M. Mattayo 18

1NSITA yamene ila ezako asambili kwa Yesu echiti, Ni ŵani kansi wopulamo mu ufumu wa kumulu? 2Naye eliitira kamwana ekapanamika pakati paŵo, 3echiti, Lezee numnenelani, Mkakanoyaruka na kuŵa nga ni tuŵana ntemti mkaloŵe mu ufumu wa kumulu peka patonto. 4Teti ali wonse ati alichefye nga ni kamwana aka, wamene uyo ni wopulamo mu ufumu wa kumulu. 5Soti ali wonse ati apokere kamwana kamo koteti pa zina langu onipokera neo: 6sembe ali wonse ati apilingisye kamo ka tuŵana utu tunimvwila, ni chiweme kwake kuti chimpero chikuru chikoloŵekewe pa mkosi pake, naye ambizyiwe pa maŵiriŵiri a chimana. 7Malilo ku charo cha pansi pano chifukwa cha vyopilingisya! vyopilingisya sivingalekekuza, sembe malilo ku muntu uyo akuza nacho chopilingisya! 8Kati kwanja kwako kano lwayo lwako likakupilingisya ulitende nolizipula: ni chiweme kwako kuloŵa mmoyo wolemala kano wopintya kupula ukaŵa na manja aŵiri kano malwayo aŵiri kupozewa mmulilo wa chilalukile. 9Kati liso lako likakupilingisya ulikoloŵole nolizipula: ni chiweme kwako kuloŵa mmoyo na liso limo kupula ukaŵa na menso aŵiri kupozewa mgehenna ya mulilo. 10Lolani kuti msapwazya kamo ka utu tutonto; pakuti nunena kuli mweo kuti malaika ŵaŵo kumulu ochilola maŵero chinso cha Ŵata ŵangu wa kumulu. [11Pakuti Mwana wa muntu echizopuzumusya chotaika.] 12Nga mulinga tyani? kati muntu ana mbelele makumi kumi, ikaluŵila imo ya izyo, kansi ntangazileke zila makumi asano na ŵane na mpuzyo zisano na zine, na kuya ku malupiri kuyosakila ila yaluŵila? 13Nipo kati oifwanga lezee numnenelani osangalala nayo kupula zila makumi asano na ŵane na mpuzyo zisano na zine zyamene ziliyoluŵila. 14Tetyo nte kupangwa kwa Ausu wanu ali kumulu kuti kamo ka utu tutonto kataike.

15Kati mkwanu akakupontera nkoya ukamlangizye choifya chake pakati pako na yeve pa mweka: kati akakumvwila wamuŵeteka mkwanu. 16Sembe kati somvwila ulilapo pamo nawe muyako umo kano aŵiri, kuti pakanwa pa ntoni ziŵiri kano zitatu lizu liri lonse likose. 17Naye kati akakana kwamvwila ŵeve uiuzye eklezya: naye akakana kwimvwila eklezya soti, kwako naaŵe nga ni wa Mitundu na wamsonko. 18Lezee numnenelani, Vyonse vimti mmange pa charo na kumulu vimangiwe, na vyonse vimti mmangulule pa charo na kumulu vimangululiwe. 19Soti numuuzyani kuti kati aŵiri a mweo akazomerezyana pansi pano pa chintu chiri chonse chati asenge, chize chichitiwe kwaŵo na Ŵata ŵangu wa kumulu. 20Pakuti apo pakulongana aŵiri kano atatu mzina langu nili pamene pala pakati paŵo.

21Pamene apo Petro echiza enena naye, Asikuru, mkwasu anipontere kangani neo komlekelela? mpaka kasano na kaŵiri kansi? 22Yesu emnenera, Sinukuuzya kuti mpaka kasano na kaŵiri yai, sembe mpaka makumi asano na aŵiri kupasya na kasano na kaŵiri. 23Tetyo ufumu wa kumulu ulinganishiwa na mfumu chite ichiti ipenderane na akapolo ŵake. 24Nayo pamene ikayambopenda umo eletewa kwake wamene eyapulako kwake matalanta myanda makumi kumi. 25Sembe poŵona kuti enzeve kantu kowezezya asikuru wake esuzula kuti yeve asitiwe, na mkazi wake na ŵana na vyonse vyenze navyo, achishiwe malipiro. 26Teti kapolo uyo ni pechikunkulika pansi emlambila echiti, Asikuru, msisikanye nane, zyonse nize nimuwezezyeni. 27Naye asikuru wa kapolo ula emchitira chitinti mu mtima, emmangulula emlekelela mangaŵa ŵala. 28Lomba ula kapolo akafume efwanga umo wa akapolo ayake wamene eyapulako kwake makobiri makumi kumi: nipo emvumbatila nomtondovya pa mkosi echiti, Wezya zila ziwiyapula. 29Pamene apo uyo kapolo muyake evunama nompapatira kuti, Usisikanye nane, nane nze nkuwezezye. 30Yeve ekana echiya empoza mkambolimboli mpaka pati awezye zyechiyapula. 31Teti akapolo ayake akaŵone chamene chachitiwa endandaula kukuru, echizolongosola kwa asikuru waŵo vyonse vyachitiwa. 32Nipo asikuru wake emuitira kwake enena naye, We kapolo muŵipa, weo unalekelela mangaŵa ŵala ŵonse chifukwa wanipapatira: 33kansi nawe soti sembe ntewamchitira kapolo muyako chitinti, nga ni neo mnakuchitira weo chitinti? 34Naye asikuru wake ekalipa empeleka ku azuzi mpaka pati awezye zyonse zyechiyapula. 35Teti soti na Ŵata ŵangu wa kumulu ni mwati amchitireni mweo, kati ntemulekelela ali wonse mkwaŵo na mitima yanu.

Currently Selected:

M. Mattayo 18: MA23

Highlight

Copy