M. Mattayo 20

1PAKUTI ufumu wa kumulu ulingana na muntu mwine wa ng'anda, uyo ebulika usikusiku kuyolalika amilimo ku munda wake wa mipesya. 2Naye akapangane naŵo amilimo kobiri limo siku limo eŵatuma mmunda wake wa mipesya. 3Naye ebulika zuŵa pelikwera eŵona ayakwene enzepeneme tyala pa malo positira makweo, 4echiti kwaŵo, Nkoyani namwe mmunda, nipo chiri chonse chamene chuwamila nize nimpeni. Naŵo ŵechiya. 5Soti ebulika mchilungu cha zuŵa na zuŵa likachingame, echita tetila. 6Nipo zuŵa likati ŵetaŵeta ebulika eŵona ayakwene enzepeneme, echiti kwaŵo, Mupanamilanji tyala kuno zuŵa lamsuma? 7Enena naye, Pakuti palive muntu watilalika. Yeve enena naŵo, Nkoyani namwe mmunda. 8Nipo chikaze chingulo ula mwine wa munda wa mipesya enena na chilolesya wake, Kaŵaite amilimo, ŵalipe malipiro ŵaŵo, kuyambila pa wosililila kuza na wotatika. 9Pechiza ŵala amene elembewa zuŵa likati ŵetaŵeta epokera ali wonse kobiri limo. 10Nipo pechiza ŵala ŵotatika elinga kuti apokere kopulamo; naŵo tetila epokera ali wonse kobiri limo. 11Naŵo akalipokere enderera ku mwine wa ng'anda 12echiti, Aŵa ŵosililila akata kamfunda katonto, namwe mwaŵatazya nga ni seo amene tapilila sunzyo la zuŵa na chitukumila cha line. 13Sembe yeve eyasuka echiti kwa umo wa ŵala, Muyangu, niliyokuchitira vyosalungama: kansi ntiwapangana nane kobiri limo? 14Ula lila liri lako, nkoya; ni kupangwa kwangu kumpa uyu wosililila nga ni weo. 15Kansi ntechuzomereka kuli neo kuchita chinupangwa na vyangu namwine? kano liso lako ni liipa ŵati, pakuti neo nne muweme? 16Tetyo ŵosililila azaŵe ŵotatika, na ŵotatika azaŵe ŵosililila.

17Lomba Yesu penzekuya ku Yerusalemi eŵaula asambili kumi na aŵiri pa ŵeka, enena naŵo pa njira, 18Ŵonani, tikuya ku Yerusalemi; naye Mwana wa muntu akapelekewe kwa akuru a ansembe na kwa alembi; amene ati akampingule ku imfwa, 19nompeleka ku Mitundu, kumchitila fweyo nomkwapula nompachika pa msalaba: naye siku la mazo akaushiwe.

20Pamene apo echiza kwake anyina waŵo a ŵana a Zebedayo pamo na ŵana ŵake, emlambila nosenga kantu kwake. 21Naye emnenera, Usakanji? Enena naye, Suzulani kuti ŵana ŵangu ŵamene aŵa aŵiri akonkala muyake kwanja kwanu kwendi na muyake kwanja kwanu kwa manzyere mu ufumu wanu 22Sembe Yesu eyasuka echiti, Mweo simuziŵa chamene chimusenga. Kansi mngamwereko ntumo yamene inti nimwereko neo? Ŵeve enena naye, Tingakumeko. 23Eŵauzya, Ntumo yangu muze mumwereko chendi: sembe kunkala kwanja kwangu kwendi na kwanja kwangu kwa manzyere kupa ntekuli kwangu, lomba ni kwa aŵo amene ekwiikiwa na Ŵata ŵangu. 24Naŵo ŵala kumi akamvwe enyekera mitima akwaŵo aŵo aŵiri. 25Sembe Yesu eŵaita kwake echiti, Muziŵa kuti mafumu a Mitundu olizanza pali ŵeve, na akuru ŵaŵo oŵachitira mantunya. 26Ntepati pakuŵa tetyo pali mweo yai: sembe ali wonse opangwa kuŵa mkuru pali mweo aŵekuŵa mtumiki wanu; 27naye soti ali wonse opangwa kuŵa wotatika pali mweo aŵekuŵa kapolo wanu; 28nga ni umo Mwana wa muntu mwaliyozila kutumikiliwa, sembe kutumikila nopeleka moyo wake kuŵa mbombola kwa anyinji.

29Nipo penzofuma ŵeve mu Yeriko liumba liku u limkonka. 30Lomba ŵonani, mpofu ziŵiri zyenzenkezi mmbali mwa njira, nazyo pezichimvwa kuti ni Yesu enzopita zikuwa zichiti, Asikuru, mtichitile chifundo, mwe mwana wa Davide. 31Liumba nalo lizituzula kuti zimyalale: sembe zyeve zikakasya kukuwa zichiti, Asikuru, mtichitile chifundo, mwe mwana wa Davide. 32Naye Yesu epanama eziita echiti, Musaka nimchitileni chinji? 33Zichiti kwake, Asikuru, kuti menso ŵasu atunamiwe. 34Naye Yesu mtima wake wichita lusungu ezikumya mmenso: nipo lomba pano apa zilola soti zimkonka yeve.

Currently Selected:

M. Mattayo 20: MA23

Highlight

Copy