿ-tī, lóng kè-sio̍k tâng-sim-ha̍p-ì pek-chhiat kî-tó.

15Kúi-nā ji̍t āu, chha-put-to ū chi̍t-pah jī-cha̍p ê sìn-tô͘ chū-chi̍p. Pí-tek khiā--khí-lâi, kóng, 16“Kok-ūi hiaⁿ-tī, Sèng Sîn thong-kè Tāi-pi̍t ê chhùi tī Sèng-keng só͘ ū-giân, koan-hē Iû-tāi chhōa lâng lia̍h Iâ-so͘ ê tāi-chì it-tēng tio̍h èng-giām. 17I pún-lâi sī lán tiong-kan ê chi̍t ê, siū soán lâi hun-tam chit-ê chit-hūn.

18“Iû-tāi ēng i chòe put-gī ê tāi-chì só͘ tit--tio̍h ê chîⁿ bóe chi̍t tè tōe; I tī hia tò-thâu-chai siak-sí, pak-tó͘ piak-li̍h, tn̂g-á lóng lâu--chhut-lâi. 19Tòa tī Iâ-lō͘-sat-léng ê lâng lóng chai chit-hāng tāi-chì, só͘-í chiàu in pún-tōe ê ōe kā hit-tè tōe kiò-chòe A-kek-tāi-má, ì-sù sī ‘Huih-hn̂g’.

20“In-ūi Si-phian ū kì-chài:

Tio̍h hō͘ i ê chhù hong-hòe,

bô lâng tī hia khiā-khí.

Koh ū kì-chài:

Tio̍h hō͘ pa̍t-lâng tāi-thòe i léng-tō ê chit-ūi.

21-22“Só͘-í, tio̍h ū chi̍t ê lâng lâi ka-ji̍p, kap goán chòe-hé choh Chú Iâ-so͘ koh-oa̍h ê kiàn-chèng-jîn. Chit-ê lâng tio̍h tī Chú Iâ-so͘ kap lán chòe-hé chhut-ji̍p ê sî, chiū-sī tùi Iok-hān si-sóe khí, kàu Iâ-so͘ lī-pia̍t lán siū chiap chiūⁿ-thiⁿ hit-ji̍t, put-sî kap lán chòe-tīn.”

23In chiū thê-miâ nn̄g ê lâng, chiū-sī kiò-chòe Pa-sat-pa, mā chheng-chòe Iû-sū-to͘ ê Iok-sek, kap Má-thê-a. 24In kî-tó kóng, “Chú ah, lí chai ta̍k-ê lâng ê sim. Kiû lí chí-sī goán, chit nn̄g lâng tiong-kan tó chi̍t ê sī lí só͘ kéng-soán, 25beh lâi tam-tng sù-tô͘ ê chit-hūn--ê, in-ūi Iû-tāi í-keng pàng-sak chit-ê chit-hūn, khì i eng-kai khì ê só͘-chāi.” 26Jiân-āu, in thiu-chhiam, thiu-tio̍h Má-thê-a, i chiū ka-ji̍p cha̍p-it ê sù-tô͘ ê thoân-thé.

Currently Selected:

Sù-tô͘ Hēng-toān 1: TTVR

Highlight

Copy