Fagsigadan 10

Sik ngay Fulan Taw ayuwayu at Fakasigadan

1Nuwe baguwama, tulu. At ngayan Sem, Kam, ay Afet. Ay kanya fag tuluk baguwama, inke ngay baguwama yangay, ay inke ngay fufu wan sat dagat daga. Katatuy at foyungan sanya fag tuluk baguwama baliwa, anggan wa sat ngay fufu sat dagat daga:

2Sis Afet at ngay baguwama, at ngay ngayan, Gumer, Magug, Maday, Aban, Tubal, Mesek, ay Tiras.

3Ay bandi nu kalugo wan at ngay taw nu gbanwan, Gumir inke ngay fufu sat dagat daga. Kanya wan bandi ataw taw Askenas, taw Ripat, ay taw Tugarma. Kanya fag tuluk fulan taw, siginan yays Gumir nu kafasigad.

4Ay at sadi Afet baguwama, Aban. Ay siginans Aban nu kafasigad tuy fag ufatk fulan taw: taw Elisa, taw Tarsis, taw Kitim, ay taw Rudanim. 5Ay kanya fag ngay fulan taw, at ngay fagbanwanan, sa sangay akbang dagat. Ay kanya fag ngay fulan taw, e fanlong wa mandi, fafud fulan taw. Ay nus tuwa ma, bawat sadik fulan taw, ngayu wak talafuwanan sat basad. Kayunya at taw. Ay kanya fag ngay fulan taw, nu gbanwan, sadsamanan tuwa. E ngay fagbanwanan wa mandi.

Katanya wan at foyungan sa baliwas Afet at ngay baguwama ay at ngay fufu sat dagat daga.

6Ay Nuwe baguwama at sadi, at ngayan Kam. Kam e ngay baguwama yangay. At baguwama, Kus, Misraim, Put, ay Kanaan.

7Ay bandi nu kalugo wan at ngay taw nu gbanwan, Kus inke ngay fufu sat dagat daga. Kanya wan bandi ataw taw Seba, taw Kabila, taw Sabta, taw Raama, ay taw Sabtika. Kanya fag ngay fulan taw ayuwayu, siginan yays Kus nu kafasigad.

Ay nu bandi wan, tibak taw Raama insaman wan siginan at ngay kalongan. Ay bandi ataw, kanya at kinsaman, kanya wan taw Sheba ay taw Dedan.

8Ay ebi ataw, Kus e baguwama at ngayan Nimrud. Kanya Nimrud, sik taw madaragang dawdaw. Igfanbabo dawdaw at fabarangyan. 9Ay masafulan yangay dawdaw iggamat mangimut. Ginanya mandi fag fulan taw, we katvngvd Nimrud nu gsaful igfan-gamat. Ay bandi baliwa, galay sik taw masafulan iggamat, tiba glong gugat te, “E, kanya sigon, kata yangay Nimrud. Madaragang yangay dawdaw nu mafagamat.”

10Ay Nimrud, insik fun yangay. Kanya wan tagmagurang sis fulan Babel, fulan Erik, fulan Akad, ay fulan Kalne. Kanya at fagmagurangun fag ngay fulan. Ay kanya fag ngay fulan fagayu, si yays talun Sinar. 11Ay bandi nu glugo wan, Nimrud nafadaul yadi at fagmagurangun fag talun. Naagbilug talun Asirya. Ay sanya fag talun, Nimrud ngay fanuguwan naawat ayuwayu sik ngay bale, sik ngay fulan daul. At naawat fag ngay fulan, fulan Ninibi, fulan Rikubut-Ir, fulan Kalak, 12ay fulan Risin. Kanya fag Risin, sis buknga fulan Ninibi ay fulan Kalak. Ay kanya fag fulan Kalak, sik fulan dawdaw gbiya.

13Ay Kam at baguwama at sadi, Misraim at ngayan. Ay siginans Misraim nu kafasigad tuy fag fituk fulan taw: taw Lud, taw Anam, taw Liab, taw Naftu, 14taw Patrus, taw Kaptur, ay taw Kaslu. Kayunya fag fulan taw, siginan yays Misraim nu kafasigad.

Ay nu bandi wan, tibak taw Kaslu insaman wan siginan at ngay kalongan. Ay bandi ataw, kanya at kinsaman, taw Filistiyu wan.

15Ay Kam baguwama at sadi, at ngayan, Kanaan. Kanaan, e ngay baguwama yangay. At turungana, Sidun. Ay at ariyan at sadi, Kit. 16Ay bandi nu glugo wan at ngay taw nu gbanwan, Kanaan inke ngay fufu sat dagat daga. Kanya wan bandi ataw taw Yebus, taw Amur, taw Girgas, 17taw Kib, taw Ark, taw Sin, 18taw Arbad, taw Semar ay taw Kamat. Kayunya fag fulan taw, siginan yays Kanaan nu kafasigad. Nu katanya, at fagmasadian at ngayan kanya fag ngay fulan taw ayuwayu, taw Kanaan wan. Fakatanyaun, teway kanya fagayu Kanaan wa fufu sat dagat daga.

Ay bandi, anggan wa sigon at fagbanwanan fag talun, nu gngayan, Kanaan yangay. Tagbvt tuwa talun Kanaan, teway kanya fag ngay fulan taw inrapyag wan. 19At kabaan talun Kanaan, siginans fulan Sidun, anggan dumasug sas fulan Girar ay fulan Gasa. Ay sat kadaulan baliwa, at sadik tigyangan, dagat wan. Ay sa sadik tigyangan, fulan Suduma, fulan Gumura, fulan Sibuyim, fulan Adma, ay fulan Lasa. Kadaw anya, talun Kanaan, nu fagdaul wan.

20Kanya wan at tiba, Kam baguwama ay at ngay fufu sat dagat daga. Inkayu wa dawdaw at taw, sanya ginan fag sadik baguwama. At kayuwan, sik ngay fulan taw wan. Ay kanya fag ngay fulan, e fanlong wa mandi, fafud fulan taw. Ay nus tuwa ma, bawat sadik fulan, ngayu wak talafuwanan sat basad. Ay kanya fag ngay fulan taw, nu gbanwan, sadsamanan tuwa. E ngay fagbanwanan wa mandi.

Katanya wan at foyungan sa baliwas Kam at ngay baguwama ay at ngay fufu sat dagat daga.

21Ay Nuwe baguwama at sadi, at ngayan Sem. Kanya at turungana. Ay Sem at fufu tud at sadi, at ngayan Eber. Ay kanya Eber, inke ngay fufu yangay ayuwayu sat dagat daga.

22Ay sis Sem at ngay baguwama at ngayan, Elam, Asur, Arfaksad, Lud, ay Aram.

23Ay siginans Aram nu kafasigad tuy fag ufatk fulan taw: taw Us, taw Kul, taw Geter ay taw Mesek.

24Ay at sadi Sem at baguwama, Arfaksad. Ay sis Arfaksad at baguwama, Selak.

Ay kanya Selak, e baguwama at ngayan Eber. Kanya aro at nalong fag Eber, sadi yay. Sem yay gugat fufu tud.

25Ay Eber inke baguwama duwa. At sadi, at ngayan Peleg. At masuwad Peleg, insaruwayan. Teway fakatanyaun at ngayan, Peleg kaduge gleleg, ginanya at ngay taw nu kasaruwayan. Ay Eber baguwama at sadi, at ngayan, Uktan.

26Ay siginans Uktan nu kafasigad tuy fag ngay fulan taw: taw Almudad, taw Selep, taw Kasarmabit, taw Ira, 27taw Aduram, taw Usal, taw Dikla, 28taw Ubal, taw Abimayel, taw Sheba, 29taw Ufir, taw Kabila, ay taw Kubab. Kanya fag ngay fulan taw ayuwayu, siginan yays Uktan nu kafasigad. 30At kabaan kanya fag ngay fulan taw at talun, siginans fulan Mesa anggan dumasug sas Sefar. Kanya fag Sefar, sa sik talun at ngayu at muyud, sas fakamenitan baliwa.

31Kanya wan at tiba, Sem baguwama ay at ngay fufu sat dagat daga. Inkayu wa dawdaw at taw, sanya ginan fag sadik baguwama. At kayuwan, sik ngay fulan taw wa mandi. Ay kanya fag ngay fulan, e fanlong wa mandi, fafud fulan taw. Ay nus tuwa ma, bawat sadik fulan, ngayu wak talafuwanan sat basad. Ay kanya fag ngay fulan taw, nu gbanwan, sadsamanan tuwa. E ngay fagbanwanan wa mandi.

Katanya wan at foyungan sa baliwas Sem at ngay baguwama ay at ngay fufu sat dagat daga.

32Intabu wan nu gfoyung sas Nuwe baliwa ay sat ngay baguwama ay anggan sat ngay fufu sat dagat daga. Kayunya wan tam natap fag ngay ngayan ayuwayu sat tungud. Katsi fag ngay fulan taw sis fagdaul daga, sanya ginan yadi nu kafasigad. Siginan inke lino daul ebi, ay anggan katsi, taw fagsigadan sanya ginan yay, siginans Nuwe talamian.

Currently Selected:

Fagsigadan 10: TAWEAST

Highlight

Copy