Matayo 20

Wadei kazi kele mbuwa ya mizabibu

1“Uzuri ghwa Mlungu ghwanafwanane na mundu mumoju eluo na mbuwa ya mizabibu, kafuma na ikesho kiro kuhada wadei kazi kele mbuwa yake. 2Naye aghenda apatana na wadei kazi malipo gha ijua dii kawaghenza kele mbuwa ya mizabibu. 3Kafuma sena saa ndatu kadoka wamoju kimusi sokoni, 4na kuwauza, ‘Ghendeni nanyose kele mbuwa ya mizabibu na icho chio cha hachi nijemlipa.’ 5Kafuma sena saa ndandatu na saa kenda, kadea ukwenyi. 6Nao saa ikumi na moju kafuma na kawadoka wamoju kimusi, kawauza, ‘Kudani mwakala kimusi aha bule msenya ghose?’ 7Nawo wakamuza, ‘Kwa kukala sikwesi mundungi atihawa kazi.’ Naye kawauza, ‘Nanyose ghendeni kele mbuwa ya mizabibu.’

8“Nao kughenda kuswa, ulya mundu wa mbuwa ya mizabibu kamuza mtumishi wake, ‘Wapang'e wadei kazi uwalipe mafungu ghawe, kudyowa na wa nyuma hata wa hambiri.’ 9Nao walye wadyoile kazi saa ikumi na moju weja wakahawo dinari mojori. 10Nao walye wa hambiri weja, wakaririkanya wepatagha kuchumba wambawe; ela kila mumoju kapata dinari mojori. 11Nawo wapata wakamnungunikila mundu wa mbuwa. 12Wekeghamba, ‘Awa wa nyuma wadea kazi kwa saa mojori, nawe wawakatanisa nesi tasinda tikedea kazi ikulile na ijua!’ 13Ela iye kamtumbulila mumoju wawe, ‘Mgheni wangu, sikudeile laghelaghe ingi, Ado sitedumusilane ifungu lya ijua dii? 14Usa ichi chio chako na ughende. Nimi naona nimuhawe uyu wa nyuma selyi nakuhawa. 15Ado sio na hachi yedea selyi nishaile na mali yangu? Ango ondeona iziso kwa kukala nana ishima?’ 16Kwa hung'u wa nyuma wekalagha wa hambiri na wa hambiri wekalagha wa nyuma.”

Jesu kughora gha kifwa chake na kuzuka indu lya katatu

(Marko 10:32-34; Luka 18:31-34)

17Nao ilyi Jesu eluo keghenda Jerusalemu kawafunya nambali wairimi ikumi na waili, na ngileni kawauza, 18“Loleni tendeghenda Jerusalemu na Mwana wa Mdamu ujefunyo kwa Wakohani wabwaa na Walimu wa Sheria, nawo wejemtaghanya kufwa. 19Wejemufunya kwa mbari nzima atukano na akwito na awambo na ijua lya katatu ujezuka.”

Ilombi lya mee Jakobo na Johana

(Marko 10:35-45)

20Nao mee wana wa Zebedayo kamjila Jesu na wana wake, kamdyaila ngokoro hambiri kemlomba amdeile kindu kimoju. 21Jesu kamuza, “Nini ushaile?” Naye kamuza, “Laga kamba awa wana wangu wakale, mumoju kele mkonu ghwako ghwa kijo na mumoju kele mkonu ghwako ghwa kimosho, kele uzuri ghwako.” 22Jesu katumbulila, “Simumanyagha icho mlombagha. Ado, mwadima kunwa kikombe cha matiriro ichi nichinweghagha imi?” Nawo wakamuza, “Tadima.” 23Jesu kawauza, “Fulo munweghagha kikombe changu, ela kukala kele mkonu ghwangu ghwa kijo na ghwa kimosho si ghangu ghengi; sala ni kwa walye waikililo ni Aba.”

24Nao walye wairimi ikumi waghenda wasikila wakawasilo ni walye wandu waili. 25Nao Jesu kawapang'a na kuwauza, “Mwanaweni kamba watawala wa mbari nzima wanakalagha na ndighi ighulu ya wandu wawe, na vilongozi wawe wanakalagha na udimo ighulu yawe. 26Ela kwenyu siko kungi. Ela uwo wose ashaile kukala mubwaa kwenyu ni suti akale mtumishi wa wose. 27Na ngera mundungi wenyu ashaile kukala wa hambiri kwenyu suti akale msunyi wenyu. 28Selyi Mwana wa Mdamu sejile kutumikilo, ela kutumika na kufunya umana ghwake kukombola wandu wengi.”

Jesu kuboesa vifondo waili

(Marko 10:46-52; Luka 18:35-43)

29Nao ilyi Jesu na wairimi wake weluo wekefuma Jeriko, kairimo ni makoghano mabwaa. 30Nao ngileni weluo vifondo waili, na waghenda kusikila ni Jesu eitagha, wakakema, “Ee Mwana wa Daudi, utifwile waya.” 31Makoghano wakawakemela wekewauza wanyamale, ela wo wakajuzila kukema. “Ee Mwana wa Daudi utifwile waya!” 32Nao Jesu kamanga, kawapang'a na kuwauza, “Mwanashaile nimudeileni?” 33Nao wakatumbulila, “Bwana tifungule meso.” 34Nao kawafwila waya, kawawata meso ghawe, na iyo shwa yenyi wakaona na wakamwirima.

Currently Selected:

Matayo 20: SAGALLANT

Highlight

Copy