M. Marko 14

1LOMBA akaswe masiku aŵiri kwenze pasaka na siku la mitanda iliye chizamba: naŵo akuru a ansembe na alembi esakasaka mwati amkatile na chiŵembu nompaya: 2pakuti echiti, Pa masiku akuru yai, kano pangaŵe chiwawa cha ŵantu.

3Naye peenze mBetaniya mng'anda ya Simoni wa manzonzo, penzenkezi pakulya, ezamo mwanakazi ana kansuŵilo ka alabastero ka mafuta ŵonunkila a nardo ŵeneŵene akufwa zinyinji; naye ekafwaya kansuŵilo noŵatira pa mutu wake. 4Enzemo ayakene echipya mitima ŵeve ŵeka echiti, Nga aŵa mafuta ataiwiranji? 5Pakuti mafuta amene aŵa sembe esitiwa kupula makobiri myanda itatu nopewa kwa akavu. Naŵo emnyonyontera uyo mwanakazi. 6Sembe Yesu echiti, Mulekeni; mumzingwisisyanji? wanichitira mulimo uweme. 7Chikomo akavu muli naŵo pamo nsiku zyonse, pali ponse mkapangwa mngaŵachitire viweme: sembe neo simuli nane nsiku zyonse. 8Wachita umo mwakumira: wauzolekera futira muŵili wangu koŵikiwa mu msitu. 9Lezee numuuzyani, Pali ponse peiti yoŵirizyiwa evangelo pa vyaro vyonse ichi soti chachita uyu mwanakazi chize chonenewa chiŵe cholukanirako.

10Nipo Yuda Iskariote, wamene umo wa aŵo kumi na aŵiri, eyako kwa akuru a ansembe akamvumbule kwaŵo. 11Naŵo pechimvwa esekelela, nopangana naye kumpa ndalama. Naye esakasaka momvumbulila kwaŵo.

12Pa siku loyamba la mitanda iliye chizamba, ponyema pasaka, asambili ŵake enena naye, Mupangwa tikaikile kuni kuti mulyereko pasaka? 13Naye etuma aŵiri a asambili ŵake enena naŵo, Loŵani mu mzinda, akakumane namwe mwanalume wotwala nongo ya manzi: mkamkonke; 14muli monse mwati akaloŵe yeve munene naye mwine wa ng'anda, Msambizi akuti, Chiri kuni chipinda changu cha alwendo, mwamene umo nikalyeremo pasaka pamo na asambili ŵangu? 15Naye yeve yeka akamlangizyeni chipinda chikuru cha pamulu choyanzyiwa na chowamyiwa: mwamene umo mkatiwamizye. 16Naŵo asambili efuma eloŵa mu mzinda efwanga nga ni mwamene mwaŵauzizya, eikilatu pasaka.

17Lomba pechenze chingulo echiza pamo na ŵala kumi na aŵiri. 18Pamene peŵenzoseama pakulya Yesu echiti, Lezee numnenelani, Umo wa mweo anivumbule, wamene uyo akulya pamo nane. 19Naŵo eyambondandaula nomnenera umo umo, Kansi nine? 20Eŵauzya, Ni umo wa aŵa kumi na aŵiri, uyo olyera pamo na neo mndilo. 21Pakuti Mwana wa muntu akuya umo mzilembewera zyake, sembe malilo ku muntu uyo wati avumbuliwe naye Mwana wa muntu! ni chiweme muntu uyo angati aliyovyalikwe.

22Naŵo penzekulya yeve eula mtanda, naye akashukisye esuna eŵapa echiti, Ulani: uyu ni muŵili wangu. 23Naye eula ntumo, akashukisye eŵapa: naŵo ŵonse emwamo. 24Enena naŵo, Uyu ni mlopa wangu wa mapangano, wovwishiwa pa milandu ya anyinji. 25Lezee numnenelani, Senti nize nimwe soti vyotwala vya mpesya mpaka siku lilala linti nikamweremo vyalomba mu ufumu wa Mlungu. 26Naŵo akaimbe nzimbo efuma echiya ku lupiri lwa Elaya.

27Yesu naye enena naŵo, Monse mpilingishiwe: pakuti kwilembewa, Nize nimnyate chiŵeta, mbelele nazyo zize zimwazike ng'ondo. 28Sembe nikazouka nize nimtangulileni ku Galilaya. 29Sembe Petro enena naye, Chukanga ŵonse akazopilingishiwa ninga neo yai. 30Yesu emuuzya, Lezee nukunenera kuti lero weo usiku uno, kombwe pakaliye nolila kaŵiri, unikane katatu. 31Naye elaŵira kositikizya ngako, Chukanga nize nifwe namwe ntenti nize nimkaneni. Ŵonse soti elaŵira tetyo.

32Lomba ezapo pa malo potuliwa zina lake Getsemane: naye enena naŵo asambili ŵake echiti, Nkalani pano mpaka munti nisengere. 33Eŵaula pamo naye Petro na Yakobo na Yohana, eyamboyopa kwene kantu nonyonyomwa kwendi. 34Eŵanenera, Mzimu wangu usinginika ngako mpaka imfwa: nkalani pano na kuŵa tuni. 35Nipo epulapo patonto echiwa pansi, esenga kuti kati kukakumika kansita aka kampitilile. 36Echiti, Abba, Ŵata, vyonse vuchitika namwe; imyaponi kwangu ntumo iyi: sembe nte icho chinupangwa neo, sembe icho chimupangwa mweo. 37Naye akawere eŵafwanga enze mtulo, enena naye Petro, Simoni, kansi uli mtulo? mwati ungaŵe tuni kansita kamo? 38Iŵani tuni, sengani, mngaloŵe poyezyewa: lezee mzimu uzomera, sembe muŵili ni wolenda. 39Nipo efumako soti esenga kowerezya malizu amene aŵo. 40Naye echiza soti eŵafwanga enze mtulo, pakuti menso ŵaŵo elemelwa ngako; aliyoziŵa chomyasuka. 41Naye echiza pakatatu enena naŵo, Nkamulalani lomba nopumula: yakumana; kafwika kansita; ŵonani, Mwana wa muntu ovumbuliwa ku manja a mbifi. 42Imani, takuya: ŵonani, uyo onivumbula wafwikila.

43Nipo lomba pano apa akali enena yeve echiza Yuda, umo wa aŵo kumi na aŵiri, pamo na liumba lina vinkalammanja na minkuru, lufumira kwa akuru a ansembe na alembi na akuruakuru. 44Lomba wamene emvumbula eŵauzya chiziŵikwilo echiti, Uyo unti nikafyonte ni wamene; mkatisyeni, muye naye mumsungisye. 45Naye pamene apo akaze epuvyomzila echiti, Rabbi, emfyonfyonta. 46Nipo emvwitila nomuula. 47Sembe muyake wa aŵo enzepeneme pafupi esolola chinkalammanja chake, emchenchena kapolo wa mkuru wa ansembe nomtenda kwatu. 48Yesu eyasuka eŵanenera, Kansi mwafuma na vinkalammanja na minkuru kuzonikata nga nine njivi? 49Nsiku na nsiku nenze pamo namwe mchipupilo kusambizya, muliyonikata: sembe ichi chachitiwa kuti malembo asilizike. 50Naŵo emsiya ŵonse noutuka.

51Lomba mlumbwana muyake ekonkana naye, enze na nyula inaka pa muŵili wake wa wamba: naŵo emkata; 52naye eisiya nyula eutuka chintaku.

53Lomba emguguzila Yesu ku mkuru wa ansembe: elongana pamo naye akuru a ansembe ŵonse na akuruakuru na alembi. 54Naye Petro emkonka kotalingana kuza na mkati mu luŵanza lwa mkuru wa ansembe, enzenkezi pansi pamo na manjolinjoli kuyota mulilo. 55Lomba akuru a ansembe na akuru ŵonse a milandu esakilasakila untoni womsusya nawo Yesu kuti ampaisye, aliyoufwanga. 56Pakuti anyinji emnenera untoni woŵepa, sembe untoni waŵo uliye noyamo. 57Nipo eima ŵambi emnenera untoni woŵepa wakuti, 58Timumvwa enzonena, Nize nipasule chipupilo ichi chochitiwa na manja, na pa masiku atatu nimange chiyakwene chosachitiwa na manja. 59Sembe chukanga teti untoni waŵo ulive noyamo. 60Nipo mkuru wa ansembe epanama pakati emkonsha Yesu echiti, Kansi suyasuka kantu? ichi ni chinji chakukunenera untoni? 61Sembe yeve enze cherere wosayasuka kantu. Mkuru wa ansembe emkonsha soti enena naye, Kansi niwe Kristo ŵati, Mwana wa uyo Woŵirikila? 62Yesu echiti, Nine wamene: namwe muze mumuŵone Mwana wa muntu onkala kwanja kwendi kwa mpamvu, na kuza na mikumbi ya mululu. 63Naye mkuru wa ansembe eipazula minjira yake echiti, Ni chinji patusakila ntoni ziyake? 64Mwamvwa mwamchitira Mlungu msikila: mulinga tyani? Naŵo ŵonse epingula kuti owamila kufwa. 65Nipo ayake etatikomtira mata, emmanga chinkuwa nomgung'ulagung'ula nomuuzya, Losya: na manjolinjoli emlonderera nomnyata malupi.

66Pamene penze Petro pansi mu luŵanza ezamo umo wa vituntulu vya mkuru wa ansembe; 67naye akaŵone Petro oyota mulilo emlolesisya echiti, Nawe kumo wenze naye Mnazarayo uyo Yesu. 68Yeve ekana echiti, Kuziŵa sinuziŵa chukanga kumvwisya chamene chiunena weo: naye efuma echiya ku lukoro; nipo kombwe elila. 69Chituntulu icho chimuŵona chiyamba soti kunena naŵo epanamapo, Uyu ni wa aŵo. 70Yeve ekana soti. Kansita katonto aŵo epanamapo enena na Petro, Ni chendi we niwe wa aŵo, pakuti niwe Mgalilaya. 71Naye eyamboshamika nolapa kuti, Ntenumziŵa muntu uyu umunena. 72Lomba pano apa kombwe ewerezya pakaŵiri. Naye Petro elikumbuka lizu nga ni mwechimuuzizya Yesu, Pakaliye nowerezya kombwe kaŵiri unikane katatu. Naye pechilukana ichi elila misozi.

Currently Selected:

M. Marko 14: MA23

Highlight

Copy