Matayo 22

Ikataniso lya karamu ya harusi

(Luka 14:15-24)

1Nao Jesu kaghora nawo sena kwa makataniso, kaghamba, 2“Uzuri ghwa Mlungu ghwanafwanane na mzuri adeile karamu ya harusi ya mwana wake. 3Katuma watumishi wake waghende wawapang'e walye wandu wawaliko kele karamu ya harusi, ela wakalegha kuja. 4Katumana sena watumishi wazima keghamba, ‘Wauzeni walye wawaliko: karamu yangu yakala tayari; njau na ng'ombe zangu zibandile zashinjo na kila kindu chio karakara; njuuni kele karamu ya harusi.’ 5Ela wakalegha kusikila, wakaghenda; mumoju mbweni kwake na mzima kele kazi yake, 6na walye wahangalike wakawawata walye watumishi wakawadea laghelaghe na kuwaulagha. 7Nao mzuri kawasilo, katuma askari wake wakawasaghisa walye waulaghi na kuisha muzi ghwawe. 8Nao kawauza watumishi wake wamoju, ‘Karamu ya harusi ye tayari, ela walye wawaliko siwefweni kungi. 9Ndamu ghendeni mataghanooni gha ngila muwakaribishe wose mujewaona weje kele karamu ya harusi.’ 10Nao walye watumishi wakaghenda ngileni wakawaleta wandu wose wawaonile, waloli na wawase; na nyumba ya harusi ikajula wagheni.

11“Ela mzuri angila kuzighana wagheni, kamwona mundu mumoju serwere nguo ya harusi. 12Naye kamuza ‘Mgheni wangu wanangilile ije aha sorwere nguo ya harusi?’ Naye kasowa lyeghora. 13Nao mzuri kawauza watumishi wake ‘Mfungeni mikonu na maghulu mumkumbe shighati kizeni, na aho ujelila na kukengeresha majegho.’” 14Jesu kamalila kwa kughora, “Ni wengi wawaliko, ela ni wachache wasaghulo.”

Ikotelo ighulu yelipa kodi

(Marko 12:13-17; Luka 20:20-26)

15Nao Wafarisayo wakaghenda wakadea njama eri wamwate Jesu kwa ghore zake. 16Nawo wakatuma wairimi wawe ngila mojori na wandu wa kigojo cha Waherodia; wakamuza, “Mwalimu tamanya wanaghoragha fulo, na wanafundisagha ngila ya Mlungu kwa hachi na sumuoghagha mundungi, kwani sutalagha ubwaa ghwa mundungi. 17Ndamu tighorere maririkanyo ghako ado, ni hachi kulipa kodi kwa Kaisari ango ije?” 18Ela Jesu kemanya ulaghelaghe ghwawe kuwauza, “Kudani munitimagha inyo wandu wa ngolo mbili? 19Nionyezeni pesa yelipa kodi.” Nao wakamletela iyo pesa. 20Jesu kawauza, “Iyi fwana na ilyo izina ni lya ani?” 21Wakamtumbulila, “Ni ya Kaisari.” Nao Jesu kawauza, “Mhaweni Kaisari vindu va Kaisari na Mlungu vindu va Mlungu.” 22Nao waghenda wasikila hung'u wakakirimua, wakamsigha wakaghenda ngila zawe.

Ikotelo ighulu ya kuzuka kufuma kwa wafwa

(Marko 12:18-27; Luka 20:27-40)

23Nao lyilya ijua lyenyi, wekeja kwa Jesu Wasadukayo awa waghoragha sikuwesi kuzuka kwa wafwa, wakamkotela ikotelo, 24wekeghamba, “Mwalimu, Musa wanatiuzile ilyi mundu afwa sesighile mwana ungi, wakwawe amuse ulya muke afwililo amupatile wakwawe wana. 25Ndamu aha mzetu koluo na watawana mfungate wa mundu mumojori, wa hambiri kalola na kafwa sesighile mwana ungi. 26Nao agha ghakadeika ukwenyi kwa wakwawe wa kaili na wa katatu na hata wose mfungate. 27Nao nyuma ya ghose ulya muke kafwa. 28Ndamu kele kuzuka, ulya muke ujekala wani? Kwani wose wemusile.” 29Jesu kawatumbulila, “Mwakosa inyo, kwa kukala simutambukilo ni Mawandiko gha Kuela ango ndighi za Mlungu. 30Kwani kele kuzuka siwelolagha agho siweusogho, ela wekalagha sa wana malaika wa mlunguni. 31Na kwa undu ghwa kuzuka kwa wafwa. Ado simushomile selyi muuzilo ni Mlungu. 32Imi nimi Mlungu wa Abrahamu, Mlungu wa Isaki na Mlungu wa Jakobo. Iye si Mlungu wa wafwile, ela wa weo moyo.” 33Nao makoghano waghenda wasikila, wakashiniso ni mafundiso ghake.

Mlomu mbwaa

(Marko 12:28-34; Luka 10:25-28)

34Nao Wafarisayo waghenda kusikila kamba, Jesu wawanyamaza Wasadukayo, wakakoghana; 35na mumoju wawe eluo mwalimu wa Sheria keja kamtima Jesu kwa kumkotela. 36“Mwalimu, Ni mlomu muni ghuo mubwaa kele Sheria?” 37Jesu kamtumbulila, “‘Umshaye Bwana Mlungu wako kwa ngolo yako yose na kwa roho yako yose na kwa akili zako zose.’ 38Ughu nigho mlomu mubwaa na ghwa hambiri. 39Na ghwa kaili ghwanafwanane nagho, ‘Umushaye mumbenyu selyi kwenyi ukushaile uwe mwenyi.’ 40Kele milomu iyi mili Sheria yose ya Musa na mafundiso gha wana tondolo ghamanga.”

Ikotelo ighulu ya Masihi

(Marko 12:35-37; Luka 20:41-44)

41Nao ilyi Wafarisayo wekoghane ngila mojori, Jesu kawakotela, 42“Mririkanya ije, ighulu ya Masihi? Ni mwana wani?” Wakamtumbulila, “Ni mwana wa Daudi” 43Jesu kawakotela, “Ndamu, kudani Daudi kwa ndighi za Roho amwita Bwana? Kwani oghorire,

44‘Bwana omuzile Bwana wangu:

kala kitembo kele mkonu ghwangu ghwa kijo.

Hata niwaike wamaiza wako isi ya maghulu ghako.’”

45“Ndamu ikakala Daudi wamwita, ‘Bwana,’ Ukalagha ije mwana wake?” 46Na sikwesi mundungi adimile kumtumbulila Jesu ilagho lyingi, hata kufuma lyilya ijua sikwesi mundungi adimile kumkotela makotelo ghengi sena.

Currently Selected:

Matayo 22: SAGALLANT

Highlight

Copy