Luka 23

1LOMBA liumba ilo lonse liima na kuya naye kwa Pilato. 2Eyambomsimikizya kuti, Timfwanga uyu muntu opimfya mtundu wasu, nolesya kumsonkera Kaisari msonko, na kuti yeve mwine ni Kristo mfumu. 3Naye Pilato emkonsha kuti, Kansi niwe Mfumu ya Ayuda? Emyasuka echiti, Mwanena. 4Pilato eŵanenera akuru a ansembe na maumba, Sinufwanga choifya pa muntu uyu. 5Sembe ŵeve ekakasya kuti, Oŵanyesya ŵantu mitima, noŵirizya pa Yudaya ponse, kutatikira pa Galilaya mpaka na kuno. 6Lomba pechimvwa Pilato ekonsha kano muntu ni Mgalilaya. 7Apo akaziŵe kuti ali mwakupingula Herode emtumizya kwa Herode, wamene soti enze mu Yerusalemi nsiku zino.

8Lomba Herode pechiŵona Yesu esangalala kwene kantu: pakuti nsita ikuru enzopangwomuŵona, pechimvwa zyake, naye echetekera kuŵona chiziŵikwilo chochitiwa naye. 9Emkonsha na malizu anyinji; lomba aliyoyasuka kantu. 10Akuru a ansembe na alembi epanama nomsimikizya kwa mzanku. 11Naye Herode na manjolinjoli ŵake empelula nomfweya; akamvwike minjira yozila emuwezya kwa Pilato. 12Naŵo Herode na Pilato eyana umo na muyake siku lamene lila; pakuti kale enzotinkana.

13Lomba Pilato eŵalonganika akuru a ansembe na akuruakuru na ŵantu 14eŵanenera, Mwaza naye kwangu muntu uyu nga ni wopimfya ŵantu: ŵonani, panamkonsinsha pa menso panu sinafwanga chiipa pa muntu uyu cha ivyo vimumsimikizya: 15inde, na Herode naye, pakuti wamuwezezya kwasu; ŵonani, keka kantu kowamila imfwa kechitiwa naye. 16Teti nimkwapule nommangulula. [17Lomba echifwa kwamangululila pa siku lila likuru womangiwa umo.] 18Sembe ŵonse ekuwa pamo nonena, Mfumyeponi uyu notimangululila Barabba: 19wamene epozewa mkambolimboli chikomo chotwanga kumbi kwa mu mzinda nopaya ŵantu. 20Pilato enena naŵo soti popangwommangulula Yesu: 21sembe ŵeve eŵirikizya kuti, Mpachikeni pa msalaba, mpachikeni pa msalaba. 22Enena naŵo pakatatu, Nga uyu eifyanji? sinafwanga chikomo chofwila mwake: teti nimkwapule nommangulula. 23Lomba eŵenka na malizu akuru, esenga kuti apachikiwe. Naŵo malizu ŵaŵo ŵepulamo. 24Pilato epingula kuti chakupangwa chichitike. 25Naye emmangulula uyo epozewa mkambolimboli chikomo chotwanga nopaya ŵantu, wechipangwa; sembe Yesu empeleka kopangwa kwaŵo.

26Lomba penzekuya naye ekata muntu, Simoni wa ku Kurene, ofuma ku minda, nomtwika msalaba autwale pavuli pa Yesu.

27Limkonka liumba likuru la ŵantu na anakazi enzomlilila nomndandaulila. 28Lomba Yesu eŵacheukira echiti, Mwe ŵana anakazi a ku Yerusalemi, msanililila neo, mulililile mwaŵene na ŵana ŵanu. 29Pakuti ŵonani, nsiku zikuza zyati akanene, Vina shuko vyumba na mavumo aliyovyazi wonse na maziŵa aliyonyonsha. 30Ninga azayambonona ku malupiri, Tiponereni, na ku milundu, Tivwinikileni. 31Pakuti kati ochita ivi pa chimuti chiŵisi, ni chinji chiti chichitike pa chiyumu?

32Enzepo soti ayakene aŵiri, anyaluŵifya, ekulikiwa naye pamo apaiwe.

33Lomba akafwike ku malo kuitiwa Chingolomwa empachika kulakwa, na anyaluŵifya aŵo, umo kwanja kwendi, muyake ku manzyere. 34Naye Yesu echiti, Ŵata, ŵalekeleni; pakuti ntoziŵa chakuchita. Ŵeve poyaŵana minjira yake epoza mlondola. 35Ŵantu naŵo enzepeneme ŵololesya. Na akuruakuru soti emtotofya kuti, Epuzumusya ayakene; nalipuzumusye yeka, kati uyu ni Kristo uyo wa Mlungu, wosaluliwa wake. 36Manjolinjoli naŵo emfweya, echiza kwake nosakompa mvinyu woŵaŵa 37echiti, Kati niwe Mfumu ya Ayuda, ulipuzumusye. 38Enzepo soti malembo pamulu pake akuti, UYU NI MFUMU YA AYUDA.

39Nipo umo wa anyaluŵifya ŵopachikiwa emtafulila kuti, Kansi ntiwe Kristo? ulipuzumusye weka na seo. 40Lomba muyake eyasuka emchimula echiti, Kansi sumuyopa na Mlungu weo, pauli mkupinguliwa kwamene kula? 41Nase kowamila chendi, patupokera vituwamila pochita kwasu: sembe uyu aliyoifye keka kantu. 42Echiti, Yesu, munikumbuke, mkaza pofumu wanu. 43Naye emuuzya, Lero lino ukaŵe nane mParadiso.

44Kwenze lomba nga ni zuŵa pa mutu, penze mfinzi pa charo chonse mpaka nsita yakasano na kane, 45pelifipa zuŵa: na chinyula cha mchipupilo chipezuka pakati. 46Naye Yesu akalile nkonde echiti, Ŵata, mmanja mwanu nuŵika mzimu wangu: naye akanene teti esindika mzimu. 47Apo kenturiyo pechiŵona chachitika emlemekezya Mlungu kuti, Ni chendi uyu enze muntu wolungama. 48Naŵo ŵonse maumba elongana kuzoŵonako akaŵone vyachitika ewerera nolikunta pa vifuŵa. 49Ŵonse ŵechiyoŵerezyana naye na anakazi ekonkana naye kufumila mGalilaya epanama kutali kovilolesya ivi.

50Lomba ŵonani, muntu zina lake Yosefe, wamene enze mmbili, muntu muweme na wolungama 51(aliyozomerezyana naŵo pa vyechipanga nochita), wa ku Arimateya, munzi wa Ayuda, enzoulolera ufumu wa Mlungu: 52wamene uyu echiya kwa Pilato nosenga chitanda cha Yesu. 53Naye echisaula nochipombezya mnyula ya nyenye, nomuŵika mchikwe chofokolewa mmwala, mwaliyolala na muntu nsita zyonse. 54Penze pa siku la Chiwamizyo, na sabata litatika kucha. 55Naŵo anakazi ŵala efuma naye mGalilaya ekonka kuvuli noŵona msitu, umo mtembo wake muwiikiwira. 56Nipo ewerako nowamya vyonunkila na mafuta ŵozoleka.

Currently Selected:

Luka 23: MA23

Highlight

Copy