Uan 11

Lasaru Inkate wan

1-2E sik taw at ngayan Lasaru. Ay Lasaru ay at fadugsay Maria ay Marta nu gbanwan sis fulan Betaniya. Maria at nabusbus famabebanglu sa tam Fun Isus darafa ay at fanrarus at buk wan. Ay at fadugsay Lasaru tagadaylan. 3Ay at dugsay fag duwak ina nasugu tibak taw laman nanfoyung sas Isus te, “Am fakesugun am fagwes gadaylan way.” 4Ay Isus nu nadungug glong te, “Ka fag daylan, bunya fakateun. At masuwad te, laman ngay taw sumeg sas Diyus at fagmadaragangun, ay sumeg yangay angku, Diyus at Baguwama.” 5Isus kesug tuwa at fadugsay fag tulu, Marta, Maria, ay Lasaru. 6Ay dewa Isus nadungug te, Lasaru gadaylan way, Isus ya nananlag duwak menit. 7Nu nlangfe wa duwak menit, Isus nalong sat ngay tagadal te, “Bastam, kafoli yangay tam sas talun Udiya.” 8Ay at ngay tagadal nalong sas Isus te, “Em Takamoyung, ebi tv taw Udyu kaumsig way gafalangun emu batu. Go dewa katanya, kafoli yay o sanya?” 9Ay Isus nabalus te, “Sik menit nu si aba e labi duwak uras. Ay sik taw nu glo nu gina tuwa mamenit, di kataid, teway mayamag tuwa. 10Ay sik taw nu glo nu sad yabi wadi, umtaid wa fiya, teway wa mayamag.” 11Ay rodi Isus nalong yangay sat ngay tagadal te, “Tam fagwes Lasaru gtiyug way, ay nanlag akyay laman nanfulo aw anya.” 12Ay at ngay tagadal nalong sas Isus te, “Em Fun, Lasaru nu gtiyug way, kafiya yay ro.” 13Roro ngap Isus at longan at masuwad, Lasaru nkate wan. Ay at ngay tagadal nu gfasad, fafiyan way at lufuy fagtiyugun. 14Ay Isus nafayamagun wa daw nu glong te, “Lasaru nkate wan. 15Ay dewa aw gyud sanya guseganan aw, laman e fanambagun ban am, at masuwad, laman umtvngvd yay nu gafanud am sa angku. Ay katsi bastam wan. Nanlag watam anya.” 16Ay Tumas, at ngayan at sadi te, Kambal, nalong sa at ufud fag ngay tagadal te, “Bastam ngatu. Anggan itam nangate watam nanfasfuwan tam fagwes.”

Isus wan Tagfon Gleleg

17Ay Isus nu ndasug sas fulan Betaniya, e nafoyung anya te, “Katsi ufat menit wan Lasaru nu malibingan.” 18Fulan Betaniya ay fulan Erusalem gakbangan way, at kayayuwan undain tuluk kilumitru. 19Ay makbang way, ngayuk taw Udyu at nananlag sas Marta ay Maria laman nanfataluwan anway at fadugsay inkate.

20Ay Marta nu nadungug te, Isus umdasug ro, nalo wan laman nanfablang. Ay Maria gfanya way sit bale. 21Ay Marta nalong sas Isus te, “Ku Fun, nu ste di ro o, ku fadugsay satu ro di nkate. 22Ay dewa katanya, nasaful aw te, dewa katsi nus nge wain am fagetun sa tam Diyus, tam Diyus mafafon tuwa emu.” 23Ay Isus nabalus te, “Am fadugsay gdog yay ro gleleg.” 24Ay Marta nabalus Isus te, “Kin, gsaful aw te, ku fadugsay gdog yay ban gleleg sas fakatabuwan fag menit gina ban gfaleleg fagayu taw kinkate.” 25Ay Isus nalong sas Marta te, “Aw wan Tagfadog-Gfaleleg ay Tagfon-Leleg. Nus nga sinu tagafanud sa angku, dewa nkate, gdog yay ban gleleg. 26Ay nus nga sinu tagleleg ay tagafanud sa angku di ban kate faggugat. Go gafanud o sa ku longan emu?” 27Ay Marta nabalus te, “Kin, ku Fun. Gafanud aw te, o wan Diyus at nafili fag Fun, ay at Baguwama. O wan ebi Diyus at nafatuyanan te, e kadasug ban ste swa daga.”

Isus Guyway

28Ay Marta nu nalong wa katanya sas Isus, rodi guli wan. Ay kanya nauro at fadugsay Maria ay gibug te, “Iste wan tam Takamoyung kaumsig galagun emu.” 29Ay Maria nu nadungug, mafali tuwa nu kalindug laman nanfablang Isus. 30(Ay Isus ya ndasug sas Betaniya. Kanya ro si way kabats Marta fagfablangan anya.) 31Ay taw Udyu tagfataluwan Maria nu kabalu gina sit bale, nalag Maria nu kalindug mafali ay nu glo, ay fagayu naalo wa anya. Ay at tiba nu gfasad, Maria nu glo sa ways faglibingan, laman nanguyway sanya.

32Ay Maria nu ndasug ay nu nalag Isus, kanya namalub sas Isus darafa ay glong te, “Ku Fun, nu ste di ro o, ku fadugsay satu ro di nkate.” 33Ay Isus nu nalag Maria ay anggan at ufud fag ngay taw Udyu nu guyway, Isus inbalu yangay sat amatanganan. 34Ay Isus nainto te, “Dada nu glibing am?” Ay tiba nabalus te, “Em Fun, aloi wemi nanlag tam sas faglibingan.” 35Ay Isus guyway. 36Ay ka fag ngay taw Udyu nalong te, “Linggati, Isus matvngvd nu kesug Lasaru madyay guyway yangay!” 37Ay tiba nalong te, “Tuy wa fag taw ebi at nafafiya sik taw at yud glag. Taw ro at fagnafabayanun Lasaru nu kate?”

Lasaru Gdog yay Gleleg

38Ay Isus nu ndasug sas faglibingan, gdog yay fiya inbalu sat amatanganan. Kanya faglibingan sik luwib, ay at fandingding sakbawan sik batu. 39Ay Isus nasugu tiba te, “Buli at fandingding sakbawan fag batu.” Ay Marta glong sas Isus te, “Em Fun, em fadugsay baruwas wa ro katsi, ufat menit wan nu matean.” 40Ay Isus nabalus anya te, “Aro nalong aw emu te, nu gafanud tuwo, lumag ro o Diyus at fagmadaragangun.” 41Ay tiba nabul wa fiya at fandingding sakbawan. Ay Isus natangda ay gelongan te, “Mama, guseganan aw sa emu anway nadungug o angku. 42Ay nasaful aw te, gdungug tuwo gugat angku. Ku fagnalongun katanya, laman fagayu taw tagste mafanud te, nasugu wo fiya angku.” 43Ay Isus nu ntabu nu gdarangin, guro dawdaw te, “Lasaru, alfasi wan sanya ginan ay stiyei wan.” 44Ay Lasaru kalfas wa fiya. Ay at daluwap ay at darafa e fansifig yay sik falefe anggan at mata sigon. Ay Isus nalong sa tiba te, “Buskadi at fansifig ay sugui te, loi wan.”

Taw Udyu at ngay Tagmagurang Kamasadan Gananfateun Isus

(Mat. 26:1-5; Mar. 14:1-2; Lukas 22:1-2)

45Ngayuk taw Udyu at nananlag sas Maria nalag Isus at fagbulun, ay gafanud sa anya. 46Ay roro tibak taw Udyu nananlinggat sa sangay taw Parisiyu ay nafoyung te, katanya Isus at ngay fagbulun. 47Ay ngay taw Parisiyu ay ngay taganyun daul nafaful ngay Taw Udyu Tiba Tungud Tagmagurang. Ay nafangintoanan te, “Tain ban tam fagbulun anway ka fag taw ngayu dawdaw at fagbulun at madulawan? 48Ay nu dway tam sumalag anya, fagayu taw gafanud wa ban sa anya. Ay taw Ruma gina mdasug rumasras wa ban Diyus bale, ay anggan tam talun. Ay gfamin wa ban tam ngay taw.” 49Ay at sadi sanya, Kayfas, sik fun taganyun ginanya fag banwa, glong te, “Wam e fagsafulun! 50Go wam nasaful te, at masine sadik taw yakman takate, laman tam ngay taw e fanambagun? At masuwad te, laman tam ngay taw di ban mamin.” 51Kayfas fagnalongun katanya, bundi at naamatanganan mandi, anway kanya wan at fun taganyun ginanya fag banwa, Diyus tuwa at nafaamatanganan anya laman kanya gumuna moyung te, Isus umkate ban laman fagayu taw Udyu e fanambagun. 52Ay bundi taw Udyu fagtvngvd at ke fanambagun, anggan tuwa Diyus at ngay unga. Anway Isus nafaful yangay ay nafasadi Diyus at ngay unga at nasaruwayan. 53Ay siginan ginanya fag menit, taw Udyu at ngay tagmagurang igsulitanan te, “Tain ban nu mafafate tam kanya fag Isus?” 54Ay nu katanya, Isus wa nafalaganan nu glo sa sangay taw Udyu. Ay Isus nalo wan sanya ginan, ay indasug sa sik talun at yud e taw, sa sik fulan at ngayan te, Efraim. Ay Isus gbanwan yay sirut sanya anggan at ngay tagadal.

55Ay nu makbang wan taw Udyu at fagmafulun sa baliwas Tagfabarita nu Glangfe, ngayuk taw Udyu siginan sangay talun at nalo sas Erusalem, laman gfaning taw Udyu at ugali nu gfasine anya mandi, gina ban umdasug at fagmafulun. 56Ay taw Udyu gsarap Isus. Ay gina maful sis Diyus bale, fangintoanan te, “Tain nu gfasad am? Go Isus wa ban umdasug stiye sis fagmafulun?” 57Ginanya at ngay taganyun daul ay at ngay taw Parisiyu nafatagak sa sangay taw te, “Nus nga ginain nu lumag am Isus foyungi emi, laman fagamat ami anya.”

Currently Selected:

Uan 11: TAWEAST

Highlight

Copy