Luka 12

Kuonya ighulu ya ngolo mbili

(Matayo 10:26-27)

1Nao ilyi makoghano gha wandu maelfu wemutindirire, hata kulatilana, Jesu kadyowa kughoranya na wairimi wake jako, “Kulindeni na chachu ya Wafarisayo ya ngolo mbili. 2Sikwesi kindu chingi chibulilo sichefunukulo ango chivisilo sichemanyikanagha. 3Kwa hung'u icho chose mughoragha kizeni chijesikilo kele mlangazi, na icho mushashiragha chumbeni komweni chijeghoro ighulu ya nyumba na lwaka lubwaa.

Nani wowogha

(Matayo 10:28-31)

4“Fulo namuza wagheni wangu, simwaoghe walye weulagha muli na siwedimagha kudea kindu chingi chichumbagha. 5Ela nijemuonya nani ewo oogha: muogheni uyu edimagha kumulagha na ewo na udimo kumukumba kele izia lya moto. Fulo namuza muogheni iye. 6Ado mbaimbai sanu sizitaghogho kwa magome maili? Nako sikwesi ingi siyemanyikana kwa Mlungu. 7Hata sisiri za vongo venyu zanawenu mtalo ghwake. Kwa hung'u simwaoghe, inyo muo wa zoghori mbwaa kuchumba mbaimbai nyingi.

Kumudumusa na kumlegha Kristo

(Matayo 10:32-33; 12:32; 10:19-20)

8“Fulo namuza, uwo wose enighoragha imi hambiri ya wandu, Mwana wa Mdamu naese ujemghora hambiri ya malaika wa Mlungu. 9Ela uwo wose enikanagha hambiri ya wandu ujekano hambiri ya malaika wa Mlungu.

10“Na uwo wose eghoragha laghelaghe ighulu ya Mwana wa Mdamu ujefwilo waya; ela uwo wose eghoragha laghelaghe ighulu ya Roho wa Kuela sefwilogho waya.

11“Nao ilyi mwaghenzo hambiri ya sinagogi na kwa watawala na wabwaa, simwakusirimise na agha mutumbulilagha ango mughoragha. 12Kwani Roho wa Mlungu ujemfundisa iyo ngelo yenyi icho mujeghora.”

Ikataniso lya mzuri mpumbavu

13Nao mundu mumoju kele makoghano, kamuza Jesu, “Mwalimu, muze wakwetu tisare ufwa tisighililo ni aba.” 14Ela Jesu kamuza, “Ee mundu wa wandu, nani aniikile kukala mtaghanyi ango msari wenyu?”

15Naye kawauza, “Kulindeni na iziso; kwani umana ghwa mundu sighuo kele ungi ghwa mali ewo nayo.” 16Naye kawaghorera ikataniso keghamba, “Koluo na mundu mumoju eluo mzuri, mbuwa yake yevele mavalo mengi. 17Naye karirikanya mwenyi, ‘Nideagha ije kwani siwesi andu koika viro vangu?’ 18Kaghora, ‘Nideagha hung'u; Nifuchulagha vitundu vangu na niwaghale vizima vibwaa, eri niike viro vangu na vindu vizima. 19Nao niiuze roho yangu, Ee roho, waikilo vindu vingi velya kwa miaka mingi, kwa hung'u zumua ulye, unwe na uboelo.’ 20Ela Mlungu kamuza, ‘Mpumbavu uwe, ichi kiro chenyi roho yako yanashailo na ivi vindu vose waika, vijekala vani?’ 21Na hung'u niko kwenyi ikalagha kwa kila mundu ekuikilagha, mali na sekuikilagha mali kwa Mlungu.”

Kumudumusa Mlungu

(Matayo 6:25-34)

22Nao Jesu kawauza wairimi wake, “Kwa hung'u namuza, simwakusirimise na umana ghwenyu, mulyighagha kimuni ango kwa mili yenyu murwaragha kimuni. 23Ado umana si bora kuisa chakulya na muli si bora kuisa marwari. 24Ririkanyeni wana mang'olo, siwawandagha hata siwakwashagha hata siwawesi vitundu, ela Mlungu wanawalyisagha. Ado inyo si bora kuisa nyonyi! 25Nani kwenyu kwa maririkanyo edimagha kujuzila majua ghake? 26Ikakala simodimagha kudea malagho sagho machache, kudani mukusirimisagha na malagho mazima? 27Ririkanyeni vilua selyi vizeguwagha, sivideagha kazi hata sivilukagha nguo; ela namuza, hata Solomoni kele uzuri ghwake ghose sarusiro sa kimoju cha ivi. 28Ndamu ngera Mlungu arusagha nyasi ya mbweni iwo moyo lelo na ikesho yakumbo kele moto, sechumbagha kumurusa inyo wandu wa idumusi ichache! 29Kwa hung'u simwakusirimise na ichi mulyighagha na ichi munweghagha. 30Kwani wandu wa mbari zose za urumengu wahada ivi vindu, ela Tatio wanaweni kamba mwanavishaile. 31Ela hadeni jako uzuri ghwa Mlungu, na ivi vindu vijekala venyu na vose.

Uzuri Mlunguni

(Matayo 6:19-21)

32“Simwaoghe inyo uranu mchache, kwani yamuboela Tatio kumuhawa Uzuri. 33Tagheni vose muo navo mufunye sadaka. Nao mukwikile mifuko ya pesa siyedemagha na mali siyegotuwagha mlunguni, andu viting'a sivefikagha hata viburute sivehakilagha. 34Kwani andu kwenyi mali yako iwo niko kwenyi ngolo yako iwo.

Watumishi welindagha

35“Kaleni kirani kwa ilyo lyose lyikujagha, mukuruse na mukufunge mikoa na taa zenyu zikewaka, 36sa watumishi wemudafwagha Bwana wawe ekujagha kufuma kele karamu ya harusi, eri ngelo eja na kudaha mjango wamurughurire. 37Baha watumishi walye wedokogho walavile. Fulo namuza, ulya Bwana ujekufunga chunu, awakalise kitembo mezeni na kuwatumikila. 38Hata ngera eja na kiro kibwaa ango na ikesho kiro, na awadoke hung'o, baha watumishi walye. 39Ela manyeni kamba ngera mundu wa nyumba endemanya ngelo ya kuja kiting'a, macho alindile, na sesighagha nyumba yake ivunjo. 40Nanyose kaleni kirani, kwani Mwana wa Mdamu ukujagha ngelo simoighelelagha.”

Mtumishi mdumusiliki na seo mdumusiliki

(Matayo 24:45-51)

41Petro kamuza, “Bwana ondeghora ikataniso ilyi kwetu kwenyi ango kwa wandu wose?” 42Nao Bwana katumbulila, “Nani ewo mtumishi mudumusiliki na ewo na akili aikilo ni Bwana wake ighulu ya nyumba yake, eri awahawe wambawe chakulya chawe kwa ngelo? 43Baha mtumishi ulya Bwana wake emudokagha kedea sa hung'u. 44Fulo namuza, ujemwika ighulu ya vindu vake vose. 45Ela ilyi mtumishi ulya aghora mwenyi, ‘Bwana wangu wamuka luma kuja,’ naye adyowe kuwakwita watumishi wa kialume na wa kiwake na alyigheghe na kunwa na anaruweghe, 46bwana wa ulya mtumishi ujeja ijua selyimanyagha na saa seimanyagha; naye ujemkwita na ndighi na kumwikanya na awa siweluo wadumusiliki. 47Na mtumishi ulya eweni ghalye ashaile Bwana wake, ela sakuikile kirani ango kudea selyi ashaile, upatagha ikwito ibwaa. 48Ela uyu eluo seweni na wanadeile lyiketi kukwito, upatagha ikwito lyiwanguwe. Uyu wose ahawilo vingi, kwake vingi vijeshayo; na uyu aikilo na vingi ni wandu, kwake wejeshaya vingi.

Jesu ni chausa cha kusarika

(Matayo 10:34-36)

49“Nanajile urumenguni kukoza moto, na neshaile macha hung'u ghwawaka! 50Nio na ubatizo nifweni nibatizo nagho, nemi nasirimiso hata ghukatiso! 51Ado muririkanyagha kamba nendeleta sere urumenguni? Hata, ela fulo yenyi nendeleta kusarikana. 52Kwani kufuma indakwenyi kujekala nyumba iwo na wandu wasanu kusarika, watatu kwa waili na waili kwa watatu. 53Aba ujekala kinyume cha mwana wake, na mwana ujekala kinyume cha tatie: mawe ujekala kinyume cha mchana wake, na mchana ujekala kinyume cha mee. Mkekulu ujekala kinyume cha mkazamwana na mkazamwana ujekala kinyume cha mkekulu wake.”

Kutambula ngelo

(Matayo 16:2-3)

54Nao Jesu kawauza makoghano, “Ilyi mwaona iwengu lyikefuma magharibi, mwaghamba mshushure ghukujagha na fulo ghweja. 55Na ilyi mwaona mbeo ikeruma kufuma kusini, mwaghamba kukalagha na ijua, nalyo lyakala. 56Inyo wandu wa ngolo mbili! Mwamanya gha kuzighana urumenguni na gha mlunguni, kudani simotambulagha gha iyi ngelo?”

Kupatana na mumaiza wako

(Matayo 5:25-26)

57“Kudani simotaghanyagha gha hachi inyo wenyi? 58Nao koghendanya na uyu ekushitakiagha kwa mtaghanyi, dea kasidi yepatana naye ngileni, eri sakughenze kwa mtaghanyi, na mtaghanyi sakuhawane kwa askari na askari sejekungiza kifungoni. 59Fulo nakuza sufumagha alye hata wamalila kulipa senti ya kudua.”

Currently Selected:

Luka 12: SAGALLANT

Highlight

Copy